UJWANISI 3 - IsiNdebele 2012 Translation

UJesu noNikhodemusi

¹ Bekukhona ebaFarisini umuntu ekuthiwa nguNikhodemusi, yena ubesikhulu samaJuda.

² Langelinye ebusuku weza kuJesu wafese wathi: “Rabi, siyazi bona umfundisi othunywe nguZimu ngombana akakho noyedwa ongenza iimangaliso ozenzakwezi ngaphandle kobana uZimu abe naye.”

³ UJesu wamphendula wathi: “Kwamambala ngiqinisile ngithi: Akakho noyedwa ozakubona umbuso kaZimu ngaphandle kobanyana abelethwe butjha.”

⁴ UNikhodemusi wambuza wathi: “Umuntu omdala angabelethwa njani butjha na? Kghani angabuyela ngesiswini sakanina abelethwe kwesibili?”

⁵ UJesu wamphendula wathi: “Kwamambala ngiqinisile ngithi kuwe: Akakho noyedwa ozakungena embusweni kaZimu ngaphandle kobana abelethwe ngamanzi nangoMoya.

⁶ Okubelethwe yinyama kuyinyama, nalokho okubelethwe nguMoya kumumoya.

⁷ Ungarareki ngombana ngithe kuwe kufanele ubelethwe butjha.

⁸ Ummoya uvunguza ngapha ufuna ngakhona; uzwa ukuphephetha kwawo, kodwana awazi lapha uvela khona nalapha uya khona. Kunjalo kiloyo naloyo obelethwa nguMoya.”

⁹ UNikhodemusi wabuza wathi: “Lokhu kungenzeka njani na?”

¹⁰ UJesu wamphendula wathi: “Wena umfundisi wakwa-Israyeli, kodwana awukwazi lokhu na?

¹¹ Kwamambala ngiqinisile ngithi kuwe: Sifakaza ngalokho esikwaziko, sibike lokho esikubonileko, khonapho nina bantu anamukeli ubufakazi bethu.

¹² Ngikhulume nani mayelana nezinto zephaseli kodwana anikholwa; alo-ke ningakholwa njani nanginitjela ngezinto zezulwini na?

¹³ Akakho okhe waya ezulwini ngaphandle kwaloyo owehla avela ezulwini, iNdodana yoMuntu.

¹⁴ “Njengombana uMosi waphakamisa inyoka erhalawumbeni, njalo-ke neNdodana yoMuntu kufanele iphakanyiswe,

¹⁵ ukuze kuthi loyo okholwa kiyo abe nepilo engapheliko.

¹⁶ Mbala uZimu walithanda kangaka iphasi, wabe wanikela ngeNdodanakhe ebelethwe yodwa, khona kuzakuthi loyo okholwa kiyo angabhubhi, kodwana abe nepilo engapheliko.

¹⁷ Iye, akakathumeli iNdodanakhe bona izokugweba iphasi, kodwana kobana iphasi lisindiswe ngayo.

¹⁸ “Loyo oyikholwako, akagwetjwa; kodwana loyo ongakholwako, ugwetjiwe ngombana azange akholwe eNdodaneni kaZimu ekukuphela kwayo.

¹⁹ Isigwebo singilokhu: Ukukhanya kufikile ephasini, kodwana abantu bakhetha ubumnyama kunomkhanyo ngombana izenzo zabo zimbi.

²⁰ Woke umuntu owenza okumbi, uwuhloyile umkhanyo, akezi emkhanyweni ngombana wesaba bona izenzo zakhe ezimbi zizakudaluleka.

²¹ Kodwana loyo owenza iqiniso, uyavela emkhanyweni khona kuzakubonakala bonyana izenzo zakhe zenziwe kuZimu.”

UJesu noJwanisi uMbhabhadisi

²² Ngemva kwalokho uJesu nabafundi bakhe baya enarheni yeJudiya. Lapho wahlala isikhatjhana nabo, abhabhadisa.

²³ UJwanisi naye bekabhabhadisa nge-Ayinoni, eduze neSalima ngombana lapho bekunamanzi amanengi. Abantu beza kuye bona babhajadiswe.

²⁴ Lokhu bekungaphambi kobanyana uJwanisi avalelwe ngesikhungweni.

²⁵ Nje-ke kwaqubuka ukuphikisana ngokuhlambulula phakathi kwabafundi bakaJwanisi namaJuda.

²⁶ Baya kuJwanisi, bafika bathi: “Mfundisi, umuntu obekanawe ngaphetjheya kweJordani, ngitjho loyo ogade ufakaza ngaye, qala uyabhabhadisa, begodu boke baya kuye!”

²⁷ UJwanisi waphendula wathi: “Akakho ongaba nento ngaphandle kobanyana uZimu amuphe ivela ezulwini.

²⁸ Nani ngokwenu nibofakazi bami bona ngithe angisuye uKrestu, kodwana ngithunywe ngaphambi kwakhe.

²⁹ Onomlobokazi umyeni; kodwana umngani womkhwenyani ojama amlalele, uyathaba nakezwa ilizwi lomkhwenyani. Yeke ithabo lami seliphelele.

³⁰ Kufanele yena akhule, mina nginciphe.”

Loyo ovela ezulwini

³¹ “Ovela ngehla, ungehla kwabo boke. Loyo ongowephasi ngewephasinapha, begodu ukhuluma ngezephasi. Kodwana loyo ovela ezulwini ungaphezu kwakho koke.

³² Ufakaza lokho akubonileko nakuzwileko, kodwana akakho noyedwa owamukela ubufakazi bakhe.

³³ Kodwana loyo owamukela ubufakazi bakhe uqinisa bona uZimu uliqiniso.

³⁴ Loyo uZimu amthumileko ukhuluma amezwi kaZimu ngombana uZimu unikela uMoya ngokungalinganisi.

³⁵ UBaba uyayithanda iNdodanakhe begodu unikele koke esandleni sayo.

³⁶ Loyo okholwako eNdodaneni unokuphila okungapheliko; kodwana ongakholwa eNdodaneni ngekhe akubona ukuphila, kodwana uzakuhlala ngaphasi kobukhali bakaZimu.”