UJWANISI 16 - IsiNdebele 2012 Translation

¹ “Lokho ngikukhulume kini ukuze ningakhubeki.

² Nizakuqotjhwa ngemasinagogini, kodwana kuzakufika isikhathi lapha nanyana ngubani onibulalako azakudlumbana bona usebenzela uZimu.

³ Lokhu bazakwenza kini ngombana bangamazi uBaba nami.

⁴ Kodwana ngikhulume lokhu kini ukuze kuthi isikhathi sabo nasifikako, nikhumbule bona nganitjela izintwezi. “Azange nginitjele lokhu ekuthomeni ngombana gade nginani.

Umsebenzi kaMoya oCwengileko

⁵ Nje-ke kwanjesi ngiya kuye ongithumileko kodwana akakho noyedwa ongibuzako bona ngiyaphi.

⁶ Yeke njengombana sengikhulume izintwezi, iinhliziyo zenu zembethwe lisizi.

⁷ Kodwana nginitjela iqiniso nangithi kunilungele bonyana ngikhambe; nangingakhambiko, uMsizi angekhe eza kini. Kodwana nangikhambako, ngizamthumela kini.

⁸ Begodu nakafikako yena, uzakwembulela iphasi mayelana nesono nokulunga nokugweba:

⁹ Mayelana nesono ngombana bangakholwa kimi;

¹⁰ mayelana nokulunga ngombana ngiya kuBaba angekhe nisangibona;

¹¹ mayelana nokugweba ngombana umbusi wephaseli selagwetjiwe.

¹² “Ngisenokunengi engifuna ukunitjela khona, kodwana angekhe nikwazi ukukuthwala kwanjesi.

¹³ Kodwana kuzakuthi lokha uMoya weqiniso nasele afikile, uzanidosela kilo loke iqiniso ngombana akakazokukhuluma okungekwakhe, kodwana uzakukhuluma lokho akuzwako, anibikele nangalokho okuzako.

¹⁴ Uyongiphazimulisa ngombana uzokuthatha okwami anazise khona.

¹⁵ Koke uBaba anakho kungekwami, ngikho lokhu ngithe uzakuthatha kokwami anibikele khona.”

Isizi nethabo

¹⁶ “Kuzakuba sikhatjhana ningangiboni; kuthi isikhatjhana ningibone godu.”

¹⁷ Abanye babafundi bakhe babuzana bathi: “Utjho ukuthini nakathi, ‘Kuzakuba sikhatjhana ningangiboni; kuthi isikhatjhana ningibone godu’ nokuthi, ‘Ngombana ngiya kuBaba’ na?”

¹⁸ Ngalokho bebabuza basithi: “Kutjho ukuthini ukuthi isikhatjhana na? Asazi thina bona ukhuluma ngani!”

¹⁹ UJesu bekasazi bona bafuna ukumbuza, yeke wathi kibo: “Nibuzana bona ngitjho ukuthini nangithi, ‘Kuzakuba sikhatjhana ningangiboni; kuthi isikhatjhana ningibone godu?’

²⁰ Kwamambala ngiqinisile ngithi kini: Nizakulila nibibitheke, kodwana iphasi lizakuthaba. Nina nizakuba lisizi kodwana isizi lenu lizakuphenduka ukuthaba.

²¹ Umfazi nasele atjhidele ukubeletha, uzwa iinhlungu ngombana isikhathi sakhe vane sesifikile; kodwana umntwana nasele abelethiwe akasakhumbuli ubuhlungu ngombana sekubelethwe umntwana ephasini.

²² Kunjalo-ke nangani: Kwanjesi nilisizi, kodwana ngizakubuye nginibone godu, ihliziywenu ithabe; nethabelo angekhe lathathwa mumuntu kini.

²³ “Mhlokho angekhe nabawa ilitho kimi. Kwamambala ngiqinisile ngithi kini: UBaba uzanipha nanyana yini enizayibawa ngebizo lami.

²⁴ Kufikela njesi anikabawi ilitho ebizweni lami. Bawani nizakuphiwa khona kuzakuzala ithabo lenu.”

Ngilahlule iphasi

²⁵ “Ngikhulume kini ngemifanekiso. Siyeza isikhathi lapha ngingasazukukhuluma ngemifanekiso, kodwana ngizakukhuluma ngoBaba kukhanye.

²⁶ Mhlokho nizakubawa ebizweni lami, angitjho bona ngiyonibawela mina kuBaba.

²⁷ Ngombana uBaba ngekwakhe uyanithanda ngombana nani ningithandile benakholwa bona ngivela kuZimu.

²⁸ Ngavela kuBaba, ngeza ephasinapha; kwanjesi ngitjhiya iphasi ngiya kuBaba.”

²⁹ Yeke abafundi bakhe bathi kuye: “Kwanjesi sewukhuluma kuzwakale ingasi ngokufanekisa.

³⁰ Siyazi kwanjesi bonyana wazi koke, awufuni omunye ongakubuza imibuzo. Lokhu kusenza sikholwe bona uvela kuZimu.”

³¹ UJesu wabaphendula wathi: “Niyakholwa kwanjesi na?

³² Isikhathi siyeza, sebesilapha, lapha noke nje nizakurhatjheka khona, omunye nomunye aye kwakhe mina ngisale ngingedwa. Nokho angisingedwa ngombana uBaba unami.

³³ Nginitjele izintwezi, khona nizakuba nokuthula kimi. Ephasinapha nizakuhlupheka, kodwana yibani nesibindi iphasi ngilahlulile!”