UJOTJHUWA 4 - IsiNdebele 2012 Translation

¹ Kuthe bona soke isizwe siqede ukuyama iJordani, uSomnini wathi kuJotjhuwa:

² “Thatha amadoda alitjhumi nambili hlangana nabantu, kube yindoda ngayinye ekorweni ngayinye,

³ uwayale bona aye phakathi kweJordani afese athi lapha kunzinze khona iinyawo zabaphristi, athathe lapho amatje alitjhumi nambili, eze nawo akhambisane nani ukuyowabeka lapha nizakulala khona ebusuku banamhlanjesi.”

⁴ Yeke uJotjhuwa wabiza amadoda alitjhumi nambili ebegade awakhethe ebantwini bakwa-Israyeli, kwaba yindoda ngayinye ekorweni ngayinye,

⁵ wathi kiwo: “Buyelani lapha kunomfaji kaSomnini uZimenu phakathi kweJordani, omunye nomunye wenu athathe ilitje alithwale emahlombe ukuya ngesibalo seenkoro zakwa-Israyeli,

⁶ ukuze abe litshwayo phakathi kwenu. Kuzakuthi lokha abantwabenu nabanibuzako esikhathini esizako bathi, ‘Atjho ukuthini kini amatje la?’

⁷ Nizabatjela-ke bonyana amanzi weJordani ajama lokha umfaji kaSomnini nawuyama iJordani. Yeke amatje la azakuba sikhumbuzo sanini nanini ebantwini bakwa-Israyeli.”

⁸ Ama-Israyeli enza njengombana uJotjhuwa awayalile: Amadoda alitjhumi nambili lawo athatha amatje alitjhumi nambili phakathi kweJordani ukuya ngesibalo seenkoro zakwa-Israyeli njengombana uSomnini atjela uJotjhuwa. Akhamba namatje lawo ayowabeka endaweni lapha afese alala khona.

⁹ UJotjhuwa wajamisa amanye amatje alitjhumi nambili phakathi kweJordani lapha bekujame khona iinyawo zabaphristi ebegade bathwele umfaji. Asese lapho nanamhlanje.

¹⁰ Abaphristi ebegade bathwele umfaji bajama phakathi kweJordani bekwaphela koke uSomnini ebegade ayale uJotjhuwa bona akutjele abantu, ukuya ngakho koke uMosi agade amyale ngakho. Abantu bayama barhabile,

¹¹ kwathi bona boke baqede ukuyama, abaphristi abathwele umfaji kaSomnini badlulela ngaphambi kwabantu.

¹² BakwaRubeni nebakwaGadi kanye nesiquntu sekoro kaManase badlula bahlomile phambi kwama-Israyeli njengombana uMosi bekabayalile.

¹³ Bebangaba madoda aziinkulungwana ezimatjhumi amane ahlome aphelele alungele ipi akhamba nomfaji kaSomnini kobana ayokulwa emrhuleni weJerikho.

¹⁴ Mhlokho uSomnini waphakamisa uJotjhuwa phambi kwama-Israyeli woke. Ama-Israyeli esaba uJotjhuwa imihla yoke yokuphila kwakhe njengombana bekesaba uMosi.

¹⁵ Kwathi lokha nabayamako uSomnini wathi kuJotjhuwa:

¹⁶ “Yala abaphristi abathwele umfaji wobufakazi kobana bakhuphuke baphume ngemlanjeni iJordani.”

¹⁷ Yeke uJotjhuwa wayala abaphristi wathi: “Yeniphume ngeJordanapho.”

¹⁸ Kuthe lokha abaphristi abathwele umfaji wobufakazi nabaphuma ngeJordani, bona iinyawo zabo zigadange ehlabathini eyomileko, amanzi weJordani abuyela endawenawo, umlambo wathwala iingodo njengaphambilini.

¹⁹ Abantu baphuma ngeJordani ngelanga letjhumi lenyanga yokuthoma, bahloma amatendabo eGiligali emkhawulweni wangepumalanga yeJerikho.

²⁰ Amatje alitjhumi nambili lawo abawathatha ngeJordani, uJotjhuwa wawajamisa eGiligali,

²¹ wathi kuma-Israyeli: “Lokha iinzukulwana zenu nazinibuzako nina boyise esikhathini esizako bona amatje la atjho ukuthini,

²² nizazitjela nithi, ‘Lobu bufakazi bokobana u-Israyeli wayama iJordani equlwanini eyomileko.’

²³ USomnini uZimenu womisa amanzi weJordani bonyana nikwazi ukuyama njengombana enza elwandle lomGaba nakomisa amanzi kobana siyame.

²⁴ Lokhu kwenzeka ukuze boke abantu bephasi bazi bonyana isandla sakaSomnini sinamandla, nokobana nesabe uSomnini uZimenu nini nanini.”