UJWANISI 18 - IsiNdebele 2012 Translation

Ukubotjhwa kwakaJesu

¹ Ngemva kobana uJesu selathandazile, wakhamba nabafundi bakhe wayamela ngaphetjheya komlanjana iKedroni endaweni lapha bekunesimu khona. Yena nabafundi bakhe bangena kiyo.

² UJudasi owamkhaphelako gade ayazi indawo leyo ngombana kanengi uJesu gade ahlanganela lapho nabafundi bakhe.

³ Yeke uJudasi weza esimini, akhamba namabutho wamajoni nezinye zeenkhulu zabaphristi abakhulu nabaFarisi. Bebahlomile baphethe iinhlothi ezivutako, iimbani neenkhali.

⁴ UJesu selasazi koke okuzokwenzeka kuye waphuma waya kibo wababuza wathi: “Nifuna bani na?”

⁵ Bamphendula bathi: “UJesu weNazaretha.” UJesu wathi kibo: “Nginguye.” UJudasi owamkhaphelako gade ajame nabo lapho.

⁶ Lokha uJesu nasithi kibo, “Nginguye” babuyela sinyovana baduleka phasi.

⁷ UJesu wababuza godu wathi: “Nifuna bani na?” Baphendula bathi: “UJesu weNazaretha.”

⁸ UJesu wabaphendula wathi: “Senginitjelile bona nginguye, yeke nangabe nifuna mina, abanye laba abakhambe-ke.”

⁹ Lokhu bekukuzaliseka kwelizwi alitjhwileko lokuthi: “Angikalahlekelwa nangoyedwa kilabo ongiphe bona.”

¹⁰ USimoni Pitrosi ogade anesabula, wayirhwatjhula wasusa indlebe yangesigomeni yekhoboka lomphristi omkhulu. Ibizo lekhobokelo bekunguMalirhusi.

¹¹ Yeke uJesu wathi kuPitrosi: “Buyisela isabulakho endawenayo! Kanti angizuyisela ikapho engiyinikelwe nguBaba na?”

UJesu phambi ko-Anasi

¹² Yeke ibutho lamajoni neenduna zalo kanye neenkhulu zamaJuda babamba uJesu bambopha;

¹³ bamusa qangi ku-Anasi ogade ongumkhwe kaKhayafasi obegade amphristi omkhulu umnyaka lowo.

¹⁴ Nguye uKhayafasi owaluleka amaJuda bonyana bekungaba ngcono kufe umuntu oyedwa afele boke abantu.

UPitrosi ulandula uJesu

¹⁵ USimoni Pitrosi nomunye umfundi bebalandela uJesu. Ngebanga lokobana umfundi loyo gade aziwa mphristi omkhulu, wangena noJesu ngesirhodlweni somphristi omkhulu,

¹⁶ uPitrosi yena wasala ngaphandle esangweni. Umfundi obegade asaziwa mphristi omkhulu loyo wabuyela ngaphandle, wakhuluma nomntazana omlindi esangweni, wangenisa uPitrosi.

¹⁷ Umntazana omlindisango loyo wathi kuPitrosi: “Angithi nawe ungomunye wabafundi bomuntu loya na?” UPitrosi wamphendula wathi: “Angisinguye.”

¹⁸ Gade kumakhaza, yeke iinceku neenkhulu gade ziphembe umlilo ziwuragelele, zisotha. UPitrosi naye bekajame nabo, azothisa.

Umphristi omkhulu ubuza uJesu

¹⁹ Umphristi omkhulu wabuza uJesu ngabafundi bakhe nangefundiso yakhe.

²⁰ UJesu waphendula wathi: “Ephasini bephele ngikhulume emtarini. Ngafundisa ngemasinagogini nangethempelini, lapha woke amaJuda ahlanganela khona. Azange khengitjho ilitho ngasese.

²¹ Alo-ke ubuzelani kimi na? Buza labo abangizwileko, ngineqiniso bayazi engikutjhwileko.”

²² Kuthe bona uJesu atjho lokhu, omunye weenkhulu wamwahla ngepama bewathi kuye: “Leyo yindlela yokuphendula umphristi omkhulu na?”

²³ UJesu waphendula wathi: “Nangabe kukhona okumbi engikukhulumileko, veza ubufakazi balokho. Kodwana nangabe ngikhulume iqiniso, alo, ungibethelani na?”

²⁴ Yeke u-Anasi wamthumela kumphristi omkhulu uKhayafasi, asoloko abotjhiwe njalo.

UPitrosi ulandula uJesu godu

²⁵ Kuthe uPitrosi asajame azothisa njalo, bambuza bathi: “Awusingomunye wabafundi bomuntu loya na?” Yena walandula wathi: “Awa, angisinguye.”

²⁶ Omunye weenceku zomphristi omkhulu, obekasihlobo somuntu uPitrosi amsusa indlebe, wambuza wathi: “Azange khengikubone unaye esimini na?”

²⁷ Godu uPitrosi wabuye walandula; nje-ke khonokho umkukurumbu walila.

UJesu ulethwa phambi koPilatu

²⁸ Nje-ke bakhupha uJesu kuKhayafasi bamusa esigodlweni sombusi wamaRoma. Bekusekuseni ngondi, kodwana bona akhange bangene esigodlwenapho ngombana bebafuna ukuhlala bahlanzekile, khona bazakukghona ukugoma iPhasika.

²⁹ Yeke uPilatu waya kibo ngaphandle wababuza wathi: “Umuntu lo nimthwesa umlandu bani na?”

³⁰ Ipendulwabo yathi: “Besingekhe samletha kuwe nakube azange enze umlandu.”

³¹ UPilatu wathi kibo: “Yeke nina ngokwenu mthatheni niyomgweba ngokomthetho wenu.” AmaJuda aphendula athi: “Asikavunyelwa ukubulala umuntu.”

³² Lokhu kwenzeka ukuze kuzaliseke amezwi akhulunywa nguJesu lokha nabonisa indlela azokufa ngayo.

³³ Nje-ke uPilatu wabuyela ngesigodlweni, wabiza uJesu wambuza wathi: “Uyikosi yamaJuda na?”

³⁴ UJesu wambuza wathi: “Umbuzo lo uvela kuwe, namkha uzwe ngabanye abakutjele ngami na?”

³⁵ UPilatu waphendula wathi: “Udlumbana bona ngiliJuda na? Angitjho babantu bekhenu nabaphristi abakhulu abakuthumele kimi. Wenzeni na?”

³⁶ UJesu wathi: “Umbuswami awusiwo wephaseli; nangabe bewunjalo, iinceku zami gade zizokulwa zivimbele bona ngingabanjwa maJuda. Kodwana umbuswami akusiwo walapha.”

³⁷ UPilatu wambuza wathi: “Alo-ke uyikosi na?” UJesu waphendula wathi: “Utjho khona, ngiyikosi, kuhlekuhle ngabelethelwa lokho begodu kungalokho ngeza ephasinapha ukuze ngifakaze iqiniso. Ngabelethwa, ngeza ephasinapha ukuzokukhuluma ngeqiniso. Boke abaseqinisweni bayalilalela ilizwi lami.”

³⁸ UPilatu wambuza wathi: “Alo-ke liyini iqiniso na?” Ngalokho uPilatu waphuma wabuyela kumaJuda wafese wathi: “Angisifumani isizathu sokumthwesa umlandu.

UJesu ugwetjelwa ukufa

³⁹ Kodwana ngesiko eninalo, phele njalo nginithukululele isibotjhwa ngesikhathi sePhasika. Nifuna bona nginithukululele ikosi yamaJuda na?”

⁴⁰ Bamphendula ngetjhada elikhulu bathi: “Awa, ingasiyena! Sifuna uBharabhasi!” UBharabhasi bekasigebengu.