UJOTJHUWA 20 - IsiNdebele 2012 Translation

Amadorobho wobuphephelo

¹ USomnini wakhuluma noJotjhuwa wathi

² akakhulume nama-Israyeli athi: “Khethani amadorobho wobuphephelo engakhuluma ngawo nani ngoMosi,

³ bonyana umuntu obulele omunye ngephoso angakahlosi, abalekele kiwo. Azakuba yindawo yokuphephela kini nanibalekela umuntu ofuna ukubuyiselela ngeengazi.

⁴ Umuntu loyo uzakubalekela kelinye lamadorobho lawo afese ajame ebungenweni besango lakhona, ahlathululele abaphathi bedorobhelo indabakhe. Bona-ke bazamngenisa ngedorobheni, bamnikele indawo, ahlale nabo lapho.

⁵ Nakube umbuyiseleli weengazi uyamlandelela, abaphathi abakameli ukunikela umbulali loyo ezandleni zombuyiseleli ngombana ubulele umuntu womphakathi ngaphandle kwehloso angazange amzonde phambilini.

⁶ Uzakuhlala ngedorobhenelo bekufike isikhathi sokobana ayokuvela ngaphambi kwebandla. Nakube akakabonwa umlandu uzakuhlala ngedorobhenapho kufikela lapha kuhlongakala khona umphristi omkhulu wangaleso sikhathi. Ngemva kwalokho-ke umbulali loyo angabuyela edorobheni lekhabo aye emzinakhe, okulidorobho abaleka kilo.”

⁷ Yeke ama-Israyeli ahlukanisela iKhedetjhi eGalile ngeentatjaneni zakwaNafitali, iTjhekemu ngeentatjaneni zakwa-Efrayimu neKhiriyathi-Ariba (okutjho iRhebroni) ngeentatjaneni zakwaJuda.

⁸ Ngaphetjheya kweJordani ngepumalanga yeJerikho bahlukanisela iBhetseri eserhalawumbeni elisekangala ukusuka ekorweni yakwaRubeni, iRamothi eseGiliyadi ekorweni yakwaGadi neGolana eseBhatjhani ekorweni yakwaManase.

⁹ Lawo bekumadorobho wobuphephelo abelwe woke ama-Israyeli neenkhonzi eziphakathi kwawo ukuze kuthi nanyana ngubani obulala umuntu ngaphandle kwehloso abalekele kiwo. Umbuyiseleli weengazi akukameli ambulale angakaveli phambi kwebandla.