UJOTJHUWA 2 - IsiNdebele 2012 Translation

Ukuhlolwa kwenarha

¹ UJotjhuwa umsa kaNuni wathumela amadoda amabili ngasese aseTjhithimu kobana abe ziinhloli wathi: “Khambani niyokuhlola inarha, khulukhulu iJerikho.” Akhamba-ke, afika ekumbeni yengwadla ekuthiwa nguRarhabu kobana alale lapho.

² Ikosi yeJerikho yabikelwa kwathiwa: “Tjheja, kunamadoda athileko wakwa-Israyeli afike entambama nje kobana azokuhlola inarha.”

³ Yeke ikosi yeJerikho yathumela iinthunywa kuRarhabu yathi: “Khupha amadoda eze kuwe nangene ekumbenakho lawo ngombana into ayizeleko kuzokuhlola inarha kwaphela.”

⁴ Kodwana uRarhabu gade afihle amadoda amabili lawo, yeke wathi: “Iye, awa, khona kuliqiniso bona kufike amadoda amabili lapha. Kodwana angiwazi bona adabukaphi.

⁵ Nje-ke kuthe lokha nakurhwalalako sele kuvalwa amasango, nawo aphuma. Ukuthi atjhingephi-ke, awa nami abe angazi. Nokho nange ningarhaba niwagijimise, ningawafumana.”

⁶ URarhabu gade enyusele amadoda lawo ephahleni lekumba, wawafihla hlangana neenhlanga zeflaksi ebegade azineke ephahlenapho.

⁷ Yeke iinthunywa zeJerikho zagijimisa amadoda lawo ngendlela yeJordani ukuyela emazibukweni. Kuthe bona iinthunywa ezigijimisa amadoda ziphume, kwavalwa isango ledorobho.

⁸ Kwathi ngaphambi kobana kulalwe, uRarhabu wenyukela phezu kwephahla emadodeni lawo,

⁹ wathi kiwo: “Ngiyazi bonyana uSomnini uninikele inarha, nokobana sehlelwe kukunesaba begodu boke abahlali benarha bayathuthumela phambi kwenu.

¹⁰ Kambe sizwile bona uSomnini womisa amanzi welwandle lomGaba phambi kwenu naniphuma eGibhide, godu sezwa nalokho enakwenza emakhosini amabili wama-Amori ebegade angaphetjheya kweJordani, aboSirhoni no-Ogi enabarhayilako.

¹¹ Kuthe bona sizwe lokho, sangenwa mamanzi emadolweni, azange kube nomuntu oba nomdlandla ngebanga lenu ngombana uSomnini uZimenu unguZimu ezulwini phezulu nephasini phasi.

¹² Nje-ke ngibawa nifunge kimi ngoSomnini kobana njengombana ngibe nomusa kini, nani nizakuba nomusa ngomuzi kababa. Ninginikele itshwayo lesiqinisekiso

¹³ kobana niphunyurhise ubaba nomma, abomnakwethu nabodadwethu nabo boke abanabo, iye, nisindise ipilwethu ekufeni.”

¹⁴ Amadoda athi kuye: “Sifunga ngepilwethu! Nange ungavala phetjheya ngendabethu le, khona-ke sizakuba nomusa besithembeke kuwe lokha uSomnini nasinikela inarha le.”

¹⁵ Ngebanga lokobana uRarhabu gade ahlala ekumbeni eyakhiwe phezu komthangala wedorobho, wawehlisa ngentambo ngefesidere,

¹⁶ wathi kiwo: “Khambani niye eentatjaneni, nakungasinjalo abanigijimisako bazanifumana. Zifihleni lapho amalanga amathathu abanigijimisako bebabuye. Ngemva kwalokho-ke seningakhamba.”

¹⁷ Amadoda athi kuye: “Thina angeze saba nomlandu ngesifungo osifungise sona,

¹⁸ nakube kuzakuthi nasingena enarheni le, wena ubophelele intambo etlerebede le efesidereni osikhuphe ngalo. Ubizele ekumbenakho uyihlo nonyoko, abafowenu, iye, boke bakwenu.

¹⁹ Nakube nanyana ngubani onawe ngekumbeni uyathintwa, iingazi zakhe zizakuba phezu kweenhloko zethu. Kodwana nange kungaba nomuntu ophumela ngaphandle kweminyango yekumbakho, iingazi zakhe zizakuba phezu kwehlokwakhe, thina-ke asizukuba nomlandu.

²⁰ Godu asizukuba nomlandu malungana nesifungo sakho osenze kithi nange wakhuluma ngendabethu le.”

²¹ Yena wathi: “Akube njengokwamezwenu.” Yeke wawalayelisa, akhamba. Ngambala wabophelela intambo etlerebede efesidereni.

²² Amadoda lawo akhamba-ke anqomba eentatjaneni, ahlala lapho amalanga amathathu abantu abawagijimisako bebabuya ngombana babhenyegula yoke indlela kodwana bangawafumana.

²³ Amadoda amabili godu ehla abuya eentatjaneni ayama iJordani aya kuJotjhuwa umsa kaNuni, ambikela koke okuwehleleko.

²⁴ Godu athi kuJotjhuwa: “Ngambala uSomnini unikele yoke inarha ezandleni zethu, nabahlali bakhona basesabela ukufa.”