UJWANISI 5 - IsiNdebele 2012 Translation

UJesu upholisa eBhethesda ngeSabatha

¹ Ngemva kwalokho, uJesu wakhuphukela eJerusalema emnyanyeni wamaJuda.

² Nje-ke hlanu kwesango iMvu eJerusalema bekukhona isiziba ekuthiwa ngesiHebheru yiBhethesda egade sinamathuri amahlanu.

³ Lapho-ke bekulele abantu abagulako: iimphofu, iinrhurhubi nabafe ihlangothi. Bebalindele amanzi bona asikinyeke

⁴ ngombana ingilozi kaSomnini bephele ingene ngesizibeni izamazise amanzi, kuthi wokuthomo ongena ngemanzini asinde kunanyana ngisiphi isifo anaso.

⁵ Bekukhona lapho umuntu ogade agule iminyaka ematjhumi amathathu nabunane.

⁶ UJesu wambona alele lapho begodu asazi bona besele anesikhathi eside agula, wambuza wathi: “Ufuna ukuphola na?”

⁷ Isigulani samphendula sathi: “Kosi, anginaye noyedwa ongangifaka ngesizibeni lokha amanzi nazamazisiweko. Nangithi ngilinga ukungena, omunye nje ungena phambi kwami.”

⁸ UJesu wathi kiso: “Sikima, uthathe umsemakho ukhambe.”

⁹ Khonokho umuntu loyo waphola, wathatha umsemakhe wakhamba. Mhlana kwenzeka lokhu, bekungeSabatha.

¹⁰ Yeke amaJuda athi emuntwini opholisiweko: “Namhlanjesi liSabatha, kuphambene nomthetho wethu bona ungaphatha umsemakho.”

¹¹ Waphendula wathi: “Umuntu ongipholisileko uthe, ‘Thatha umsemakho ukhambe.’ ”

¹² Bambuza bathi: “Ungubani umrhali loyo okutjele bona uguge umseme ukhambe na?”

¹³ Nje-ke umuntu opholisiweko azange azi bona bekungubani ngombana uJesu besele akhambile begodu bekunesiqubuthu lapho.

¹⁴ Ngemva kwalokho uJesu wamfumana ngethempelini wathi kuye: “Lalela, uphilisiwe, yeke lisa ukona nakungasinjalo okumbi khulu kungakuvelela.”

¹⁵ Nje-ke umuntu loyo wakhamba wayokutjela amaJuda bona uphiliswe nguJesu.

¹⁶ AmaJuda athoma ukuzumana noJesu ngombana bekenze lokho ngeSabatha.

¹⁷ UJesu wawaphendula wathi: “UBaba uhlala asebenza, nje-ke nami ngiyasebenza.”

¹⁸ Ngokutjho lokho kwarhagalisa amaJuda bona afune ukumbulala ingasingombana wephule iSabatha kwaphela, kodwana ngombana ubize uZimu ngoyise, ngebangelo uzenze bona alingane noZimu.

Amandla weNdodana kaZimu

¹⁹ Yeke uJesu waphendula wathi: “Kwamambala ngiqinisile ngithi kini: INdodana angekhe yenza ilitho ngokwayo, yenza lokho ebone uYise akwenza. Okwenziwa nguYise, neNdodana iyakwenza

²⁰ ngombana uYise uyayithanda iNdodana, uyitjengisa koke akwenzako yena. Uzayitjengisa ngitjho nemisebenzi emikhulu kunale ukuze nimangale.

²¹ Iye, njengombana uYise avusa abafileko bona baphile godu, nayo iNdodana iphilisa labo ethanda bona baphile.

²² UYise ngokwakhe akagwebi muntu kodwana unikele koke ukugweba eNdodaneni,

²³ ukuze boke bahloniphe iNdodana njengombana bahlonipha uYise. Ngiloyo naloyo ongahloniphi iNdodana akamhloniphi noYise oyithumileko.

²⁴ “Kwamambala ngiqinisile ngithi kini: Ozwa amezwami akholwe kongithumileko, unokuphila okungapheliko. Angekhe agwetjwa, kodwana udlulile ekufeni, usekuphileni.

²⁵ Kwamambala ngiqinisile ngithi kini: Isikhathi siyeza, nanje sesifikile, lapho abafileko bazakuzwa ilizwi leNdodana kaZimu, labo abazalizwa bazakuphila.

²⁶ Njengombana uYise anokuphila ngokwakhe, ngokunjalo unikele neNdodana bona ibe nokuphila ngokwayo.

²⁷ Begodu uyinikele igunya lokugweba ngombana iyiNdodana yoMuntu.

²⁸ Ningarareki ngalokhu; siyeza isikhathi lapha boke abasemalibeni bazalizwa ilizwi layo,

²⁹ bavuke; labo abenze okulungileko bazakuvukela ekuphileni; abenze okumbi bavukele ekulahlweni.”

Ubufakazi ngoJesu

³⁰ “Angekhe ngenza ilitho ngokwami; ngigweba ngapha uZimu atjho ngakhona nokugweba kwami kungikho ngombana angiphikeleli ukwenza intando yami kodwana intando yongithumileko.

³¹ “Nangizifakazela ngokwami, khona ubufakazi bami abusilo iqiniso.

³² Ukhona omunye ofakaza ngami, godu ngiyazi bona akutjhoko ngami kuliqiniso.

³³ Nathumela kuJwanisi iinthunywa, yena walifakazela iqiniso.

³⁴ Ayisikukobanyana ngifuna ubufakazi bomuntu; ngitjho lokhu khona nizakuphuluka.

³⁵ UJwanisi bekanjengesibani, sivutha sikhanyisa, navuma isikhatjhana ukuzitika ngomkhanyo wakhe.

³⁶ Nginobufakazi obukhulu kunebukaJwanisi. Imisebenzi uBaba anginikele bona ngiyiphelelise, ekungileyo engiyenzako, iyafakazela bona mbala uBaba ungithumile.

³⁷ UBaba ongithumileko ufakazile ngami, yena azange khenizwe ilizwi lakhe namkha nibone ubuso bakhe

³⁸ begodu ilizwi lakhe alihlali phakathi kwenu ngombana anikholwa amthumileko.

³⁹ Niphenya imitlolo ngombana nidlumbana bona kiyo ninepilo engapheliko. Kodwana ngiyo efakaza ngami!

⁴⁰ Khonapho nala ukuza kimi khona nizakufumana ubuphilo.

⁴¹ “Mina angilamukeli idumo ebantwini.

⁴² Kodwana ngiyazi bona aninathando noZimu ngeenhliziyweni zenu.

⁴³ Ngize ebizweni lakaBaba, kodwana azange ningamukele; njeke-ke omunye nezako ebizweni lakhe, nizamamukela.

⁴⁴ Ningakholwa njani nanidumisana nodwa nje, ningafuni idumo elivela kiloyo onguZimu yedwa na?

⁴⁵ Ningadlumbani bona ngizonimangalela phambi kwakaBaba; ummangaleli wenu nguMosi enithembela kuye.

⁴⁶ Nangabe nakholwa uMosi, nami nganangikholwa ngombana watlola ngami.

⁴⁷ Kodwana nanikholwa akutlolileko, ningakholwa njani engikutjhoko na?”