UJWANISI 20 - IsiNdebele 2012 Translation

Ithuna elinganalitho ngaphakathi

¹ Ekuseni ngelanga lokuthoma leveke, kusesenzima ngondi, uMariya Magdalina waya ethuneni, wafumana ilitje ebelivale umnyango wethuna ligediwe.

² Nje-ke wagijimela kuSimoni Pitrosi nemfundini ogade athandwa nguJesu, wafese wathi: “IKosi bayithethe ngethuneni, asazi bona bayibekephi!”

³ Yeke uPitrosi nomfundi omunye baya ethuneni.

⁴ Bobabili njalo gade bagijima, kodwana umfundi lo watjhiya uPitrosi ngebelo wafika ethuneni maqangi.

⁵ Wahlola, wabona itjhila lelineni ebebamphuthele ngalo, akhange angene.

⁶ Nje-ke uSimoni Pitrosi obegade amlandela ngemuva wafika walunga poro ngethuneni. Wabona itjhila lelineni ebebamphuthele ngalo lilele lapho,

⁷ netjhila ebebambophe ngalo ehloko, lilodwa eqadi lisongiwe.

⁸ Yeke umfundi lo, owafika ethuneni qangi, naye wangena; wabona, wakholwa.

⁹ Bebasengakazwisisi imitlolo ethi kumele avuke kabafileko.

¹⁰ Yeke abafundabo babuyela emakhaya.

Ukuziveza kwakaJesu ngemva kokuvuka kwakhe

¹¹ Kodwana uMariya bekajame ethuneni alila. Asalila njalo, wakhothama wahlola ngethuneni;

¹² qala wabona iingilozi ezimbili lapho zembethe okumhlophe, zihlezi lapho bekunomzimba kaJesu, enye ngehlokweni enye ngeenyaweni.

¹³ Zambuza zathi: “Mma, ulilelani na?” Waphendula wathi: “Bathethe iKosami, nje-ke angazi bona bayibekephi!”

¹⁴ Sekatjhwile lokho watjhuguluka waqala, wabona uJesu ajame lapho; kodwana akhange azi bona nguJesu.

¹⁵ UJesu wambuza wathi: “Mma, ulilelani na? Ngubani omfunako na?” Wadlumbana bona mlimisimu, wathi kuye: “Nangabe umthethe, Mnimzana, ngitjela lapha umuse khona ngizakuya ngiyomthatha.”

¹⁶ UJesu wathi kuye: “Mariya!” UMariya watjhidela kuye warhuwelela ngesiHebheru wathi: “Rabuni!” (okutjho bona “mfundisi”).

¹⁷ UJesu wathi: “Ungangibambi ngombana angikayi kuBaba. Kodwana khamba uye kubazalwana bami ubatjele uthi, ‘Ngibuyela kuBaba onguYihlo wenu noZimami onguZimenu.’ ”

¹⁸ Yeke uMariya Magdalina wakhamba wayokutjela abafundi wathi: “Ngiyibonile iKosi!” Watjho nokobana itheni kuye.

¹⁹ Kusihlwa ngelanga lokuthoma leveke, abafundi bandawonye neminyango ivaliwe ngokwesaba amaJuda, uJesu wafika wazokujama hlangana nabo, wathi: “Ukuthula akube nani!”

²⁰ Ngemva kobana atjho lokho, wabatjengisa izandla nehlangothi lakhe. Abafundi bathaba kwamambala lokha nababona iKosi.

²¹ Godu uJesu wathi kibo: “Ukuthula akube nani! Njengombana uBaba angithumile mina, nami ngiyanithuma nina.”

²² Kwathi bona atjho lokho, wabaphefumulela wathi: “Yamukelani uMoya oCwengileko.

²³ Nanilibalela abantu izono zabo, zizakulitjalelwa; naningabalibaleliko, azizukulitjalelwa.”

UJesu noTomasi

²⁴ Nje-ke uTomasi, obizwa bona nguDidimosi nongomunye wabafundi abalitjhumi nambili, bekangekho ebafundini lokha uJesu nafikako.

²⁵ Yeke abafundi abanye bamtjela bathi: “Siyibonile iKosi!” Kodwana uTomasi wathi kibo: “Ngaphandle kobana ngibone amanceba weempikiri ezandleni zayo, ngifake umunwami lapha bekuneempikiri khona, nesandla sami ehlangothini layo, angeze ngakholwa.”

²⁶ Ngemva kweveke abafundi bebahlangane ngendlini godu, noTomasi anabo. Nanyana iminyango beyihluthulelwe, uJesu weza wajama hlangana nabo wathi: “Ukuthula akube nani!”

²⁷ Yeke wathi kuTomasi: “Faka umunwakho lapha, qala izandla zami. Yelula isandla sakho usifake ehlangothini lami. Lisa ukuzaza, ukholwe.”

²⁸ UTomasi wamphendula wathi: “Kosami, Zimami!”

²⁹ UJesu wathi kuye: “Ukholwa ngombana ungibona na? Babusisiwe labo abathi bangakaboni nokho bakholwe.”

Isizathu sencwadi le

³⁰ UJesu wenza nezinye iimangaliso ezinengi phambi kwabafundi bakhe ezingakatlolwa encwadini le.

³¹ Kodwana lokhu kutloliwe khona nizakukholwa bona uJesu unguKrestu, iNdodana kaZimu, nokuthi ngokukholwa kuye nibe nokuphila.