UJWANISI 2 - IsiNdebele 2012 Translation

Ubukhazi beKana

¹ Ngelanga lesithathu kwaba nobukhazi eKana leGalile, unina lakaJesu akhona naye lapho.

² UJesu nabafundi bakhe gade bamenyiwe ebukhazinobo.

³ Kwathi bona iwayini liphele, unina lakaJesu wathi kuye: “Abasenalo iwayini.”

⁴ UJesu wamphendula wathi: “Umma angakhathazeki ngokuqalene nami, isikhathi sami asikafiki.”

⁵ Yeke unina wathi eencekwini: “Yenzani nanyana yini akutjhoko.”

⁶ Bekurheme lapho imijeka yamanzi emithandathu, ibekwe ngekwesiko lesiJuda lokuzihlambulula. Ngamunye gade ungamumatha amalitha angapheze abe likhulu.

⁷ UJesu wathi eencekwini: “Zalisani imijeka le ngamanzi.” Bayizalisa, yaphuphuma.

⁸ Wathi kizo: “Khelelani-ke niyokunikela usomnyanya.” Mbala bamkhelela.

⁹ Kwathi lokha usomnyanya nakandipha amanzi ebesele aphenduke iwayini, azange azi bona iwayini leli livelaphi. Kodwana iinceku ezakhelela amanzi zazi bonyana libuyaphi; yeke wabiza umkhwenyani.

¹⁰ Wathi kuye: “Woke umuntu ukhupha iwayini elimnandi qangi, kuthi nakube abathekeli abaneli ngokusela, kukhutjhwe itlwembu. Kodwana wena usalokho ukhupha iwayini elimnandi bekube kunje!”

¹¹ UJesu wenza isibonakaliso sakhe sokuthoma eKana engeGalile lapha abonakalisa khona iphazimulwakhe, abafundi bakhe bamkholwa.

¹² Ngemva kwalokho, uJesu nonina, abafowabo nabafundi bakhe baya eKapernawumi, bahlala lapho amalangana.

UJesu uya ngethempelini

¹³ Isikhathi somnyanya wePhasika besesitjhidele, yeke uJesu waya eJerusalema.

¹⁴ Lapho wafumana abantu ngethempelini bathengisa iinkomo, izimvu namazuba; nabatlharulula imali bahlezi eentafuleni zabo.

¹⁵ Yeke wenza isibebhu ngeentambo wabaqotjha boke ngethempelini, kanye nezimvu neenkomo; wapewula iintafula zabatlharululi bemali warhatjha imali yabo.

¹⁶ Watjela labo abathengisa amazuba wathi: “Asuseni lapha! Lisani ukwenza ikumba kaBaba indawo yokuthengisela!”

¹⁷ Abafundi bakhe bakhumbula bona umtlolo uthi: “Ukutjhisakalela indlwakho kungidlile.”

¹⁸ AmaJuda ambuza athi: “Ungenza mmangaliso bani khona uzasibonisa bonyana unalo ilungelo lokwenza lokhu na?”

¹⁹ UJesu waphendula wathi: “Girizani ithempeli, ngizalakha ngamalanga amathathu.”

²⁰ Ambuza athi: “Uzalakha godu ngamalanga amathathu na? Kuthethe iminyaka ematjhumi amane nesithandathu ukulakha ithempeli.”

²¹ Kodwana ithempeli uJesu agade akhuluma ngalo, mzimba wakhe.

²² Kwathi bona avuke kabafileko, abafundi bakhe bakhumbula bona ubasitjho lokhu, bayikholwa imitlolo ecwengileko nalokho uJesu akutjhwileko.

Ilwazi lakaJesu ngomuntu

²³ UJesu asesengeJerusalema ngesikhathi somnyanya wePhasika, abanengi bamkholwa nababona iimangaliso azenzako.

²⁴ Kodwana uJesu azange abathembe ngombana gade abazi boke.

²⁵ Bekungakatlhogeki bona omunye angakhe amtjele ngabo ngombana yena bekagade asazi okungeenhliziyweni zabo.