UJWANISI 19 - IsiNdebele 2012 Translation

¹ Yeke uPilatu wathatha uJesu wayala bona abethwe.

² Amajoni aluka isihlohlo sameva amthwesa sona; amembesa iphuraphura ebubende.

³ Anande eza kuye athi: “Ngwenyama, kosi yamaJuda!” Amwahla.

⁴ UPilatu waphuma godu waya emaJudeni wathi: “Qalani, ngimkhuphela kini kobana nazi bonyana angisifumani isizathu sokumbeka umlandu.”

⁵ Yeke uJesu waphuma, athwele isihlohlo sameva embethe nephuraphura ebubende. UPilatu wathi kibo: “Nangu-ke umuntu loyo!”

⁶ Kwathi bona abaphristi abakhulu neenkhulu bambone, barhuwelela bathi: “Mbethele! Mbethele!” UPilatu wathi kibo: “Mthatheni nina nimbethele ngombana mina angifumani umlandu kuye.”

⁷ AmaJuda amphendula athi: “Sinomthetho thina, nje-ke ngokuya ngomthetho lowo, kufanele afe ngombana uthe uyiNdodana kaZimu.”

⁸ Kuthe lokha uPilatu nakezwa lokhu, kwaba kukhona esaba khulu.

⁹ Wabuyela godu ngesigodlweni, wabuza uJesu wathi: “Ubuyaphi na?” Kodwana uJesu akhange amphendule.

¹⁰ UPilatu wathi kuye: “Awufuni ukukhuluma nami na? Awazi bona nginamandla wokukuthukulula newokukubethela na?”

¹¹ UJesu waphendula wathi: “Bewungekhe waba namandla kimi nangabe bewungakawaphiwa avela phezulu. Yeke loyo onginikele kuwe unomlandu wesono esikhulu.”

¹² Ukusukela lapha, uPilatu walinga ukufumana indlela yokuthukulula uJesu, kodwana amaJuda arhuwelela athi: “Nawungamthukulula, kungatjho bona awusimngani wombusi omkhulu! Loyo ozitjhaya sakosi, urarana nombusi omkhulu!”

¹³ Kuthe lokha uPilatu nakezwa amezwi la, wakhuphela uJesu ngaphandle, wahlala esihlalweni somgwebi endaweni okuthiwa yiGabatha ngesiHebheru.

¹⁴ Bekulilanga lokulungiselela iPhasika, kusemini ekulu, uPilatu wathi emaJudeni: “Nasi ikosenu!”

¹⁵ Barhuwelela bathi: “Msuse! Msuse! Mbethele esiphambanweni!” UPilatu wababuza wathi: “Nifuna bona ngibethele ikosenu na?” Abaphristi baphendula bathi: “Asinayo ikosi ngaphandle kombusi omkhulu!”

¹⁶ Yeke wamnikela kibo bona abethelwe. Bamthatha-ke uJesu bakhamba naye.

UJesu ubethelwa esiphambanweni

¹⁷ Waphuma azitjathele isiphambano sakhe, waya endaweni ekuthiwa yiKhakhayi, (ebizwa ngesiHebheru bona yiGolgotha.)

¹⁸ Lapho-ke bambethela khona anamadoda amanye amabili, enye ngesigomeni enye ngesinceleni, aphahla uJesu.

¹⁹ UPilatu bekatlole isaziso, wasiphanyeka esiphambanweni. Sifundeka bunje: “UJesu weNazaretha, ikosi yamaJuda.”

²⁰ AmaJuda amanengi asifunda isazisweso ngombana indawo lapha uJesu abethelwa khona beyingasikude nedorobho. Isaziso besitlolwe ngesiHebheru, ngesiLathini nangesiGirigi.

²¹ Abaphristi abakhulu bathi kuPilatu: “Ungatloli uthi, ‘Ikosi yamaJuda,’ kodwana uthi, ‘Uthe uyikosi yamaJuda.’ ”

²² UPilatu waphendula wathi: “Lokho engikutlolileko ngikutlolile.”

²³ Sele amajoni abethele uJesu, athatha izambatho zakhe azahlukanisa izabelo ezine, omunye nomunye waba nesabelo kwasala iphuraphura. Iphuraphura leyo beyinganamthungo kodwana beyelukiwe kusuka ehla ukuya enzasi.

²⁴ Amajoni athi kelinye nelinye: “Asingayidabuli, kodwana asiyenzeleni ifumbe sibone bona ngubani ezakuba ngeyakhe.” Lokhu kwenzeka khona kuzazaliseka imitlolo ethi: “Babelana iimpahla zami zokwembatha, benzelana ifumbe ngesambatho sami.” Lokhu ngilokho amabutho akwenzileko.

²⁵ Hlanu kwesiphambano sakaJesu bekujame unina nodadwabo lakanina, uMariya umkaKlopasi noMariya Magdalina.

²⁶ Kwathi lokha uJesu nakabona unina nomfundi egade amthanda ajame hlanu komma loyo, wathi kunina: “Mma, naso indodanakho!”

²⁷ Godu wathi emfundini: “Nango ummakho.” Kusuka lapho umfundi loyo wamthatha wamusa emzinakhe.

Ukufa kwakaJesu

²⁸ Emva kwalokhu uJesu sele asazi bona koke sekuphethekile, nokobana kuzakuzaliseka umtlolo, wathi: “Ngomile.”

²⁹ Bekukhona isitja lapho sizele isibharha, nje-ke batjheba umtjhofotjhofana ngakiso, bawuhlomela elithini lehisophi, balisa emlonyenakhe.

³⁰ Kwathi bona uJesu amukele isibharha, wathi: “Sekuphethekile!” Wakhothamisa ihloko, wafa.

³¹ Bekulilanga lokulungiselela begodu nelanga elilandelako bekuzokuba liSabatha elikhethekileko. Nje-ke ngebanga lokobana amaJuda bekangafuni bona iindumbu ziliselelwe esiphambanweni ngeSabatha, abawa uPilatu bona abavumele bephule imilenze yamadoda abethelweko, behlise neendumbu zabo.

³² Yeke amajoni eza, ephula imilenze yendoda yokuthoma neyesibili egade ibethelwe noJesu.

³³ Kodwana kwathi lokha nafika kuJesu, amfumana sele afile. Yeke azange asaphula imilenzakhe.

³⁴ Kunalokho omunye wamajoni wagwaza ihlangothi lakhe ngomkhonto, khonokho kwaphuma iingazi namanzi.

³⁵ Loyo owabona lokhu kusenzeka ufakazile, nobufakazi bakhe buliqiniso, begodu uyazi bona ufakaza iqiniso.

³⁶ Lokhu kwenzeka khona kuzakuzaliseka imitlolo ethi: “Alikho nalinye ithambo lakhe elizakwephulwa.”

³⁷ Kukhona omunye umtlolo othi: “Abantu bazamqala loyo abamgwazileko.”

Ukubulungwa kwakaJesu

³⁸ Ngemva kwalokho, uJosefa we-Arimathiya, ogade amlandeli kaJesu ngasese ngombana esaba amaJuda, wabawa isidumbu sakaJesu kuPilatu. UPilatu wamvumela, yeke uJosefa wakhamba wayokususa isidumbu.

³⁹ Bekaphekelelwa nguNikhodemusi, umuntu owakhe weza azokubona uJesu ebusuku. UNikhodemusi lo, gade eze aphethe amakhilogramu amatjhumi amathathu weenthako zamakha wemire nomarobazibukhali.

⁴⁰ Amadoda amabili la awuthatha umzimba kaJesu awuphuthela ngetjhila lelineni awuzesa ngamakha njengendlela yesiko lamaJuda lokungcwaba.

⁴¹ Endaweni lapho uJesu bekabethelwe khona esiphambanweni bekukhona isimu; ngesiminapho bekukhona ithuna elitjha elingazange khelibulungele.

⁴² Njengombana bekulilanga lokuzilungiselela kwamaJuda mayelana neSabatha, nethuna liseduze, bathuna umzimba kaJesu lapho.