UJUDA 1 - IsiNdebele 2012 Translation

Ukulotjhisa

¹ UJuda, inceku kaJesu Krestu, umfowabo kaJakopo, kilabo ababiziweko, abathandwe nguZimu uBaba, balondwa nguJesu Krestu.

² Sengathi umusa, ukuthula nethando kunganda kini noke.

Abalahlekisi

³ Bathandekako, nanyana bengitjhisekela ukunitlolela ngesindiso esiyihlanganyeleko soke, ngibone kunesidingo bonyana nginitlolele nginibawe bona nilwele ukukholwa okwabekwa kwabacwengileko kwaba kanye.

⁴ Nje-ke sebangene ngokukhukhutha labo okwatlolwa ngabo ekadeni bona bangabokulahlwa. Bababantu abangesabi uZimu nabaphendulela umusa kaZimethu emesweni begodu baphika okunguye kwaphela uMnikazi wethu, iKosi uJesu Krestu.

⁵ Nanyana senikwazi koke lokhu, ngithanda ukunikhumbuza bona uSomnini wasindisa kwaba kanye isizwe sakhe enarheni yeGibhide, kodwana emva kwalokho warhayila labo abangazange bakholwe.

⁶ Ngitjho neengilozi ezingazange zibulonde ubukhosi bazo, kodwana zatjhiya ikhaya lazo, uzilonde eenketanini zesiphelani ebumnyameni obuzikileko zilindele ilanga elikhulu lokugwetjwa.

⁷ Ngokufanako, iSodoma neGomora kanye nemizi ebhodileko yazibandakanya emabayini ngendlela emameswe nedazukileko, yaba sibonelo sokuhlunguphazwa ngokutjhiswa ngomlilo wesiphelani.

⁸ Ngokunjalo, laba babhudangi basilaphaza imizimba yabo, badela ukulawulwa begodu bahlambalaza ubukhosi.

⁹ Ngitjho nengilozi ekulu uMikhayeli lokha nakaphikisana noSathana ngesidumbu sakaMosi, azange amtemeleje ngehlamba kodwana wathi: “USomnini uzakukhalimela.”

¹⁰ Kodwana abantwaba bahlambalaza nanyana kuyini abangakwaziko; nalokho abakwaziko ngemvelo, njengeenyamazana, ngikho okubabhubhisako.

¹¹ Maye kibo, ngombana bakhamba endleleni kaKayini; bagijimela ekudukeni kwakaBhalami ngenca yomvuzo begodu babhubha ekuhlubukeni kwakaKora.

¹² Laba balihlazo eminyanyeni yenu yethando lapha badla khona nani banganavalo, bazondla bona. Banjengamafu aphetjhulwa mumoya, banjengemithi yesilimela enganazo iinthelo, efe kabili etsonyulwe nemirabhu.

¹³ Bamamaza welwandle abhubhudlha amahlazo wawo; baziinkwekwezi ezilahlekileko ezibekelwe ubumnyama obukhulu obungapheliko.

¹⁴ U-Inogo, osizukulwana sekhomba kusukela ku-Adamu, waphorofida ngabo wathi: “Qalani, uSomnini uza nebakhe abacwengileko abamatjhumitjhumi weenkulungwana,

¹⁵ uzokugweba boke, abe ahlunguphaze boke abangakholwako ngazo zoke izenzo zabo zokungakholwa abazenzileko ngendlela yokungakholwa kwabo, iye, nangamezwi anamadinyana abawakhuluma ngokunyefula.”

¹⁶ Laba kubabantu abakhalalako nabasolako; balandela iinkanuko zabo; bayazigqaja begodu balutha abanye ukuze bafumane inzuzo.

Ukukhalima nokuyala

¹⁷ Kodwana nina bathandekako, khumbulani amezwi akhulunywa ngaphambilini bapostoli beKosethu uJesu Krestu.

¹⁸ Bathi kini: “Ngemihla yokuphela kukhona abazanihleka ihlaya, bakhambe ngeenkanuko zabo ezimbi.”

¹⁹ Ngibo labo abanganaMoya abaletha ukwahlukana.

²⁰ Kodwana nina bathandekako, zakheni ekukholweni kwenu okucwengileko, nithandaze ngoMoya oCwengileko.

²¹ Hlalani ethandweni lakaZimu, nilindele isirhawu seKosethu uJesu Krestu, esisiletha ekuphileni okungapheliko.

²² Nizwelane nalabo abazazako;

²³ abanye basindiseni ngokubahlwitha emlilweni; abanye nizwelane nabo ngokwesaba, nizonde ngitjho nesambatho esinindwe ziinkanuko zabo ezimbi.

Ukwamukela umusa

²⁴ Kiloyo onamandla wokunilonda bona ningawi, nokunijamisa phambi kwephazimulo yakhe ninganabala, ninokuthokoza okukhulu,

²⁵ kuye uZimu oyedwa, uMsindisethu ngoJesu Krestu iKosethu, akube kuye iphazimulo, amandla nobukhosi, kusukela ekuthomeni nagadesi ngokungapheliko! Amen.