UJOTJHUWA 21 - IsiNdebele 2012 Translation

Amadorobho wamaLevi

¹ Iinhloko zemindeni yamaLevi zeza ku-Elazara umphristi nakuJotjhuwa umsa kaNuni neenhlokweni zemindeni yaboyise beenkoro zama-Israyeli

² baseTjhilo enarheni yeKanana zathi kibo: “USomnini wayala ngoMosi bonyana sinikelwe amadorobho wokuhlala kanye namadlelo wefuywethu.”

³ Yeke ngomyalo kaSomnini ama-Israyeli athatha elifeni lawo amadorobho namadlelo wakhona awanikela amaLevi.

⁴ Ifumbe yawela emindenini yamaKhehathi. Yeke hlangana namaLevi aziinzukulwana zaka-Aroni umphristi amanye amaKhehathi afumana amadorobho alitjhumi nantathu ngefumbe ekorweni yakwaJuda, yakwaSimiyoni neyakwaBhenjamini.

⁵ Godu amanye amaKhehathi afumana amadorobho alitjhumi ngefumbe emindenini yekoro yakwa-Efrayimu, yakwaDani kanye nesiquntwini sakwaManase.

⁶ AmaGeritjhoni afumana amadorobho alitjhumi nantathu ngefumbe emindenini yekoro yakwa-Isakari, yakwa-Atjheri, yakwaNafitali kanye nesiquntwini sakwaManase eBhatjhani.

⁷ AmaMerari ngokwemindenawo afumana amadorobho alitjhumi nambili ekorweni yakwaRubeni, yakwaGadi kanye neyakwaZebuloni.

⁸ Ngaleyondlela ama-Israyeli anikela amaLevi amadorobho lawo kanye namadlelo wakhona ngefumbe njengombana uSomnini ayala ngoMosi.

^9-10 Njengombana ifumbe nayiwako yathoma emindenini yamaKhehathi okuziinzukulwana zaka-Aroni ekorweni yamaLevi, amadorobho abalwe ngenzasi athathwa ekorweni yakwaJuda neyakwaSimiyoni anikelwa iinzukulwanezo.

¹¹ Amadorobho lawo bekuyiKhiriyathi-Ariba, okutjho iRhebroni, ngeentatjaneni zakwaJuda kanye namadlelwayo magegana nayo. (U-Ariba lo gade kunguyise ka-Anakhi.)

¹² Kodwana amasimu wedorobho nemizanalo kwanikelwa uKalebi umsa kaJefune njengelifa lakhe.

¹³ Ngaphandle kweRhebroni, okulidorobho lobuphephelo, kanye namadlelwayo, iinzukulwana zaka-Aroni umphristi zanikelwa iLibhina namadlelwayo,

¹⁴ iJatiri namadlelwayo, i-Etjhitemowa namadlelwayo,

¹⁵ iRholoni namadlelwayo, iDebhiri namadlelwayo,

¹⁶ i-Ayini namadlelwayo, iJutha namadlelwayo neBhethe-Tjhemetjhi namadlelwayo. Wolithoba amadorobho lawo aphuma eenkorweni ezimbili, okutjho yakwaJuda neyakwaSimiyoni.

¹⁷ Ekorweni yakwaBhenjamini kwathathwa iGibiyoni namadlelwayo, iGeba namadlelwayo,

¹⁸ i-Anatothi namadlelwayo ne-Alimoni namadlelwayo. Kwaba madorobho amane.

¹⁹ Amadorobho wabaphristi abaziinzukulwana zaka-Aroni, gade alitjhumi nantathu sele awoke kanye namadlelwawo.

²⁰ Amanye amaKhehathi angewomndeni wamaLevi, abelwa amadorobho ekorweni yakwa-Efrayimu.

²¹ Anikelwa iTjhekemu, okulidorobho lobuphephelo namadlelwayo ngeentatjaneni zakwa-Efrayimu, iGezeri namadlelwayo,

²² iKhibitsayimu namadlelwayo neBhethe-Rhoroni namadlelwayo. Kwaba madorobho amane.

²³ Ekorweni yakwaDani kwathathwa i-Elitekhe namadlelwayo, iGibetoni namadlelwayo,

²⁴ i-Ayaloni namadlelwayo neGathi-Rimoni namadlelwayo. Kwaba madorobho amane.

²⁵ Esiquntwini sekoro yakwaManase kwathathwa iTanaki namadlelwayo neJibiliyamu namadlelwayo. Kwaba madorobho amabili.

²⁶ Amadorobho wemindeni yamaKhehathi amanye gade alitjhumi nawo woke amadlelwawo.

²⁷ AmaGeritjhoni, okungeminye yemindeni yamaLevi, anikelwa amadorobho esiquntwini sekoro yakwaManase. Wona gade kuyiGolana eseBhatjhani namadlelwayo (okulidorobho lobuphephelo), iBhetjhitera namadlelwayo. Kwaba madorobho amabili.

²⁸ Ekorweni yakwa-Isakari anikelwa iKhitjhiyoni namadlelwayo, iDaberathi namadlelwayo,

²⁹ iJarimuthi namadlelwayo ne-Eni-Ganimu namadlelwayo. Kwaba madorobho amane.

³⁰ Ekorweni yakwa-Atjheri anikelwa iMitjhali namadlelwayo, i-Abidoni namadlelwayo

³¹ iRhelikhathi namadlelwayo neRerhobho namadlelwayo. Kwaba madorobho amane.

³² Ekorweni yakwaNafitali anikelwa iKhedetjhi eseGalile namadlelwayo (okulidorobho lobuphephelo), iRhamothi-Dori namadlelwayo neKharitani namadlelwayo. Kwaba madorobho amathathu.

³³ Amadorobho wemindeni yamaGeritjhoni gade alitjhumi nantathu sele awoke namadlelwawo.

³⁴ KumaLevi aseleko, imindeni yamaMerari yanikelwa amadorobho alandelako: Ekorweni yakwaZebuloni anikelwa iJokhineyamu namadlelwayo, iKharita namadlelwayo,

³⁵ iDimina namadlelwayo neNahalali namadlelwayo. Kwaba madorobho amane.

³⁶ Ekorweni yakwaRubeni anikelwa iBhetseri namadlelwayo, iJatsa namadlelwayo,

³⁷ iKhedemothi namadlelwayo neMefathi namadlelwayo. Kwaba madorobho amane.

³⁸ Ekorweni yakwaGadi anikelwa iRamothi eseGiliyadi namadlelwayo (okulidorbho lobuphephelo), iMarhanayimu namadlelwayo,

³⁹ iRhetjhibhoni namadlelwayo neJazeri namadlelwayo. Kwaba madorobho amane sele awoke.

⁴⁰ Sele awoke amadorobho abelwa imindeni yamaMerari okumaLevi aseleko, gade alitjhumi nambili.

⁴¹ Woke amadorobho wamaLevi agade aphakathi kwama-Israyeli bekamatjhumi amane nobunane kanye namadlelwawo.

⁴² Elinye nelinye lamadorobho lawo gade linamadlelo magegana nalo. Iye, bekunjalo-ke kiwo woke amadorobho lawo.

Iinthembiso zakaSomnini ziyaphumeleliswa

⁴³ Ngaleyondlela uSomnini wanikela ama-Israyeli inarha yoke afunga bona uzoyinikela aboyisemkhulu. Kwathi bona ayithumbe, ahlala kiyo.

⁴⁴ USomnini wanikela ama-Israyeli ukuphumula mahlangothi woke njengombana afunga kiboyisemkhulu. Akunasitha nasinye esajamelana nawo ngombana uSomnini wanikela zoke izitha ezandleni zawo.

⁴⁵ Akunasithembiso nasinye esihle uSomnini asenza ekumbeni yama-Israyeli esingazange siphumelele. Koke kwenzeka.