UJWANISI 10 - IsiNdebele 2012 Translation

Umfanekiso ngomelusi

¹ “Kwamambala ngiqinisile ngithi kini: Umuntu ongangeni esibayeni sezimvu ngesango, kodwana ongena ngokweqa ngenye indlela, ulisela nomdlelezeli.

² Umuntu ongena ngesango ngumelusi wezimvu.

³ Umlindisango uyamvulela isango nezimvu zakhe ziyalilalela ilizwi lakhe. Ubiza izimvu zakhe ngamabizo azirholele ngaphandle.

⁴ Nasele akhuphele zoke zakhe ngaphandle, ukhamba phambi kwazo, izimvu zakhe zimlandele ngombana ziyalazi ilizwi lakhe.

⁵ Kodwana angekhe zamlandela ezingamaziko; kunalokho zizambalekela loyo ngombana azilazi ilizwi lotjhili.”

⁶ UJesu wabatjela umfanekiso lo, kodwana azange bamlemuke bona bekathini kibo.

UJesu ngumelusi olungileko

⁷ Yeke uJesu wathi godu: “Kwamambala ngiqinisile ngithi kini: Ngilisango lezimvu.

⁸ Boke abafika ngaphambi kwami masela nabadlelezeli, ngalokho izimvu azange zabalalela.

⁹ Mina ngilisango. Ongena ngami uzakusinda; uzakungena aphume afumane idlelo.

¹⁰ Isela liza kwaphela kobana lizokweba, libulale belirhayile. Mina ngize bona zibe nokuphila zibe nakho kuphuphume.

¹¹ “Mina ngingumelusi olungileko. Umelusi olungileko udela ukuphila kwakhe ngebanga lezimvu zakhe.

¹² Oqatjhiweko akasuye umelusi omninizimvu. Uthi nakabona ipisi isiza, asukele izimvu abaleke. Yeke ipisi isahlela umhlambi iwuhlakaze.

¹³ Umuntu oqatjhiweko uyabaleka ngombana uqatjhiwe, begodu akanandaba nezimvu.

¹⁴ “Mina ngingumelusi olungileko, ngiyazazi izimvu zami nazo ziyangazi;

¹⁵ njengombana uBaba uyangazi, nami ngiyamazi uBaba; ngidela ukuphila kwami ngebanga lezimvu.

¹⁶ Nginazo nezinye izimvu ezingasizo zesibayesi. Nazo kufanele ngizilethe. Nazo zizalizwa ilizwi lami, kube mhlambi owodwa nomelusi oyedwa.

¹⁷ “UBaba uyangithanda ngombana nginikela ipilwami ukuze ngiyifumane godu.

¹⁸ Akakho namunye ongangimuka ipilwami. Ngiyinikela mina ngokuthanda kwami. Nginawo amandla wokuyinikela, nginawo amandla wokuyizuza godu. Umyalo lowo ngiwamukele kuBaba.”

¹⁹ Ngamezwi lawo amaJuda ahlukana phakathi godu.

²⁰ Abanengi bawo gade basithi: “Unedimoni! Uyahlanya! Nimlalelelani na?”

²¹ Kodwana abanye bebasithi: “Lawa akusiwo amezwi womuntu onedimoni. Idimoni lingaphophulula abaphopheleko na?”

UJesu uyaninwa

²² Ngesikhatheso kwabakhona umnyanya wokuhlanjululwa kwethempeli eJerusalema. Bekusebusika,

²³ uJesu wakhambakhamba ngemathurini kaSolomoni ngethempelini.

²⁴ Nje-ke amaJuda ambungelela, athi: “Kuzabe bekube kunini usoloko usilibazisa na? Nakube unguKrestu, phuma eqinisweni, usitjele.”

²⁵ UJesu waphendula wathi: “Senginitjelile, kodwana anikholwa. Iimangaliso engizenza ebizweni lakaBaba ziyangifakazela.

²⁶ Kodwana angekhe nakholwa ngombana anisizo izimvu zami.

²⁷ Izimvu zami zizwa ilizwi lami. Ngiyazazi, nazo ziyangilandela.

²⁸ Ngizipha ipilo engapheliko, angekhe zabhubha. Akakho ongazihlwitha esandleni sami.

²⁹ UBaba ongiphe zona mkhulu kunakho koke, akakho ongazihlwitha esandleni sakaBaba.

³⁰ Mina noBaba simunye.”

³¹ Godu amaJuda adobha amatje kobana amkhande.

³² UJesu wathi kiwo: “Nginitjengise iimangaliso ezinengi nezikulu ezivela kuBaba. Alo, ezintwenezo ngiyiphi-ke into enifuna ukungikhandela yona na?”

³³ Bamphendula bathi: “Akusingebanga lento nayinye yalezi esenza sikukhande, kodwana kungebanga lokuhlambalaza ngombana umumuntu nje, nalapho uzenza uZimu!”

³⁴ UJesu waphendula wathi: “Kanti akukatlolwa emthethweni wekhenu ukuthi, ‘Ngathi, nina nibozinyana.’ na?

³⁵ Nakube labo ilizwi lakaZimu elafika kibo babizwa bona ‘bozimu’, nje-ke imitlolo angekhe yaba lilize.

³⁶ Alo, ningatjho bona loyo uBaba amhlukaniseleko wabe wamthuma ephasini uyahlambalaza ngombana ngithe, ‘ngiyiNdodana kaZimu’ na?

³⁷ Nangabe angenzi imisebenzi kaBaba, khona musani ukungikholwa.

³⁸ Kodwana nangabe ngiyayenza, nanyana ningakholwa mina, okungasenani-ke kholwani izenzo, khona nizakwazi benizwisise bonyana uBaba ukimi nami ngikuye.”

³⁹ Godu balinga ukumbamba, kodwana waphunyuka ezandleni zabo.

⁴⁰ Yeke uJesu wabuyela emuva ngaphetjheya kweJordani, endaweni lapha uJwanisi gade abhabhadisela khona, wahlala lapho.

⁴¹ Abanengi beza kuye bathi: “UJwanisi azange akhe enze iimangaliso, kodwana koke akutjhwileko ngomuntu lo, liqiniso.”

⁴² Abanengi lapho bakholwa kuJesu.