UJOTJHUWA 8 - IsiNdebele 2012 Translation

Ama-Israyeli athumba i-Ayi

¹ USomnini wathi kuJotjhuwa: “Ungesabi namkha uphelelwe mamandla. Thatha woke amadoda wepi uphanagele wenyukele e-Ayi. Qala, nginikele ikosi yakhona esandleni sakho, abantu bayo, idorobho layo kanye nenarhayo.

² Wenze nge-Ayi nekosayo owasenza ngeJerikho nekosi yakhona. Kwanjesi ningazithathela ipango nefuyo yakhona kube ngekwenu. Nanabelani idorobheli nilivelele ngemuva.”

³ UJotjhuwa waphuma nawo woke amadoda wepi wenyukela e-Ayi. Wakhetha iinkulungwana ezimatjhumi amathathu zeengorho wazithumela ebusuku.

⁴ Waziyala wathi: “Qalani la, nanabelani idorobheli nilivelele ngemuva. Ningayi kude khulu nalo kodwana hlalani nizilungiselele.

⁵ Mina-ke nabo boke abantu abakhamba nami, sizalivelela ngaphambili. Kuzakuthi nabaphumako basihlangabeza, sibaleke njengombana senza phambilini.

⁶ Bazasigijimisa kufikela lapha sibadosela khona kude nedorobho ngombana bazabe bazitjela bathi, ‘Qalani, babaleka njengaphambilini.’ Thina-ke nasibalekako,

⁷ nina nizakuvumbuka bese nithumba idorobho ngombana uSomnini uZimu uzalinikela ezandleni zenu.

⁸ Nasele niragelele idorobho, nilithungelele ngomlilo njengombana uSomnini ayalile. Qinisekani bona nenza njengokuniyala kwami.”

⁹ Yeke uJotjhuwa wathumela amadoda wepi, aya lapha gade azokulalela khona idorobho. Afike aqupha ngetjingalanga ye-Ayi, hlangana neBhethe-Eli ne-Ayi, kodwana uJotjhuwa wahlala ubusuku bamhlokho aphakathi kwabantu.

¹⁰ UJotjhuwa wavuka ekuseni, wahlela amadoda, wakhuphuka nabaphathi bakwa-Israyeli bakhamba phambi kwabantu banqombe e-Ayi.

¹¹ Woke amadoda wepi ebegade anaye akhuphuka, abandamela edorobheni. Ahloma amatende ngetlhagwini ye-Ayi ahlukaniswe mrhoba phakathi kwawo ne-Ayi leyo.

¹² Godu wathatha amadoda angaba ziinkulungwana ezihlanu, wawabadalalisa phakathi kweBhethe-Eli ne-Ayi ngetjingalanga yedorobho.

¹³ Ngendlela leyo bajamisa amabutho: Ibutho elikhamba phambili belingetlhagwini yedorobho kwathi elikhamba ngemuva laba ngetjingalanga. Ngobusukobo uJotjhuwa wangena ngemrhobeni nebutho.

¹⁴ Kwathi lokha ikosi ye-Ayi nayibona lokhu, yona nabo boke abantu bayo, okumadoda wedorobho, barhaba baphuma ekuseni banqomba etatawini ukuyela emrhobeni weJordani kobana bahlangane no-Israyeli epini. Kodwana ikosi leyo azange ilemuke bonyana kunabantu abayilaleleko ngemva kwedorobho.

¹⁵ UJotjhuwa nawo woke ama-Israyeli bafulathela, babalekela nca ngebhudwini.

¹⁶ Boke abantu ebebangedorobheni babizwa kwathiwa abagijimise ama-Israyeli. Nabalokhu bagijimisana noJotjhuwa njalo bagadunga idorobho.

¹⁷ Azange kusale muntu e-Ayi namkha eBhethe-Eli ongazange agijimise ama-Israyeli. Batjhiya amasango wedorobho avuleke khamukhamu bagijimisana nama-Israyeli.

¹⁸ USomnini wathi kuJotjhuwa: “Yelulela izenjana oliphethekwelo nca nge-Ayi ngombana ngizoyinikela esandleni sakho.” UJotjhuwa welulela izenjana ebegade aliphethe nca ngedorobheni.

¹⁹ Ababalaleleko bavumbuka msinyana lapha bebabadalele khona, kuthe bona uJotjhuwa elule isandla sakhe, bangena ngedorobheni baliragelela bebalithungela ngomlilo khonokho.

²⁰ Kuthe lokha amadoda we-Ayi naqala emuva, madekhethu, intuthu evela ngedorobheni besele ithe kupe itjhinga emkayini. Akakamala ahluleka ukubalekela ngapha nangapha ngombana ibutho ebelibalekele ebhudwini lajikela abagijimisi balo.

²¹ Iye, kwathi lokha uJotjhuwa nawo woke ama-Israyeli nababona bonyana labo ebebalalele idorobho sebalithumbile nokobana intuthu yedorobho besele isemkayini, bajika bona balwe namadoda we-Ayi lawo.

²² Kanti-ke namanye ama-Israyeli avela ngedorobheni alwa namadoda lawo. Ngaleyondlela azifumana aphahlwe ma-Israyeli ngapha nangapha. Ama-Israyeli awamadlha kangangobana azange kube nophunyurhako namkha osindako,

²³ ngaphandle kwekosi ye-Ayi ayibamba iphila ayiletha kuJotjhuwa.

²⁴ Kuthe bona ama-Israyeli aqede ukubulala boke abahlali be-Ayi emmangweni lapha gade agijinyiselwe khona, ngemva kobana boke bafe ngesabula kufikela kewokugcina, woke ama-Israyeli abuyela e-Ayi afese ayibhubhisa ngesabula.

²⁵ Boke abantu be-Ayi, okutjho boke abafa mhlokho okumadoda nabafazi, bebaziinkulungwana ezilitjhumi nambili,

²⁶ ngombana uJotjhuwa azange abuyisele isandla sakhe ebegade aphethe ngaso izenjana emuva kufikela lapha kubhujiswa khona boke abahlali be-Ayi.

²⁷ Ama-Israyeli azithathela ifuyo nepango kwaphela edorobheni, ukuya ngokwelizwi lakaSomnini ayala ngalo uJotjhuwa.

²⁸ UJotjhuwa watjhisa i-Ayi yaba liqubi leququ lasafuthi njengombana kunjalo nanamhlanje.

²⁹ Wahlomela ikosi ye-Ayi esigodweni bekwahlwa. Kwathi nakutjhinga ilanga uJotjhuwa wayala bona kuphanyulwe isidumbu sayo esigodwenapho siphoselwe ebungenweni besango ledorobho. Sadindelwa ngesiqorho samatje esisajame lapho nanamhlanje.

Ukuvuselelwa kwesivumelwano

³⁰ Nje-ke uJotjhuwa wakhela uSomnini uZimu wakwa-Israyeli i-aldari entabeni i-Ebali,

³¹ njengombana uMosi inceku kaSomnini yayala ama-Israyeli encwadini yomthetho kaMosi. I-aldarelo belakhiwe ngamatje angakabazwa namkha angakabandulwa ngesisetjenziswa sesimbi. Batjhisela kilo imihlabelo yokutjhiswa kuSomnini, bahlabela nemihlabelo yetjhebiswano.

³² Khonapho, phambi kwama-Israyeli, watlola ematjeni isifaniso somthetho kaMosi ebegade awutlolile.

³³ Woke ama-Israyeli, abaphathi, iinkhulu nabagwebi bawo, okutjho boke bendabuko kanye neenkhonzi, bajama ngapha nangapha komfaji ngaphambi kwabaphristi bamaLevi abathwala umfaji wesivumelwano sakaSomnini. Ingcenye yabo yaba ngaphambi kwentaba yeGerizimu enye yaba ngaphambi kwentaba ye-Ebali kobana kube kubusiswa kwama-Israyeli njengombana uMosi inceku kaSomnini ayala phambilini.

³⁴ Ngemva kwalapho uJotjhuwa wafunda woke amezwi womthetho, iimbusiso namanikelela ukuya ngakho koke okutlolwe encwadini yomthetho.

³⁵ Wafunda woke amezwi phambi kwehlangano yama-Israyeli kanye nabafazi, abantwana neenkhonzi ebezihlala phakathi kwawo. Kiwo woke amezwi uMosi ayala ngawo, azange atjhiye nalinye.