UJWANISI 4 - IsiNdebele 2012 Translation

UJesu nomfazi weSamariya

¹ AbaFarisi bezwa bona uJesu uzuze bewabhabhadisa abafundi abanengi kunoJwanisi.

² Eqinisweni, uJesu azange akhe abhabhadise kodwana bekubhabhadisa abafundi bakhe.

³ Yeke wasuka eJudiya wabuyela eGalile.

⁴ Bekufanele bona adlule eSamariya.

⁵ Khona wafika eSamariya emzini okuthiwa yiSikhari eduze kwesimu uJakopo ayinikela indodanakhe uJosefa.

⁶ Umthombo kaJakopo gade ulapho, nje-ke uJesu sele adiniwe ekhambeni lakhe, wahlala phasi eqadi komthombo; bekusemini ekulu.

⁷ Kweza umfazi weSamariya azokukhelela amanzi, uJesu wathi kuye: “Akhe ungiphe amanzi, ngisele.”

⁸ Abafundi bakhe bebasaye ngemzini ukuyokuthenga ukudla.

⁹ Umfazi womSamariya wathi: “Wena umJuda, mina ngimSamariya, alo-ke ungangibawa njani amanzi wokusela na?” AmaJuda akadlelani namaSamariya.

¹⁰ UJesu waphendula wathi: “Ingathana bewazi isipho sakaZimu, nokobana ngubani othi kuwe, ‘Ngiseza’ bewuzambawa, yena ubazakupha amanzi wokuphila.”

¹¹ Umfazi wathi kuye: “Mnimzana! Awunanto yokukha, begodu umthombo lo uyatjhinga. Uzawafumanaphi amanzi wokuphila lawo na?

¹² Utjho bona wena umkhulu kukhokho wethu uJakopo owasipha umthombo lo bewasela kiwo yena namadodanakhe nefuywakhe na?”

¹³ UJesu waphendula wathi: “Nanyana ngubani osela amanzi la uzakoma godu,

¹⁴ kodwana ngiloyo naloyo osela amanzi engizamupha wona angekhe abe asoma godu. Amanzi engizamupha wona azakuphenduka isiyalu ngaphakathi kwakhe simondle ngamanzi wokuphila okungapheliko.”

¹⁵ Umfazi wathi: “Mnimzana, ngipha amanzi lawo ukuze ngingasoma namkha ngibuye lapha ngizokukhelela.”

¹⁶ UJesu wathi kuye: “Khamba uyokubiza indodakho uze nayo.”

¹⁷ Umfazi waphendula wathi: “Anginandoda.” UJesu wathi kuye: “Uqinisile lokha nawuthi awunandoda

¹⁸ ngombana bewunamadoda amahlanu, naleyo ohlala nayo nje, akusingeyakho. Yeke ungitjele iqiniso.”

¹⁹ Umfazi wathi: “Ngiyabona bonyana umphorofidi, Mnimzana.

²⁰ Abokhokho bethu bathandaza entabeni le, kodwana nina maJuda nithi iJerusalema yindawo lapha kufanele sithandazele khona.”

²¹ UJesu wathi kuye: “Yewungikholwe mfazi, isikhathi siyeza lapha uBaba angekhe athandazwa entabeni le namkha eJerusalema.

²² Nina nithandaza eningakwaziko, kodwana thina sithandaza esikwaziko ngombana isindiso ivela emaJudeni.

²³ Kodwana isikhathi siyeza, begodu sebesifikile, lapha abathandazako bazakuthandaza uBaba ngommoya nangeqiniso ngombana uBaba uthanda abamlotjha njalo.

²⁴ UZimu unguMoya, labo abamthandazako kufuze bamthandaze ngommoya nangeqiniso njengombana anjalo.”

²⁵ Umfazi wathi kuye: “Ngiyazi bona uMesiya okuthiwa nguKrestu, uzakuza; nakafikako uzasihlathululela koke.”

²⁶ UJesu wathi kuye: “Nginguye, okhuluma nawe.”

²⁷ Khonokho abafundi bakhe bafika. Barareka ngokukhuluma kwakhe nomfazi. Kodwana akakho owathi kuye, “Ufunani na?” namkha, “Ukhulumelani naye na?”

²⁸ Yeke umfazi wasukela umjekakhe lapho wabuyela ngemzini, wathi ebantwini:

²⁹ “Yizani nizokubona umuntu ongitjele koke engakhe ngakwenza. Angaba nguKrestu na?”

³⁰ Baphuma ngemzini baya kuJesu.

³¹ Kusenjalo abafundi bamncenga bathi: “Mfundisi, akhe ugome!”

³² Kodwana waphendula wathi: “Nginokudla engikugomako eningazi ilitho ngakho.”

³³ Yeke abafundi babuzana bathi: “Kghani omunye umlethele ukudla na?”

³⁴ UJesu wathi kibo: “Ukudla kwami kukwenza intando yongithumileko nokuqeda umsebenzakhe.

³⁵ Azakhe niphele nitjho nithi, ‘Kusele iinyanga ezine bona kuvunwe!’ Kodwana ngithi kini qalani mazombe, amasimu sele alungele ukuvunwa.

³⁶ Ovunako sele amukeliswa umvuzo begodu ubuthelela iinthelo zokuphila okungapheliko ukuze otjalileko novunako bathabe boke.

³⁷ Ngokunjalo siliqiniso isitjho esithi, ‘Omunye uyatjala, omunye uyavuna.’

³⁸ Nginithume bona niyokuvuna lapha ningasebenzi khona, abanye balimile, nina nizakuzuza emsebenzinabo.”

³⁹ AmaSamariya amanengi ngemzini akholwa kuye ngebanga lobufakazi bomfazi obuthi: “Ungitjele koke engakhe ngakwenza.”

⁴⁰ Yeke kwathi abantu beSamariya nabeza kuye, bambawa bona ahlale nabo; nje-ke wahlala lapho amalanga amabili.

⁴¹ Abanengi godu bakholwa ngomlayezwakhe.

⁴² Bathi emfazini: “Siyakholwa gadesi, ingasingalokho okutjhwileko ngombana nathi ngokwethu simzwile, besiyazi bona nguye uMsindisi wephasi.”

UJesu upholisa indodana yenduna

⁴³ Ngemva kokuphela kwamalanga amabili, wasuka lapho waya eGalile

⁴⁴ ngombana yena ngokwakhe wathi: “Umphorofidi akahlonitjhwa endaweni yekhabo.”

⁴⁵ Kwathi bona afike eGalile, abantu bamamukela ngombana bebakubonile koke akwenze emcimbini eJerusalema.

⁴⁶ Yeke uJesu wabuyela eKana ngeGalile, lapha bekaphendule khona amanzi aba liwayini. Nje-ke bekukhona induna egade inendodana egulako eKapernawumi.

⁴⁷ Kwathi bona izwe bonyana uJesu ubuyile eJudiya useGalile, yaya kuye yayombawa bona ehle ayokupholisa indodanayo, ebesele iseduze nokufa.

⁴⁸ UJesu wathi kiyo: “Ngaphandle kobana nibone iimbonakaliso neemangaliso angeze nakholwa.”

⁴⁹ Induna yaphendula yathi: “Kosi, yehla ngaphambi kobana indodanami ife.”

⁵⁰ UJesu wathi kiyo: “Khamba, indodanakho izakuphila!” Yawakholwa amezwi kaJesu yakhamba.

⁵¹ Kuthi isendleleni isiya ekhaya, iinceku zayo zayihlangabeza ngombiko oyazisa bonyana indodanayo ipholile.

⁵² Nje-ke yazibuza bona bekusikhathi bani lokha indodanayo iba ngcono. Zayiphendula zathi: “Bekuyisimbi yokuthoma izolo ntambama lokha umgomani nawuyilisako.”

⁵³ Yeke uyise wakhumbula bona sikhatheso lokha uJesu namtjelako asithi: “Indodana yakho izakuphila.” Yeke yena nekumba yakhe yoke bakholwa.

⁵⁴ Leso-ke simangaliso sesibili uJesu asenzako ukusuka eJudiya ukuya eGalile.