UJWANISI 12 - IsiNdebele 2012 Translation

UJesu uzeswa ngamafutha eBhethaniya

¹ Sekusele amalanga amathandathu ngaphambi kwePhasika, uJesu weza eBhethaniya ekhabo lakaLazaru, umuntu amvusa ekufeni.

² Lapho-ke bebamlungisele ukudla. UMarta gade atinazela aphakulula, uLazaru yena angomunye wabahlezi noJesu etafuleni.

³ Yeke uMariya wathatha isithaba samafutha abizako wenaridi, wazesa iinyawo zakaJesu, wesula ngeenhluthu zakhe. Iphunga elinuka kamnandi lamafutha lazala ikumba yoke.

⁴ Omunye wabafundi bakaJesu uJudasi Iskariyodi, loyo ogade azomkhaphela, wathi:

⁵ “Kungebanga lani amafutha la angakathengiswa, kuthi imali leyo yabelwe abadududu na?”

⁶ Wakutjho lokho ingasibona uzwela abadududu, kodwana gade alisela, njengombana gade amlondisikhwama nje bephele ebe okungaphakathi.

⁷ Kodwana uJesu wathi: “Mlise, alondele amafutha la ilanga lokuthunwa kwami.

⁸ Abadududu nizakuhlala njalo ninabo, kodwana mina angekhe nihlale ninami.”

Basongela uLazaru

⁹ Isiqubuthu samaJuda sezwa bona uJesu useBhethaniya, yeke seza lapho. Bekungasingebanga lakhe kwaphela kodwana nokuzokubona uLazaru obegade amvuse ekufeni.

¹⁰ Nje-ke abaphristi abakhulu baluka amano wokubulala noLazaru

¹¹ ngombana ngebanga lakhe amaJuda amanengi asuka kibo akholwa kuJesu.

UJesu ungena eJerusalema ngedumo

¹² Ngelanga elilandelako isiqubuthu ebesize emnyanyeni wePhasika sezwa bona uJesu usendleleni uza eJerusalema.

¹³ Sathatha amahlahla womuthi wesundu saphuma sayomhlangabeza sarhuwelela, sathi: “Dumisani uZimu! Ubusisiwe ozako ebizweni lakaSomnini! Iye, ibusisiwe iKosi yakwa-Israyeli!”

¹⁴ UJesu wafumana udumbana, wamkhwela njengombana imitlolo isithi:

¹⁵ “Ungesabi, ndodakazi yeZiyoni! Nasi iKosakho isiza, ikhwele udumbana osemutjha.”

¹⁶ Abafundi bakhe azange bakuzwisise lokhu ekuthomeni; kwaba ngemva kokuphazimuliswa kwakaJesu lapha balemuka khona bona izintwezi bezitlolwe ngaye nokobana benze izintwezi kuye.

¹⁷ Nje-ke isiqubuthu ebesinaye lokha nabiza uLazaru bona aphume ngelibeni amvusa ekufeni, saragela phambili nokusabalalisa ilizwi.

¹⁸ Godu kwaba ngebanga lokobana besele bezwile bonyana wenze isimangaliswesi ukuze bamhlangabeze.

¹⁹ Yeke abaFarisi bathi omunye komunye: “Niyabona bonyana asiyindawo na? Qalani, loke iphaseli liyamlandela!”

AmaGirigi athileko afuna uJesu

²⁰ Bekukhona amaGirigi athileko hlangana nalabo egade baye eJerusalema ukuyokulotjha emnyanyeni.

²¹ Baya kuFlebhe, obekavela eBhethe-Sayida ngeGalile, bathi: “Mnimzana, sibawa ukubona uJesu.”

²² UFlebhe wayokutjela u-Andrisi, bobabili baya kuJesu.

²³ UJesu wabaphendula wathi: “Isikhathi sesifikile bona iNdodana yoMuntu iphazimuliswe.

²⁴ Kwamambala ngiqinisile ngithi kini: Lokha ithoro yekoroyi iwela equlwanini ingafi, ihlala injalo. Kodwana nangabe iyafa, ihloma iinthelo ezinengi.

²⁵ Loyo othanda ipilwakhe, izomlahlekela; loyo ohloya ipilwakhe ephasineli, uzayilondela ukuphila okungapheliko.

²⁶ Nanyana ngubani oyincekwami kufuze angilandele; nalapho ngikhona nencekwami izakubakhona. UBaba uzamdumisa umuntu oyincekwami.”

UJesu ukhuluma ngokufa kwakhe

²⁷ “Nje-ke ihliziywami itshwenyekile, alo ngingathini na? Kghani ngithi, ‘Baba, ngisindise esikhathinesi’? Awa, kungesizathwesi kobana ngize esikhathinesi.

²⁸ Baba, phazimulisa ibizo lakho!” Yeke kwafika ilizwi livela ezulwini lisithi: “Sengiliphazimulisile; ngisazaliphazimulisa godu.”

²⁹ Isiqubuthu ebesijame lapho sakuzwa lokho sathi beliduma, abanye bathi ingilozi beyikhuluma naye.

³⁰ UJesu wathi kibo: “Ilizweli lize ngebanga lenu kungasi ngenca yami.

³¹ Kwanjesi sekusikhathi bona iphaseli ligwetjwe; nje-ke umphathi wephaseli uzokuqotjhelwa ngaphandle.

³² Lokha nangiphakanyiswako mina ephasini, ngizakudosela woke umuntu kimi.”

³³ Wakutjho lokho abonisa indlela azokufa ngayo.

³⁴ Isiqubuthu saphendula sathi: “Sizwile emthethweni bona uKrestu uzakuphila ngokungapheliko. Alo-ke ungatjho njani bona iNdodana yoMuntu kufanele iphakanyiswe na? Kwakhona ingubani iNdondana yomuntu le na?”

³⁵ UJesu wathi kibo: “Umkhanyo usazakuba nani isikhatjhana nje. Yeke khambani nisesenomkhanyo, ubumnyama bungakabi ukunehlela. Umuntu okhamba ebumnyameni, akaboni lapha ayakhona.

³⁶ Kholwani emkhanyweni, ikani nisesenawo, khona nizakuba bantwana bomkhanyo.” UJesu selaqedile ukukhuluma, wakhamba wayozifihla.

Ukungakholwa kwamaJuda

³⁷ Kwathi nanyana uJesu enze zoke iimbonakaliso zeemangaliswezi phambi kwabo, azange bamkholwe.

³⁸ Lokho bekukuzalisa ilizwi lomphorofidi u-Isaya nakasithi: “Somnini, ngubani owakholwa ngesikuzwileko na? Ingalo kaSomnini yembulelwe bani na?”

³⁹ Nje-ke azange bakholwe ngombana u-Isaya wathi godu:

⁴⁰ “Yenza iinhliziyo zabantwaba ziyathe, neendlebe zabo zibe buthuntu, uphophaze namehlwabo, ukuze bangaboni ngawo, bezwe ngeendlebe zabo, balemuke ngeenhliziyo zabo, bebaphenduke bese bayaphiliswa.”

⁴¹ U-Isaya watjho lokhu ngombana bekabone iphazimulo kaJesu bewakhuluma ngaye.

⁴² Nanyana kunjalo abanengi ngitjho neemphathimandla zakholwa kuJesu. Kodwana ngebanga labaFarisi azange bakhulume ngaye pha ngombana bebesaba bonyana bebangaqotjhwa ngesinagogini;

⁴³ iye, bebesaba ngombana bebathanda ukudunyiswa babantu kunokudunyiswa nguZimu.

Abantu bayokugwetjwa ngamezwi kaJesu

⁴⁴ Nje-ke uJesu wamemeza wathi: “Loyo okholwa kimi, akakholwa kimi kwaphela, kodwana ukholwa nakiloyo ongithumileko.

⁴⁵ Obona mina, ubona ongithumileko.

⁴⁶ Ngize ephasinapha njengomkhanyo, khona kuzakuthi woke okholwa kimi angahlali ebumnyameni.

⁴⁷ Umuntu ozwa amezwami angawalondi, angimgwebi mina ngombana angikazeli ukugweba iphaseli, kodwana ukulisindisa.

⁴⁸ Kukhona umgwebi waloyo ongininako ongamukeli amezwami. Lona ilizweli engilikhulumileko lizamgweba ngomhla wokuphela!

⁴⁹ Angikakhulumi okungekwami, kodwana uBaba ongithumileko nguye ongiyale bona ngikhulume ini nokuthi ngikhulume njani.

⁵⁰ Ngiyazi bona umyalwakhe urholela epilweni engapheliko. Yeke nanyana yini engikutjhoko, ngilokho uBaba angitjele bona ngikutjho.”