UJWANISI 14 - IsiNdebele 2012 Translation

UJesu uyindlela eya kuBaba

¹ “Iinhliziyo zenu azingakhathazeki. Kholwani kuZimu, nikholwe nakimi.

² Kukhona iinkumba ezinengi ekhaya lakaBaba, nakube bekungasi njalo, ngabe nginitjelile. Nje-ke ngiyakhamba ngiyonilungisela indawo.

³ Nasele ngikhambile nginilungisele indawo, ngizakubuya ngizonithatha, khona nizakuba lapho ngikhona.

⁴ Niyayazi indlela enqophe endaweni lapha ngiya khona.”

⁵ UTomasi wathi kuye: “Kosi, asazi lapha uya khona, alo-ke singayazi njani indlela eya lapho na?”

⁶ UJesu wamphendula wathi: “Mina ngiyindlela, iqiniso nokuphila; akakho noyedwa ozakuya kuBaba ngaphandle kwami.

⁷ Nakube beningazi mina benizamazi noBaba; kusukela khona gadesi niyamazi, begodu nimbonile.”

⁸ UFlebhe wathi kuye: “Kosi, sibonisa uBaba lokho kuzabe kusanele.”

⁹ UJesu waphendula wathi: “Isikhathi eside benginani Flebhe, utjho bona awungazi na? Loyo ongibonileko, ubone uBaba. Utjho njani bona, ‘Sikhombisa uBaba’ na?

¹⁰ Awukholwa bona ngikuBaba noBaba ukimi na? Amezwi engiwakhuluma kini akusiwo engizikhulumela wona ngokwami. Kodwana nguBaba ohlezi kimi owenza umsebenzakhe.

¹¹ Ngikholwani nangithi ngikuBaba noBaba ukimi. Nakungasinjalo, kholwani imisebenzi engiyenzako ngokwayo.

¹² Kwamambala ngiqinisile ngithi kini: Loyo okholwa kimi, uzakwenza lokho engikwenzako. Iye, uzakwenza ngitjho izinto ezikulu kunalezi ngombana ngiya kuBaba.

¹³ Ngizakwenza koke enikubawako ngebizo lami ukuze uBaba aphazimuliswe ngeNdodana.

¹⁴ Nanibawa nanyana yini ngebizo lami, ngizayenza.”

Isithembiso ngoMoya oCwengileko

¹⁵ “Naningithandako, nizakulonda imiyalwami.

¹⁶ Ngizakubawa uBaba, uzanipha omunye uMsizi, ozokuhlala nani nini nanini;

¹⁷ ngitjho uMoya weqiniso, iphasi engekhe lamamukela ngombana lingamboni befuthi lingamazi. Kodwana nina niyamazi ngombana uhlala nani begodu ukini.

¹⁸ “Angekhe nginitjhiye niziintandani, ngizakuza kini.

¹⁹ Kungakabi sikhathi eside, iphasi angekhe lisangibona, kodwana nina nizangibona ngombana mina ngiyaphila nani niyokuphila.

²⁰ Mhlokho, nizakulemuka bona ngikuBaba nani nikimi, nami ngikini.

²¹ “Loyo owamukela imiyalwami ayenze, ngongithandako-ke loyo. Ongithandako uzakuthandwa nguBaba, nami ngizamthanda bengizibonakalise kuye.”

²² UJudasi, (ingasi uJudasi Iskariyodi), wathi: “Kosi, kubayini unqophe ukuzibonakalisa kithi ingasi ephasini na?”

²³ UJesu wamphendula wathi: “Loyo ongithandako uzakuhlonipha ifundiswami. UBaba uzamthanda, begodu sizakuza kuye sihlale naye.

²⁴ Ongangithandiko akahloniphi ifundiswami. Ilizwi enilizwilekweli akusilo lami, kodwana ngelakaBaba ongithumileko.

²⁵ “Ngikhulume koke lokho ngisesenani.

²⁶ UMsizi, uMoya oCwengileko, uBaba azamthumela ngebizo lami, uzanifundisa yoke into anikhumbuze koke enginitjele khona.

²⁷ “Ukuthula ngikutjhiya nani. Ukuthula kwami ngininikela khona. Angininikeli khona njengombana iphasi lisenza. Ningavumeli iinhliziyo zenu zitshwenyeke begodu ningesabi.

²⁸ Ningizwile ngisithi kini, ‘Ngiyakhamba kodwana ngizakubuya kini.’ Ngathana beningithanda, benizokuthaba bona ngiya kuBaba ngombana uBaba mkhulu kunami.

²⁹ Nginitjelile lokhu ngaphambi kobana kwenzeke, khona kuzakuthi nakwenzekako, nikholwe.

³⁰ Angisakwazi ukukhuluma nani isikhathi eside ngombana umbusi wephaseli selasiza. Akanawo amandla kimi.

³¹ Kodwana iphasi lifanele ukwazi bona ngiyamthanda uBaba nokobana ngenza poro njengombana uBaba angiyalile. “Sikimani, sikhambeni lapha.”