UJWANISI 1 - IsiNdebele 2012 Translation

ULizwi waba mumuntu

¹ Ekuthomeni uLizwi bekakhona, uLizwi bekakuZimu, uLizwi bekanguZimu.

² BekakuZimu kusukela ekuthomeni.

³ Koke kwavela ngaye. Akukho nokukodwa okwabunjwa ngaphandle kwakhe.

⁴ Ukuphila bekukuye; ukuphila lokho kwaba kukhanya kwabantu.

⁵ Ukukhanya kwakhanya ebumnyameni nobumnyama azange buhlule ukukhanya.

⁶ Kwabakhona umuntu othunywe nguZimu, ibizo lakhe linguJwanisi.

⁷ Weza kobana azokufakaza ngokukhanya, khona boke bazakukholwa ngaye.

⁸ Yena bekangasikho ukukhanya, kodwana weza kobana azokufakaza ngokukhanya.

⁹ Lowo bekumkhanyo wamambala, obuzakuza ephasinapha uzokukhanyisela woke umuntu.

¹⁰ ULizwi bekakhona ephasini begodu iphasi ladalwa ngaye, kodwana iphasi azange khelimazi.

¹¹ Weza ephasini lekhabo, abantu bekhabo azange bamamukele.

¹² Kodwana boke abamamukelako bebakholwa ebizweni lakhe, wabapha ilungelo lokuba bantwana bakaZimu,

¹³ iye, labo abangakabelethwa ngeengazi nangentando yenyama namkha yomuntu kodwana ngentando kaZimu.

¹⁴ ULizwi waba yinyama, wakha phakathi kwethu azele umusa neqiniso. Sabona iphazimulwakhe, iphazimulo ayamukela kuYise njengeNdodanakhe eyodwa tere.

¹⁵ UJwanisi wafakaza ngaye, arhuwelela athi: “Nguye lo ebengikhuluma ngaye ngisithi, ‘Loyo oza emva kwami mkhulu kunami ngombana yena gade akhona ngingakabikho.’ ”

¹⁶ Ngokuzala kwakhe umusa saphiwa soke umusa phezu komusa.

¹⁷ Umthetho weza ngoMosi, kodwana umusa neqiniso kweza ngoJesu Krestu.

¹⁸ Akakho noyedwa owakhe wabona uZimu, ngaphandle kweNdodanakhe ebelethwe yodwa esesifubeni sakaYise, ngiyo kwaphela embonakalisileko.

Ubufakazi bakaJwanisi uMbhabhadisi

¹⁹ Lobu bufakazi bakaJwanisi ngesikhathi amaJuda nakathumela abaphristi namaLevi basuka eJerusalema bambuza bathi: “Kanti wena ungubani?”

²⁰ Yena wavuma azange aphike, wakhuluma waphandlesela wathi: “Angisuye uKrestu mina.”

²¹ Bambuza bathi: “Alo-ke ungubani na? Ungu-Eliya?” Waphendula wathi: “Awa, angisuye.” Bambuza godu bathi: “Umphorofidi na?” Waphendula wathi: “Awa angisuye.”

²² Bathi kuye: “Yeke sitjela bona ungubani. Kufanele sibuyisele ipendulo kilabo abasithumileko. Zitjho bona ungubani?”

²³ Yena wabaphendula njengombana kwatjho umphorofidi u-Isaya, wathi: “Mina ngililizwi laloyo orhuwelelako erhalawumbeni asithi, ‘Yenzani indlela yeKosi inqophe!’ ”

²⁴ Nje-ke abazenda ebegade bathunywe baFarisabo,

²⁵ bambuza bathi: “NawungasinguKrestu namkha u-Eliya nanyana umphorofidi, alo-ke ubhabhadiselani?”

²⁶ UJwanisi wabaphendula wathi: “Mina ngibhabhadisa ngamanzi, kodwana hlangana nani kujame eningamaziko,

²⁷ iye, oza emva kwami nengingakafaneli ukutjhaphulula umutjana wamapatlagwanakhe.”

²⁸ Koke lokhu kwenzeka eBhethaniya ngaphetjheya kweJordani, lapha uJwanisi gade abhabhadisa khona.

IMvana kaZimu

²⁹ Ngomuso uJwanisi wabona uJesu asiza kuye, wathi: “Qalani nasiya iMvana kaZimu, esusa isono sephasi!

³⁰ Nguye ebengikhuluma ngaye nangisithi, ‘Oza emva kwami, mkhulu kunami ngombana gade akhona ngingakabikho.’

³¹ Nami ngokwami azange khengimazi, kungalokho ngize kobana ngibhabhadise ngamanzi khona azakubonakaliswa kwa-Israyeli.”

³² UJwanisi waveza ubufakazi wathi: “Ngibone uMoya ehla njengezuba avela ezulwini, wahlala phezu kwakhe.

³³ Nalapho azange ngazi bona nguye. Kodwana owangithuma bona ngibhabhadise ngamanzi, wathi kimi, ‘Loyo okuzakuthi nawubona uMoya ehla abe ahlale phezu kwakhe, nguye obhabhadisa ngoMoya oCwengileko.’

³⁴ “Ngalokho ngikubonile lokho begodu ngiyafakaza bona lo yiNdodana kaZimu.”

Abafundi bokuthoma bakaJesu

³⁵ Ngelanga elilandelako godu uJwanisi bekajame lapho nabafundi bakhe ababili;

³⁶ waqala wabona uJesu asekhambeni wathi: “Qalani, naso iMvana kaZimu!”

³⁷ Kwathi bona abafundi ababili bamuzwe atjho njalo, balandela uJesu.

³⁸ UJesu waphenduka, wababona bamlandela, wababuza wathi: “Nilila ngani?” Bona bathi kuye: “Rabi,” (nakutjhugululwako kutjho bona Mfundisi) “uhlalaphi na?”

³⁹ Wabaphendula wathi: “Yizani nizokubona.” Besele lithambeme, yeke bakhamba naye bayokubona lapha ahlala khona, bahlala lapho naye imini yoke.

⁴⁰ Omunye wababilabo gade kungu-Andrisi, umfowabo lakaSimoni Pitrosi.

⁴¹ Kokuthoma u-Andrisi wafumana umfowabo uSimoni, wamtjela wathi: “Simfumene uMesiya.” (Nakutjhugululwako kutjho uKrestu.)

⁴² Yeke wathatha uSimoni wamusa kuJesu. UJesu wamqala wathi kuye: “Ibizo lakho nguSimoni, umsa kaJwanisi, uzakubizwa bona unguKhefasi.” (Kuyafana nokuthi Pitrosi nakutjhugululwako.)

⁴³ Ngelanga elilandelako uJesu wazilungiselela ukuya eGalile. Wafumana uFlebhe wathi kuye: “Namba sikhambe!”

⁴⁴ UFlebhe bekungeweBhethe-Sayida edorobheni lekhabo laka-Andrisi noPitrosi.

⁴⁵ UFlebhe wafumana uNathaniyeli, wathi kuye: “Simfumene loyo uMosi atlole ngaye encwadini yomthetho, ngitjho nabaphorofidi abatlola ngaye. UnguJesu, indodana kaJosefa, weNazaretha.”

⁴⁶ UNathaniyeli wabuza wathi: “Kukhona okulungileko okungavela eNazaretha na?” UFlebhe waphendula wathi: “Yiza uzokubona!”

⁴⁷ UJesu wabona uNathaniyeli asiza kuye, wakhuluma ngaye wathi: “Nangu umIsrayeli wamambala, onganamanga.”

⁴⁸ UNathaniyeli wambuza wathi: “Ungazelaphi na?” UJesu wamphendula wathi: “Ngikubone ngaphambi kobana uFlebhe akubize usesengaphasi komuthi wamakhiwani.”

⁴⁹ UNathaniyeli wamphendula wathi: “Mfundisi, uyiNdodana kaZimu! UyiKosi yakwa-Israyeli!”

⁵⁰ UJesu wathi kuye: “Ukholwa ngombana ngithe kuwe ngikubone ngaphasi komuthi wamakhiwani na? Uzokubona okukhulu kunalokhu!”

⁵¹ Wathi godu kibo: “Kwamambala ngiqinisile ngithi: Nizokubona izulu livuleka, iingilozi zakaZimu zehla zenyuka phezu kweNdodana yoMuntu.”