UJOTJHUWA 5 - IsiNdebele 2012 Translation

Ukusokwa kwabaduna bakwa-Israyeli eGiligali

¹ Kwathi lokha woke amakhosi wama-Amori ebegade angaphetjheya kweJordani ngetjingalanga, newamaKanana ebegade amagegana nelwandle bona ezwe ukuthi uSomnini womise amanzi weJordani phambi kwama-Israyeli kobana akghone ukuyama, angenwa mamanzi emadolweni, azange kube nomuntu oba nomdlandla ngebanga lama-Israyeli.

² Ngesikhatheso uSomnini wathi kuJotjhuwa: “Zenzele imikhwa yamatje, uvuselele umkhuba wokusoka ama-Israyeli godu.”

³ Yeke uJotjhuwa wenza imikhwa, wasoka woke ama-Israyeli eGibeyathi-Haralothi.

⁴ UJotjhuwa wasoka ama-Israyeli ngebanga lokobana boke abaduna abaphuma eGibhide, okutjho boke ebebamadoda wepi, bahlongakalela endleleni erhalawumbeni ngemva kokuphuma kwabo.

⁵ Iye, boke abaduna abaphuma eGibhide bebasokiwe, kodwana boke labo ababelethelwa endleleni erhalawumbeni ngemva kokuphuma kwabo, bebangakasokwa.

⁶ Ama-Israyeli akhamba amatjhumi amane woke weminyaka erhalawumbeni kufikela lapha soke isizwe, okutjho amadoda wepi aphuma eGibhide, ahlongakala khona ngombana angazange alalele ilizwi lakaSomnini. USomnini wafunga kiwo bona akazowabonisa inarha ayifungela kiboyisemkhulu bona uzabanikela yona, inarha egeleza ibisi neliju.

⁷ Nje-ke uJotjhuwa wasoka abantwana bamadoda lawo ngombana bebangakasokwa erhalawumbeni. USomnini wazivusela bona esikhundleni saboyise.

⁸ Kuthe bona boke abaduna basokwe, isizwe sahlala ematendenaso ngekampeni bebaphola.

⁹ USomnini wathi kuJotjhuwa: “Namhlanjesi ngisuse loke ihlazo leGibhide phezu kwenu.” Nje-ke indawo leyo kwathiwa yiGiligali bekube namhlanje.

Ama-Israyeli agidinga iPhasika

¹⁰ Kwathi ama-Israyeli asahlezi eGiligali, agidinga iPhasika entambama ngelanga letjhumi nane lenyanga emrhuleni weJerikho.

¹¹ Ngakusasa kwePhasika, ama-Israyeli agoma iinthelo zenarha mhlokho, okutjho izikwa ezinganangumelo kanye nesibere.

¹² Yeke imana yagcina mhlokho ukwehla, lokha nathoma ukugoma iinthelo zenarha. Iye, ukusukela mhlokho ngomnyaka lowo, ama-Israyeli azange asagoma imana, kodwana athoma ukugoma imikhiqizo yenarha yeKanana.

Ama-Israyeli athumba iJerikho

¹³ UJotjhuwa waphakamisa amehlwakhe aseJerikho wabona umuntu ajame phambi kwakhe aphethe isabula erhwatjhiweko. UJotjhuwa wanqomba kuye wathi: “Ujame nathi namkha ujame nezitha zethu na?”

¹⁴ Umuntu loyo wathi: “Awa, mina ngiyinduna yebutho lakaSomnini, kungalokho ngilapha.” UJotjhuwa waguqa, wahloma ihloko phasi wathi kuye: “Isikhulu sami sinomlayezo wencekwaso na?”

¹⁵ Induna yebutho lakaSomnini yathi kuJotjhuwa: “Hlubula amapatlagwanakho ngombana lapha ujame khonapho kucwengile.” UJotjhuwa wenza njalo.