UJUWELI 3 - IsiNdebele 2012 Translation

UZimu uzakugweba izizwe

¹ USomnini uthi: “Iye, emalangeni lawo nesikhathineso, lokha nangitjhugulula ubujamo bakwaJuda neJerusalema,

² ngizakubutha izizwe zoke, ngizilethe emrhobeni kaJehotjhafathi. Lapho-ke ngizazimangalela ngebanga labantu bami, abalilifa lami, u-Israyeli ngombana zibasabalalise hlangana nezizwe, zabahlukanisa nenarhami.

³ Zaphosa ifumbe ngabantu bami, zathenga ukulala neengwadla ngabesana; zathenga umrhamulo wewayini ngabentazana.

⁴ “Alo-ke, wena Tirosi neTsidoni, nani noke mfunda zeFilista: Ningifunani na? Nifuna ukuzibuyiselela na? Nangabe nifuna ukuzibuyiselela ngizakurhaba, nginibethe ngeentonga zenu.

⁵ Nithethe igolide nesiliva lami, benathatha namagugwami wakanokutjho nawasa emathempelinenu.

⁶ Nithengise abantu bakwaJuda nebeJerusalema emaGirigini ukuze nibathumele kude nenarhekhabo.

⁷ Ngalokho yelelani la: Ngizobaphaphamisa eendaweni enibathengise kizwezo, nginibethe ngeentonga zenu.

⁸ Ngizokuthengisa amadodana namadodakazenu ebantwini bakwaJuda; bona bawathengisele amaTjheba isizwe esikude.” Kutjho uSomnini.

⁹ “Tjelani izizwe into le, nithi, ‘Zilungiseleleni ipi! Vusani iintsitsirimba! Amabutho woke akahlome asahlele!

¹⁰ Kghadlhani amalembenu wokulima nenze iinsabula, nenze imikhwa yokuqopha isidiribe ibe mikhonto. Obogabogako akazitjho athi: Ngiyitsitsirimba!

¹¹ Nina zizwe, yizani msinyana noke, nibuthane mazombe emrhobeni kaJehotjhafathi.’ ” Somnini, kwanga ungehlisa amabuthwakho!

Ikusasa lezizwe nesibusiso sakaJuda

¹² USomnini uthi: “Izizwe azivuke, zehlele ngemrhobeni kaJehotjhafathi ngombana lapho ngizokuhlala, ngigwebe izizwe zoke mazombe.

¹³ Fakani isegere ngombana isivuno sivuthiwe! Yizani nizokugaya abantwaba njengamabele. Ngibasuthi ngobukhohlakali babo, obuphuphuma njengotjwala emarhabheni!”

¹⁴ Iinqubuthu ngeenqubuthu zisemrhobeni wokugwebela ngombana ilanga lakaSomnini litjhidele ngemrhobeni lowo.

¹⁵ Ilanga nenyezi zizakufiphala, iinkwekwezi zingasakhanyi.

¹⁶ USomnini uzakubhodla aseZiyoni, athuthumbise ngombani aseJerusalema; izulu nephasi zizakuthuthumela. Nokho uSomnini uzakuba lirholo labantu bakhe, abe siphephelo sabantu bakwa-Israyeli.

¹⁷ USomnini uthi: “Nizabe seniyazi-ke bona nginguSomnini, uZimenu, ohlala eZiyoni, entabenami ecwengileko. IJerusalema izakuba ngecwengileko; abatjhili angeze basalibeka kiyo.

¹⁸ Mhlokho iintaba zizakuthonta isitjhidela sewayini, imibundu itleleze ibisi; yoke imilanjana yakwaJuda igeleze amanzi. Umthombo uzakuvinyilika endlini kaSomnini, usezele umrhoba weTjhithimu.

¹⁹ IGibhide izakuba ligagadu, i-Edomu ibe libhudu lerhalawumba ngebanga lomguruguru owenziwe ebantwini bakwaJuda, enarheni abaphalaza kiyo iingazi ezinganamlandu.

²⁰ Kodwana inarha yakwaJuda izakuhlalwa nini nanini, iJerusalema ihlalwe ziinzukulwana ngeenzukulwana.

²¹ Ngingahlala ngingabagwebi abaphalaze iingazi zakaJuda na? Awa, angeze bengithome.” USomnini uzakuhlala eZiyoni!