UJOTJHUWA 7 - IsiNdebele 2012 Translation

Isono saka-Akani

¹ Ama-Israyeli eqa umthetho malungana nezinto ezikhethelwe ukubhujiswa ngombana u-Akani umsa kaKarimi omsa kaZabadi umsa kaZerarhi wekoro kaJuda wathatha ezinye zezinto ezibekelwe ukubhujiswa. Itukuthelo kaSomnini yavutha phezu kwama-Israyeli.

² UJotjhuwa wathumela amadoda ukusuka eJerikho aya e-Ayi ngepumalanga yeBhethe-Eli wathi kiwo: “Khuphukani niyokuhlola inarha.” Yeke amadoda lawo akhuphuka ayokuhlola i-Ayi.

³ Abuyela kuJotjhuwa athi kuye: “Akungakhuphuki woke umuntu. Iinkulungwana ezimbili namkha ezintathu zamadoda zinganela ukubhudabhuda i-Ayi. Akunasidingo sokukhathaza abantu kobana baye boke ngombana akunalitho laphaya.”

⁴ Yeke kwakhuphuka iinkulungwana ezintathu zamadoda, kodwana zabuya zingasaqali nemuva zigijinyiswa madoda we-Ayi.

⁵ Amadoda we-Ayi lawo amadlha ama-Israyeli, awagijimisa ukusuka esangweni ledorobho ukuya eTjhebarimu. Abulala pheze amatjhumi amathathu nesithandathu emehlelweni. Abantu baphela amandla bangenwa mamanzi emadolweni.

⁶ UJotjhuwa wadabula izambatho zakhe, wahloma ihloko phasi phambi komfaji kaSomnini bekwahlwa akanye nabaphathi bakwa-Israyeli. Bazithela iinhloko ngequlwani.

⁷ UJotjhuwa wathi: “Maye, Somnini Somandla! Bewusasiyamiselani iJordani isizwesi? Kungabe bewusinikela ezandleni zama-Amori kobana asirhayile na? Bekungasi ngcono thana sase sazihlalela ngaphetjheya kweJordani!

⁸ Awu, Somandla! Alo, yinto engizoyithini-ke le nasele ama-Israyeli agijinyiswa zizitha zawo kangaka!

⁹ AmaKanana nabahlali benarha le bazokwizwa ngalokhu, basizombe basuse ibizo lethu ngaphasi komthunzi welanga. USomnini uzokuthini ngebizo lakhe elikhulu kangaka na?”

¹⁰ USomnini wathi kuJotjhuwa: “Sikima, kubayini uhlome ihloko phasi nje?

¹¹ Ama-Israyeli onile, eqe isivumelwano sami engiwayale ngaso. Athethe ezinye zezinto ekumele zibhujiswe. Ngalokho ebile, abe akhuluma amala, afihla ezinye zezintwezo epahlenawo.

¹² Yeke ama-Israyeli angeze akwazi ukujama phambi kwezitha zawo. Azakufulathela izitha zawo abaleke ngombana aphenduke isiga sokubhujiswa. Angeze ngisaba nani ngaphandle kwanange nirhayila izinto ekufanele zibhujiswe eziphakathi kwenu.

¹³ Sikima uhlambulule abantu uthi, ‘Zihlambululeni nilungiselele ikusasa ngombana uSomnini uZimu wakwa-Israyeli uthi kunezinto ekumele zibhujiswe eziphakathi kwenu. Wena Israyeli angeze wakghona ukujama phambi kwezitha zakho kufikela lapha ususa khona izinto ekumele zibhujiswe phakathi kwakho.

¹⁴ Kuzakuthi ekuseni-ke nitjhidezwe ngeenkoro zenu. Ikoro ezakukhonjwa yifumbe kaSomnini izakutjhidela ngemindenayo, umndeni ozakukhonjwa yifumbe kaSomnini utjhidele ngokweenkumba zawo, nekumbeni ezakukhonjwa yifumbe kaSomnini kutjhidele indoda nendoda.

¹⁵ Loyo okhonjwe nezinto ezibhujiswako uzakutjhiswa, yena nakho koke anakho ngombana weqe isivumelwano sakaSomnini nokobana wenze ubudlhayela kwa-Israyeli.’ ”

¹⁶ UJotjhuwa wavuka ekuseni, watjhideza ama-Israyeli ngeenkoro zawo. Kwakhonjwa ikoro yakwaJuda.

¹⁷ Watjhideza imindeni yakwaJuda, kwakhonjwa umndeni kaZerarhi. Watjhideza ihloko nehloko yomndeni kaZerarhi kwakhonjwa uZabadi.

¹⁸ Watjhideza ihloko nehloko yemizi kaZabadi kwakhonjwa u-Akani umsa kaKarimi omsa kaZabadi umsa kaZerarhi wekoro yakwaJuda.

¹⁹ UJotjhuwa wathi ku-Akani: “Ndodanami, nikela idumo kuSomnini uZimu wakwa-Israyeli, uvume kuSomnini, ungitjele koke okwenzileko ungangifihleli litho.”

²⁰ U-Akani waphendula uJotjhuwa wathi: “Eqinisweni ngimi owonileko kuSomnini uZimu wakwa-Israyeli, nakhu engikwenzileko:

²¹ Ngithe nangiqala ipango ngabona inaka lakanokutjho leTjhinari, isiliva engaphezu kwamakhilogremu amabili nesitina segolide esinobudisi obungaba siquntu sekhilogremu. Yeke ngazirhalela izintwezi, ngazithatha. Ngizifihle ehlabathini ngetendeni lami, isiliva lingaphasi kwenaka.”

²² UJotjhuwa wathumela iinthunywa, zagijimela ngetendeni laka-Akani. Ngambala zafumana koke lokho kufihlwe ngetendeni lakhe, isiliva lingaphasi kwenaka.

²³ Bazikhupha ngetendenapho baziletha phambi kwakaJotjhuwa nama-Israyeli woke. Bazendlala phambi kwakaSomnini.

²⁴ UJotjhuwa nawo woke ama-Israyeli bathatha u-Akani umsa kaZerarhi, isiliva nenaka lakanokutjho nesitina segolide, amadodanakhe namadodakazakhe, iinkomo nabodumbana bakhe, izimvu neembuzi zakhe, itende lakhe nakho koke anakho bakwenyusela emrhobeni we-Akori.

²⁵ UJotjhuwa wathi: “Kubayini ubange ihlekelele engaka phezu kwethu? Nawe-ke uSomnini ukwehlisela ihlekelele namhlanje.” Woke ama-Israyeli abakhanda ngamatje, abatjhisa yena nakho koke kwakhe, abavala ngamatje.

²⁶ Akghubelela phezu kwabo isiqorho samatje esisese khona nanamhlanje. USomnini waphenduka etukuthelwenakhe evuthako. Yeke bekube namhlanje indawo leyo kuthiwa mrhoba we-Akori.