UJWANISI 11 - IsiNdebele 2012 Translation

Ukufa kwakaLazaru

¹ Umuntu okuthiwa nguLazaru begade agula. Yena bekungeweBhethaniya, umuzi wekhabo lakaMariya nodadwabo uMarta.

² UMariya ogade agulelwa ngumnakwabo lo, ngiloyo owathela iKosi ngamakha eenyaweni bewazisula ngeenhluthu zakhe.

³ Nje-ke abodadwabo bathumela ilizwi kuJesu bathi: “Kosi, loyo omthandako uyagula.”

⁴ UJesu sele akuzwile lokho, wathi: “Isiphetho sokugulokhu ayizukuba kukufa; kunalokho kuzokuletha iphazimulo kuZimu, khona iNdodana kaZimu izakudunyiswa ngakho.”

⁵ UJesu bekathanda uMarta nodadwabo kanye noLazaru.

⁶ Kwathi bona ezwe bonyana uLazaru uyagula, wahlala lapha gade akhona amalanga amanye amabili godu.

⁷ Yeke wathi ebafundini bakhe: “Asikhambeni sibuyele eJudiya.”

⁸ Abafundi bamphendula bathi: “Mfundisi, isikhatjhana esifitjhani esidlulileko amaJuda gade afuna ukukukhanda ngamatje, alo-ke ubhincela ukubuyela emuva godu na?”

⁹ UJesu wathi: “Angithi ilanga linama-awara alitjhumi nambili na? Nje-ke loyo okhamba emini, akazukukhutjwa ngombana uyawubona umkhanyo wephaseli.

¹⁰ Kodwana okhamba ebusuku uyakhutjwa ngombana akanawo umkhanyo.”

¹¹ UJesu watjho lokhu, godu wangezelela wathi: “Umnganethu uLazaru ulele, kodwana ngizakukhamba ngiyomvusa.”

¹² Abafundi bamphendula bathi: “Kosi, nangabe ulele, uzakuphola.”

¹³ UJesu bekasitjho bona uLazaru uhlongekile. Kodwana bebadlumbana bona utjho ukulala ubuthongo.

¹⁴ Yeke uJesu wabatjela pha wathi: “ULazaru ufile.

¹⁵ Kodwana ngebanga lenu ngithabile ngombana bengingekho lapho khona nizakukholwa. Yeke asikhambeni siye kuye.”

¹⁶ UTomasi obizwa bona nguDidumosi, wathi ebafundini: “Asikhambeni nathi khona sizakufa naye!”

UJesu ukuvuka nokuphila

¹⁷ UJesu wafika, wafumana uLazaru sele anamalanga amane abulungiwe.

¹⁸ IBhethaniya beyingaphasi kwamamayela amabili ukusuka eJerusalema.

¹⁹ AmaJuda amanengi bekeze ukuzokutjhiriya uMarta noMariya ngokufa komfowabo.

²⁰ Kwathi bona uMarta ezwe bona uJesu uyeza, waphuma wayomhlangabeza, kodwana uMariya wahlala ngendlini.

²¹ UMarta wathi kuJesu: “Kosi, ngathana gade ulapha, umfowethu ngangakafi!

²² Kodwana ngiyazi bona uZimu uzakupha nanyana yini oyibawako.”

²³ UJesu wathi kuye: “Umfowenu uzakuvuka aphile godu.”

²⁴ Waphendula wathi: “Ngiyazi uzakuvuka aphile godu ngokuvuka komhla wokuphela.”

²⁵ UJesu wathi kuye: “Ngingukuvuka nokuphila, loyo okholwa kimi uzakuphila, ngitjho nanyana angafa.

²⁶ Naloyo ophilako akholwe kimi angekhe afa nanini. Uyakukholwa lokhu na?”

²⁷ Waphendula wathi: “Iye, Kosi! Ngiyakholwa bona unguKrestu, iNdodana kaZimu, ebekufanele ize ephasini.”

UJesu uyalila

²⁸ Ngemva kobana uMarta atjho lokhu, wabuyela emuva wayokubiza udadwabo uMariya ngasese wathi: “Umfundisi ufikile, uyakufuna.”

²⁹ Kuthe bona uMariya ezwe lokhu, wasuka msinyana waya kuye.

³⁰ UJesu bekangakafiki ngemzini, kodwana bekasesendaweni lapha uMarta amhlangabeze khona.

³¹ AmaJuda agade angendlini noMariya amtjhiriya, amlandela lokha nakayelela ukuphuma kwakhe masinyana. Wona bekadlumbana bona uya elibeni uyokulila khona.

³² Kwathi bona uMariya afike lapha kunoJesu khona ambone, waguqa eenyaweni zakhe wathi: “Kosi, ngathana gade ulapha umfowethu ngangakafi!”

³³ UJesu nakambona alila, namaJuda eze naye nawo alila; ihliziywakhe yakghwatheka wakhathazeka kwamambala.

³⁴ Wabuza wathi: “Nimbulungephi na?” Amphendula athi: “Kosi, yiza uzokubona.”

³⁵ UJesu walila.

³⁶ AmaJuda athi: “Qalani bona ubamthanda kangangani!”

³⁷ Kodwana amanye wawo athi: “Alo, nitjho bona owaphophulula isiphofu ubangekhe avikele umuntu lo bona angafi na?”

UJesu uvusa uLazaru ekufeni

³⁸ UJesu asakhathazeke khulu njalo, wafika elibeni. Gade lilirharha livalwe ngelitje emnyango.

³⁹ UJesu wathi: “Susani ilitje!” UMarta, udadwabo lomufi, waphendula wathi: “Kosi, kuzakuba nephunga elimbi, selanamalanga amane abulungiwe!”

⁴⁰ UJesu wathi kuye: “Azange ngikutjele bona uzakubona iphazimulo kaZimu nawukholwako na?”

⁴¹ Balisusa ilitje. UJesu waqala phezulu wathi: “Ngiyakuthokoza, Baba ngombana ungilalele.

⁴² Ngiyazi bona ungilalela njalo. Kodwana lokhu ngikutjho ngebanga labantu abajame lapha, khona bazakholwa bona ungithumile.”

⁴³ Kwathi bona uJesu atjho lokho, wabiza ngelizwi elikhulu wathi: “Lazaru, phuma!”

⁴⁴ Ofileko waphuma izandla neenyawo zakhe ziphuthelwe ngamatjhila weliba netjhila elimhlophe ebusweni. UJesu wabatjela bona bamtjhaphulule bamlise akhambe.

Basongela uJesu

⁴⁵ AmaJuda amanengi ebekeze kuMariya nakabona lokho uJesu akwenzileko, amkholwa.

⁴⁶ Kodwana amanye abuyela ebaFarisini ayobatjela bona uJesu wenzeni.

⁴⁷ Yeke abaFarisi nabaphristi abakhulu bahlangana nebandla bathi: “Sizakwenza njani na? Qalani zoke iimangaliso umuntu lo azenzako!

⁴⁸ Nasingamlisa aragele phambili enze nje, woke umuntu uzokukholwa kuye. AmaRoma azokuza athathe indawethu le nesizwe sethu!”

⁴⁹ Nje-ke omunye wabo obizwa bona nguKhayafasi, obegade amuphristi omkhulu umnyaka lowo, wathi kibo: “Niziindlhayela kangangani!

⁵⁰ Anilemuki bonyana kungcono kufe umuntu oyedwa afele abantu kunobanyana kurhayilwe soke isizwe na?”

⁵¹ Gade angatjho lokhu ngokwakhe, kodwana njengomphristi omkhulu umnyaka lowo, bekaphorofida bona uJesu uzokufela isizwe samaJuda,

⁵² ingasi isizwe kwaphela kodwana abuthelele ndawonye abantwana abarhatjhekileko bakaZimu.

⁵³ Nje-ke kusukela khona mhlokho benza amaqhinga wokubulala uJesu.

⁵⁴ Ngalokho uJesu azange abe asakhamba umathanda hlangana namaJuda. Kunalokho wazitsomula waya esifundeni esiseduze nerhalawumbeni, emzaneni okuthiwa yi-Efrayimi, lapha ahlala khona nabafundi bakhe.

⁵⁵ Kwathi lokha isikhathi somnyanya wePhasika lamaJuda nasele sitjhidele, abanengi ababuya emaphandleni bakhuphukela eJerusalema kobana bayokuhlanjululwa ngaphambi komnyanya.

⁵⁶ Bebafuna uJesu njengombana bebahlangana ngethempelini, babuzana bathi: “Nibona njani? Nitjho bona angekhe alibhada emnyanyenapha na?”

⁵⁷ Abaphristi abakhulu nabaFarisi benza isimemezelo bona loyo owaziko bona uJesu ukuphi, kufanele abike, khona bazambamba.