UJOTJHUWA 19 - IsiNdebele 2012 Translation

Ilifa lakaSimiyoni

¹ Ifumbe yesibili yawela ekorweni yakwaSimiyoni ukuya ngokwemindenayo. Ilifa layo laba hlangana nelifa lekoro yakwaJuda.

² Isabelo sayo saba yiBheritjheba, iTjheba, iMolada,

³ iRhatsari-Tjhuwali, iBhala, i-Etsemu,

⁴ i-Elitoladi, iBhetuli, iRhorima,

⁵ iTsikhilagi, iBhethe-Hamarikabothi, iRhatsari-Susa,

⁶ iBhethe-Lebawothi neTjharurheni. Kwaba madorobho alitjhumi nantathu nemizanawo.

⁷ Amanye bekuyi-Ayini, iRimoni, i-Eteri ne-Atjhani. Kwaba madorobho amane nemizanawo,

⁸ iye, yoke imizana emagegana namadorobho lawo ukufaka phakathi iBhalathi-Bheri neRamathi-Negevu. Lelo bekulilifa lekoro yakwaSimiyoni ukuya ngokwemindenayo.

⁹ Ilifa lekoro yakwaSimiyoni beliyingcenye yenarha yakwaJuda ngombana isabelo sekoro yakwaJuda besisikhulu khulu kiso. Ngalokho ikoro yakwaSimiyoni yafumana isabelo hlangana nelifa lekoro yakwaJuda.

Ilifa lakaZebuloni

¹⁰ Ifumbe yesithathu yawela ekorweni yakwaZebuloni ukuya ngokwemindenayo. Imikhawulo yelifa layo beyithoma eSaridi.

¹¹ Umkhawulo omunye ukhuphukela nca ngelwandle neMarala, udlule eduze neDabetjhethi, uthinte umlanjana oseJokhineyamu.

¹² Omunye bewusuka eSaridi utjhinge tjhuba langepumalanga ukudabula inarha yeKisilothi-Tabori unqombe eDaberathi bese ukhuphukela eJafiya.

¹³ Ukusuka lapho utjhinge tjhuba langepumalanga yeGathi-Rheferi ne-Eti-Khatsini, unqombe eRimoni bese ujikela ngeNeya.

¹⁴ Ngetlhagwini yeRhanatoni ujike bese uphelela emrhobeni weJifitarheli.

¹⁵ Ilifelo belifaka phakathi iKhathathi, iNahalali, iTjhimroni, iJidala neBhethe-Lehema. Kwaba madorobho alitjhumi nambili nemizanawo.

¹⁶ Lelo bekulilifa lekoro yakwaZebuloni ukuya ngokwemindenayo, okumadorobho nemizanawo.

Ilifa laka-Isakari

¹⁷ Ifumbe yesine yawela ekorweni yakwa-Isakari ukuya ngokwemindenayo.

¹⁸ Isabelo sayo safaka phakathi iJizriyela, iKesulothi, iTjhunemu,

¹⁹ iRhafarayimu, iTjhiyoni, i-Anarharathi,

²⁰ iRabithi, iKhitjhiyoni, i-Ebetsi,

²¹ iRemethi, i-Eni-Ganimu, i-Eni-Rhada neBhethe-Patsetsi.

²² Umkhawulo wesabelo sayo wathinta iTabori wadlulela eTjharhatsima neBhethe-Tjhemetjhi waphelela eJordani. Kwaba madorobho alitjhumi nesithandathu nemizanawo.

²³ Lelo bekulilifa lekoro yakwa-Isakari ukuya ngokwemindenayo, okumadorobho nemizanawo.

Ilifa laka-Atjheri

²⁴ Ifumbe yesihlanu yawela ekorweni yakwa-Atjheri ukuya ngokwemindenayo.

²⁵ Isabelo sayo safaka hlangana iRhelikhathi, iRhali, iBhetheni, i-Akitjhafi,

²⁶ i-Alameleki, i-Amadi neMitjhali. Umkhawulo wakhona bewudlula entabeni iKarameli bese urhubalale uye ngetjingalanga ukuyokufika ekugcineni komlanjana iLibinathi.

²⁷ Ukuyela ngepumalanga, umkhawulo bewujikela eBhethe-Dagoni, ugege namaphethelo weZebuloni ngetlhagwini yomrhoba iJifitharhi-Eli, unqombe eBhethe-Emekhi neNehiyeli bese uragele phambili utjhinge eKabhulu ngetlhagwini.

²⁸ Umkhawulo bewufaka phakathi i-Eburoni, iRerhobho, iRhamoni neKhana, ukuyokufika eTsidoni eKulu.

²⁹ Usuke lapho ujike uye eRama uyokutjhayisa eTirosi okulidorobho elinemithangala; godu ujike udlule iRhosa uphelele elwandle. Amanye amadorobho bekuyiMarhalebu, i-Akziba,

³⁰ i-Uma, i-Afekhi neRerhobho. Kwaba madorobho amatjhumi amabili nambili nemizanawo.

³¹ Lelo bekulilifa lekoro yakwa-Atjheri ukuya ngokwemindenayo, okumadorobho nemizanawo.

Ilifa lakaNafitali

³² Ifumbe yesithandathu yawela ekorweni yakwaNafitali ngokuya ngemindenayo.

³³ Umkhawulwayo ngesewula bewuthoma eRhelefi, emthini omkhulu we-owuku eTsananimu, udabule e-Adami-Nekhebi neJabhiniyeli ukuyokufika eLakhumu bese uphelela eJordani.

³⁴ Ukusuka eRhelefi ujikele ngetjingalanga uye e-Azinothi-Tabori, urhubalale njalo uye eRhukhokhi ufese ugege emaphethelweni wakwaZebuloni ngesewula newakwa-Atjheri ngetjingalanga, wayokuphelela ngepumalanga eJehuda ngemlanjeni iJordani.

³⁵ Amadorobhayo anemithangala kwaba yiTsidimu, iTseri, iRhamathi, iRakhathi, iKinerethi,

³⁶ i-Adama, iRama, iRhatsori,

³⁷ iKhedetjhi, i-Edreyi, i-Eni-Rhatsori,

³⁸ iJironi, iMigidali-Eli, iRhoremu, iBhethe-Anathi neBhethe-Tjhemetjhi. Kwaba madorobho alitjhumi nethoba nemizanawo.

³⁹ Lelo bekulilifa lekoro yakwaNafitali ukuya ngokwemindenayo, okumadorobho nemizanawo.

Ilifa lakaDani

⁴⁰ Ifumbe yekhomba yawela ekorweni yakwaDani ukuya ngokwemindenayo.

⁴¹ Umkhawulo welifa layo bewufaka phakathi iTsora, i-Etjhitawolo, i-Iri-Tjhemetjhi,

⁴² iTjhalabhini, i-Ayaloni, iJitila,

⁴³ i-Eloni, iTimna, i-Ekhironi,

⁴⁴ i-Elitekhe, iGibetoni, iBhalathi,

⁴⁵ iJehudi, iBhene-Bherakhi, iGathi-Rimoni,

⁴⁶ iMe-Jarikhoni neRakhoni kanye nemikhawulo emalungana neJafo.

⁴⁷ Kodwana bakwaDani baloba umkhawulwabo. Nje-ke bakhuphuka bayokulwa neLetjhemu, bayisahlela, bayimadlha ngesabula, bayithumba bebahlala kiyo. Bayibiza bona yiDani, bayithiyelela ngoyisemkhulu uDani.

⁴⁸ Lelo bekulilifa lekoro yakwaDani ukuya ngokwemindenayo, okumadorobho nemizanawo.

⁴⁹ Kuthe bona baqede ukwaba inarha njengelifa ngokwemikhawulwayo, ama-Israyeli anikela uJotjhuwa umsa kaNuni isabelo phakathi kwawo.

⁵⁰ Ngokomyalo kaSomnini ama-Israyeli amnikela idorobho alikhombelako, okuyiTimnathi-Serarhi ngeentatjaneni zakwa-Efrayimu. Wavuselela idorobhelo, wahlala kilo.

⁵¹ Lawo-ke mamafa u-Elazara umphristi noJotjhuwa umsa kaNuni kanye neenhloko zemindeni yaboyise beenkoro zama-Israyeli abawaba ngefumbe eTjhilo phambi kwakaSomnini emnyango wetende lokuhlanganela. Baqeda njalo-ke ukwaba inarha.