UJUWELI 1 - IsiNdebele 2012 Translation

Ubujamo obumasikizi kwaJuda

¹ Ilizwi lakaSomnini elafika kuJuweli umsa kaPetuweli:

² Yizwani lokhu nina baphathi, nilalele nina noke enakhe enarheni. Into enje, yakhe yenzeka eenkhathini zenu namkha eenkhathini zaboyihlo na?

³ Nizoyibikela abantwabenu, nabantwabenu babikele abantwababo, nabantwababo babikele isizukulwani esilandelako.

⁴ Lokho okwatjhiywa sikhonyani kwadliwa yikumbi; okwatjhiywa liwoma lentethe kwadliwa ngelinye iwoma lentethe.

⁵ Phaphamani, nilile nina ndakwa ndina! Lilani nina nseli zewayini; lilani ngebanga lesitjhidela sewayini esihluthwe emilonyenenu.

⁶ Isizwe esinamandla nesinganakubalwa sisahlele inarha yakwethu; sinamazinyo nemihlathi enjengeyeengwenyama.

⁷ Sirhayile isidiribe sakwethu; sahlikiliza nemithi yakwethu yamakhiwani. Sebule amaqolo, sawaphuphura sawatjhwamadela; satjhiya iimpande zimhlophe twa.

⁸ Lilani njengeqhakazana elembethe iinzilo; lililela ukufa kwendoda ebeyisanda ukulithatha.

⁹ Umnikelo wamabele noweenselo awusalethwa endlini kaSomnini. Abaphristi, iinceku zakaSomnini, badanile.

¹⁰ Ummango urhayiliwe; amasimu omile; amabele ahlikiliziwe; iwayini elitja litjhile namafutha we-oliva akasekho.

¹¹ Kakamalani nina balimi, nilile nina batjali besidiribe. Tlhuwelani ikoroyi nebhali ngombana isivuno samasimu sirhayiliwe.

¹² Isidiribe sibunile, nemithi yamakhiwani ithintithekile. Amarharinadi, amasundu nemithi yama-apula kanye nayo yoke imithi yemmangweni itjhwabile. Kwamambala, ithabo labantu linyelele.

Ilanga lekonzo ekhethekileko

¹³ Baphristi, yembathani iinzilo, nirhahlawule; lilani nina enilotjha phambi kwe-aldari. Yizani nizokulila noke, nina enilotjha phambi koZimu wesivumelwano ngombana iminikelo yamabele neyeenselo ayisalethwa ethempelini lakaZimenu.

¹⁴ Bekani ilanga lokuzila; memezelani umhlangano okhethekileko. Bizelani endlini kaSomnini uZimenu, abaphathi boke nezakhamuzi; nilile kuSomnini.

¹⁵ Maye mhlokho! Ngambala ilanga lakaSomnini libandamele; liza ngokubhubhisa okukhulu kukaSomandla.

¹⁶ Angithi ukudla kurhayiliwe phambi kwamehlwethu? Angithi ukuthokoza nethabo kuphelile ekumbeni kaZimethu?

¹⁷ Iimbewu ziyakghora ngaphasi kwamagade. Amadladla amafuhlufuhlu, iinlulu zirhirikile ngombana amabele omile.

¹⁸ Maye ukubongolela kweenkomo! Imihlambi ihlakazekile ngombana ayinamadlelo; ngitjho nemihlambi yezimvu isesonweni.

¹⁹ Ngilila kuwe Somnini ngombana umlilo utjhise amadlelo emrhuleni, amalangabi arhabule yoke imithi yommango.

²⁰ Ngitjho neembandana zommango zilila kuwe Somnini ngombana imilambo yamanzi yomile. Umlilo utjhise amadlelo emrhuleni.