UJWANISI 13 - IsiNdebele 2012 Translation

UJesu uhlamba iinyawo zabafundi bakhe

¹ Bekungaphambi komnyanya wePhasika, uJesu asazi bona isikhathi sakhe sesifikile sokutjhiya iphaseli aye kuYise. Bekabathandile ekungebakhe abasephasinapha, wabathanda bekwaba sekupheleni.

² UJesu nabafundi bakhe gade basesilalelweni, uSathana besele afake ehliziyweni kaJudasi indodana kaSimoni Iskariyodi bona akhaphele uJesu.

³ UJesu bekazi bonyana uYise ubeke zoke izinto emandlenakhe; bekasazi nokobana ubuya kuZimu begodu ubuyela kuZimu.

⁴ Yeke wasikima ekudleni, wahlubula isambatho sakhe, wazisonga ngethawula edinini.

⁵ Wathela amanzi ngesitjeni wathoma ukuhlamba iinyawo zabafundi bakhe, wazomisa ngethawula egade isedinini lakhe.

⁶ Weza kuSimoni Pitrosi, owathi kuye: “Uzokuhlamba iinyawo zami, Kosi, na?”

⁷ UJesu waphendula wathi: “Okwagadesi awukabi ukwazi engikwenzako, kodwana uzakulemuka muva.”

⁸ UPitrosi wathi: “Angekhe walinga nanini uhlambe iinyawo zami!” UJesu wamphendula wathi: “Nangingekhe ngahlamba iinyawo zakho, khona awunabudlelwano nami.”

⁹ USimoni Pitrosi waphendula wathi: “Kosi, yeke ungahlambi iinyawo zami kwaphela, kodwana izandla nehlokwami!”

¹⁰ UJesu wathi: “Okhe wahlamba umzimba, uhlanzekile umzimba woke, yeke akusafuneki bona ahlambe ngaphandle kweenyawo zakhe kwaphela. Nje-ke nina nihlanzekile kodwana ingasi noke.”

¹¹ UJesu gade asele asazi bona ngubani ozomthengisa, kungalokho bekathe: “Anikahlambuluki noke.”

¹² Ngemva kobana ahlambe iinyawo zabo, wembatha isambatho sakhe wabuyela endawenakhe etafuleni, wababuza wathi: “Niyalemuka engikwenzileko kini na?

¹³ Ningibiza ngokuthi, ‘Mfundisi namkha Kosi!’, kulungile lokho ngombana ngilokho engingikho.

¹⁴ Njengombana mina Kosi noMfundisenu, ngihlambe iinyawo zenu, nani kufuze nihlambe iinyawo zomunye nomunye.

¹⁵ Nginenzele isibonelo sokobana nani kufuze nenze njengombana ngenze kini.

¹⁶ Kwamambala ngiqinisile ngithi kini: Ayikho inceku ekulu kunekosayo, akakho nomzenda omkhulu kunaloyo omthumileko.

¹⁷ Njengombana senazi izintwezi, nizakubusiswa nanizenzako.

¹⁸ “Angikhulumi ngani noke; ngiyabazi labo engibakhethileko. Kodwana kufanele kuzaliseke imitlolo ethi, “ ‘Iye, loyo onghwatha nami ungiphendukele waba mkhapheli.’

¹⁹ “Nginitjela kwanje ngaphambi kobana kwenzeke, khona kuzakuthi nakwenzekako nikholwe bona nginguye.

²⁰ Kwamambala ngiqinisile ngithi kini: Owamukela engimthumileko wamukela mina; owamukela mina wamukela loyo ongithumileko.”

UJesu ubonisa ngokukhatjhelwa kwakhe

²¹ Emva kobana atjho lokhu, uJesu watshwenyeka khulu emmoyeni wathi: “Kwamambala ngiqinisile ngithi kini: Omunye wenu uzongikhaphela emanabeni.”

²² Abafundi baqalana, barareka bona utjho bani.

²³ Omunye wabo omfundi uJesu agade amthanda, bekazeyame ngaye.

²⁴ USimoni Pitrosi wamkhweba wathi: “Mbuze bona ukhuluma ngobani.”

²⁵ Yeke umfundi loyo wasusa ihlokwake kuJesu, wabuza wathi: “Ngubani loyo, Kosi na?”

²⁶ UJesu waphendula wathi: “Ngiloyo engizamnikela igedzwana lesikwa ngemva kobana ngilitjhebe ngesitjeni.” Yeke watjheba igedzwana lesikwa, walinikela uJudasi umsa kaSimoni Iskariyodi.

²⁷ Msinyana emva kobana uJudasi athathe isikwa, uSathana wangena kuye. UJesu wathi kuye: “Kwenze msinyana ofuna ukukwenza.”

²⁸ Akakho noyedwa wabo obekasetafuleni ogade asazi bona bekakutjhwelani lokhu kuye.

²⁹ Njengombana uJudasi gade amlondisikhwama semali, abanye abafundi badlumbana bona uJesu bekamtjela bona akayokuthenga abakufunela umnyanya, namkha abele abadududu.

³⁰ Sele amukele isikwa uJudasi, khonokho waphumela ngaphandle; bekusebusuku.

Umyalo omutjha

³¹ Kwathi bona akhambe, uJesu wathi: “Kwanjesi-ke iNdodana yoMuntu iphazimulisiwe noZimu uphazimulisiwe ngayo.

³² Nangabe uZimu uphazimulisiwe kiyo, khona uZimu uzakuphazimulisa iNdodana kuye, begodu lokho uzakwenza msinyana.

³³ Bantwabami, ngizokuba nani isikhatjhana esincani kwaphela. Nizangifuna, njengombana ngatjho kumaJuda bona lapho ngiya khona angeze eza wona, ngitjho njalo nakini.

³⁴ “Nginipha umyalo omutjha ngithi: Thandanani. Njengombana nginithandile, nje-ke nani nifanele ukuthandana.

³⁵ Ngalokhu boke abantu bazakwazi bona nibafundi bami, nanithandanako.”

UJesu ubonisa ukuphikwa nguPitrosi

³⁶ USimoni Pitrosi wambuza wathi: “Kosi, kanti uya kuphi?” UJesu wamphendula wathi: “Angekhe wangilandela lapha ngiyako khona nje, kodwana uzangilandela kamva.”

³⁷ UPitrosi wambuza godu wathi: “Kosi, kungani ngingeze ngakulandela khona nje na? Sengikubhincele ukudela ukuphila kwami ngebanga lakho.”

³⁸ UJesu waphendula wathi: “Kungabe uqinisile bona sewubhincele ukudela ukuphila kwakho ngebanga lami na? Kwamambala ngiqinisile ngithi kuwe: Umkukurumbu ungakalili, uzabe sele ungiphike kathathu.”