UJWANISI 17 - IsiNdebele 2012 Translation

UJesu uthandazela abafundi bakhe

¹ Kuthe bona uJesu aqede ukukhuluma lokhu, waqala phezulu ezulwini wathi: “Baba, isikhathi sesifikile; phazimulisa iNdodanakho khona iNdodana izakukuphazimulisa.

² Uyinikele amandla phezu kwawo woke umuntu, khona izakunikela ukuphila okungapheliko kibo boke obaphe yona.

³ Ukuphila okungapheliko ngilokho bona bazi wena wedwa Zimu weqiniso nokwazi uJesu Krestu, omthumileko.

⁴ Ngikuphazimulisile ephasini ngokuqeda umsebenzi onginikele wona bona ngiwenze.

⁵ Kwanjesi Baba, ngiphazimulise phambi kwakho ngephazimulo egade nginayo kuwe iphasi lingakabi ukubakhona.

⁶ “Ngilazisile ibizo lakho kilabo ongiphe bona ephasini. Bebavele bangebakho wangipha bona; begodu balilondile ilizwi lakho.

⁷ Nje-ke bayazi bona koke ongiphe khona kuvela kuwe.

⁸ Ngibaphe umlayezo onginikele wona, bawamukela. Bayazi ngeqiniso bonyana ngivela kuwe, begodu bayakholwa bona ungithumile.

⁹ “Ngiyabathandazela. Angithandazeli iphasi, kodwana labo ongiphe bona ngombana ngebakho.

¹⁰ Koke enginakho ngekwakho nokwakho koke ngekwami. Nje-ke iphazimulwami ibonakaliswe ngabo.

¹¹ Kwanjesi angisesekho ephasini, kodwana bona basesephasini mina sengiza kuwe. Ngalokho Baba oCwengileko, balonde ebizweni lakho, iye, ibizo owangipha lona, khona bazakuba munye njengami nawe.

¹² Lokha nangisesenabo ngibavikele bengabalonda ngebizo lakho owangipha lona. Akakho noyedwa wabo owalahlekako ngaphandle kwaloyo ebekufanele bona alahleke, khona kuzakuzaliseka imitlolo.

¹³ “Kwanjesi sengisiza kuwe, kodwana ngikhuluma lokhu ngisesephasinapha khona bazakuba nethabo lami elipheleleko ngaphakathi kwabo.

¹⁴ Ngibanikele ilizwi lakho, iphasi labahloya ngombana abasese ngebephasi njengombana nami ngingasi ngewephasi.

¹⁵ Angikubawi bona ubasuse ephasinapha, kodwana bona ubavikele komumbi.

¹⁶ Abasingebephasi njengombana nami ngingasingewephasi.

¹⁷ Bacwengise ngeqiniso; ilizwi lakho liliqiniso.

¹⁸ Njengombana ungithumele ephasini, nami ngibathumela ephasini.

¹⁹ Ngebanga labo ngiyazicwengisa, khona nabo bazakucwengiswa ngeqiniso.

²⁰ “Angithandazeli bona kwaphela, kodwana ngithandazela nalabo abazakukholwa kimi ngebanga lomlayezwabo,

²¹ kobana boke njalo babe munye njengombana nawe Baba ukimi nami ngikuwe. Kwanga nabo bangaba kithi khona iphasi lizakukholwa bona ungithumile.

²² Ngibaphe iphazimulo owanginikela yona khona bazakuba munye njengombana simunye:

²³ Mina ngikibo, wena ukimi. Nje-ke bazakuba munye ngokupheleleko ukuze iphasi lazi bona ungithumile begodu ubathandile njengombana ungithandile mina.

²⁴ “Baba, bengithanda bonyana labo ongiphe bona babe nami lapha ngikhona, khona bazakubona iphazimulwami. Iye, iphazimulo ongiphe yona ngombana wangithanda iphasi lingakabi ukubakhona.

²⁵ Baba olungileko, iphasi akhange likwazi kodwana mina ngikwazile begodu laba bayazi bona ungithumile.

²⁶ Ibizo lakho ngilazisile kibo, ngizasolo ngiraga ngokwenza njalo ukuze ithando onalo kimi libe nakibo nokobana nami ngibe kibo.”