UJWANISI 15 - IsiNdebele 2012 Translation

UJesu usidiribe samambala

¹ “Mina ngisidiribe samambala, uBaba mlimi.

² Ususa kimi yoke ipande engatheliko, kuthi leyo naleyo ipande ethelako ayihlunge khona izakuthela khulu.

³ Senihlambulukile ngelizwi engilikhulume kini.

⁴ Hlalani kimi, nami ngizakuhlala kini. Njengombana ipande angekhe yathela ngokwayo kwaphela nayihlezi esidiribeni sayo. Kunjalo-ke nani angekhe nathela naningakahlali kimi.

⁵ “Mina ngisidiribe, nina niziimpande. Ohlala kimi, nami ngihlala kuye, loyo-ke uzakuthela khulu ngombana ngaphandle kwami angekhe nenze ilitho.

⁶ Loyo ongahlali kimi uzakulahlwa njengepande, ome; iimpande ezinjalo ziyabuthelelwa ziphoswe ngemlilweni, zitjhiswe.

⁷ Nanihlala kimi namezwami ahlala kini, nizakubawa nanyana yini enikufunako, nizakwenzelwa.

⁸ UBaba uphazimuliswa kuthela kwenu iinthelo ezinengi, khona nizakuba bafundi bami.

⁹ Nginithande njengombana uBaba angithandile; nje-ke hlalani ethandweni lami.

¹⁰ Nanilonda imiyalwami, nizakuhlala ethandweni lami njengombana nami ngilonde imiyalo kaBaba ngahlala ethandweni lakhe.

¹¹ “Nginitjele lokhu ukuze ukuthaba kwami kube kini nokobana ukuthaba kwenu kuphelele.

¹² Umyalwami ngilo: Thandanani njengombana nami nginithandile.

¹³ Ithando elikhulu umuntu angaba nalo kudela ipilwakhe ngebanga labangani bakhe.

¹⁴ Niziinini zami nanenza lokho enginiyala ngakho.

¹⁵ Anginibizi godu bona niziinceku ngombana inceku ayazi bona ikosayo yenzani. Nina nginibiza bona nibangani ngombana nginazise koke engikuzwe kuBaba.

¹⁶ Azange ningikhethe nina, kodwana mina ngikhethe nina. Nganikhetha bona niyokuthela iinthelo nokobana iinthelwezo zihlale ukuze nanyana yini eniyibawa ngebizo lami uBaba aninikele yona.

¹⁷ Nginiyala ngezintwezi kobana nithandane.”

Nizakuhloywa ephasinapha

¹⁸ “Nangabe iphasi liyanihloya, yazini bona lihloye mina qangi.

¹⁹ Nangabe beningebephasi, iphasi belizanithanda njengabalo. Kodwana nginikhethe kilo iphasi, anisingebalo; ngikho iphaseli linihloyile nje.

²⁰ Khumbulani ilizwi engilikhulume kini nangithi, ‘Ayikho inceku ekulu kunekosayo.’ Nakube mina bangizumile, nani bazonizuma. Nangabe balonde ilizwi lami nelenu bazalilonda.

²¹ Kodwana bazakwenza zoke izintwezi kini ngombana ningebami nangebanga lokobana bangakhange bamazi ongithumileko.

²² Ngathana azange ngize ngikhulume nabo, ngabe banganaso isono; kodwana manje abasenayo incancabe ngesono sabo.

²³ Ohloye mina uhloye noBaba godu.

²⁴ Ingathana azange ngenze hlangana nabo iimangaliso ezingazange zenziwe mumuntu omunye, bebangekhe babe nomlandu wesono. Kodwana gadesi sebabonile engikwenzileko, bangihloyile mina noBaba.

²⁵ Lokhu kuzaliseka ilizwi elitlolwe emthethwenabo othi, ‘Bangihloye kunganasizathu.’

²⁶ “Lokha nasele afikile uMsizi, engizamthumela abuya kuBaba, uMoya weqiniso ovela kuBaba, uzokufakaza ngami.

²⁷ Nani godu nizakufakaza ngombana gade ninami kusukela ekuthomeni.”