UJOTJHUWA 18 - IsiNdebele 2012 Translation

Ukwabiwa kwenarha eseleko

¹ Umkhambathi woke wama-Israyeli wahlangana eTjhilo wahloma itende lokuhlanganela lapho. Inarha leyo besele ihluliwe.

² Gade kusese neenkoro ezilikhomba hlangana nama-Israyeli ebegade zingakabi ukwabelwa ilifa lazo.

³ UJotjhuwa wathi kuma-Israyeli: “Nizolokhu nitatazela kufika nini ningangeni nithathe inarha uSomnini uZimu waboyihlo aninikele yona le?

⁴ Khuphani amadoda amathathu ekorweni ngayinye, mina ngizawathuma kobana aphume adabule inarha athale ubujamo bayo ukuze yabiwe njengelifa. Lokha nabuyela kimi

⁵ izakuhlukaniswa iingcenye ezilikhomba. Ilifa lakwaJuda lizakuhlala linjalo ngesewula nelifa lekumba kaJosefa ngetlhagwini.

⁶ Lokha nasele nithale inarha iingcenye ezilikhomba, lethani ihlathululo leyo kimi ukuze ngenze ifumbe yokwaba inarha khonapha phambi kwakaSomnini uZimethu.

⁷ AmaLevi akanasabelo phakathi kwenu ngombana ubuphristi bakaSomnini bulilifa lawo. BakwaGadi, bakwaRubeni kanye nesiquntu sakwaManase sebafumene ilifa labo ngaphetjheya kweJordani ngepumalanga okuyinarha ebayabelwa nguMosi inceku kaSomnini.”

⁸ Kuthe lokha amadoda ebekakhethelwe ukuyokuthala inarha nasele alungele ukuphuma uJotjhuwa wabuyelela umyalwakhe kiwo wathi: “Khambani nidabule inarha niyithale bese nibuyela kimi. Mina ngizanenzela ifumbe khona eTjhilwapha phambi kwakaSomnini.”

⁹ Amadoda aphuma-ke adabula inarha, atlola emsongweni ihlathululwayo ngokwamadorobhayo iingcenye ezilikhomba. Abuyela kuJotjhuwa ekampeni eTjhilo.

¹⁰ UJotjhuwa wawenzela ifumbe eTjhilo phambi kwakaSomnini, wahlukanisela ama-Israyeli inarha khonapho. Ikoro ngayinye yafumana isabelo sayo.

Ilifa lakaBhenjamini

¹¹ Ifumbe yawela ekorweni yakwaBhenjamini ngokwemindenayo. Inarha eyabelwa yona yaba hlangana kwekoro yakwaJuda neyakwaJosefa.

¹² Umkhawulo ongetlhagwini wathoma eJordani, wakhuphukela ngehlangothini langetlhagwini yentaba yeJerikho, wakhuphuka njalo uqamula intaba waya ngetjingalanga, wayokubetha erhalawumbeni leBhethe-Aveni.

¹³ Ukusuka lapho umkhawulo waqamula ngehlangothini langesewula yentatjana yeLuzi (okutjho iBhethe-Eli) ukuya enzasi e-Atharothi-Adari ukudabula phezu kwentaba engesewula yeBhethe-Rhoroni esenzasi.

¹⁴ Khonapho wajika waba mkhawulo wangetjingalanga. Ukusuka entabeni engesewula hlanu kweBhethe-Rhoroni umkhawulo wanqomba ngesewula wayokutjhayisa eKhiriyathi-Bhali (okutjho iKhiriyathi-Jeyarimu), okulidorobho lekoro yakwaJuda. Lowo-ke bekumkhawulo wangetjingalanga.

¹⁵ Umkhawulo wangesewula bewuthoma hlanu kweKhiriyathi-Jeyarimu; ukusuka ngetjingalanga uye emthonjeni weNefitowarhi,

¹⁶ wehlele emathomeni wentaba ehlanu komrhoba weBheni-Hinomu nangetlhagwini yomrhoba weRafa, urhubalale njalo ukwehlela enzasi emrhobeni kaHinomu bese uqamule ihlangothi langesewula yentaba yamaJebusi, wehlele emthonjeni weRogeli.

¹⁷ Ukusuka lapho ujikele ngetlhagwini-pumalanga uye emthonjeni weTjhemetjhi bese lapho-ke unqombe eGelilothi emalungana nomkghotha we-Adumimi, wehle njalo unqombe elitjeni lakaBhohani osizukulwana sakaRubeni.

¹⁸ Umkhawulo lowo udlulele ngehlangothini langetlhagwini yentaba magegana neBhethe-Araba, wehlele emrhobeni weJordani.

¹⁹ Godu udlulele ngehlangothini langetlhagwini yentaba yeBhethe-Rhogila bese uyokuphelela ngetlhagwini yeligu lelwandle leTswayi ekugcineni kweJordani. Lowo-ke bekumkhawulo wangesewula.

²⁰ IJordani beyimkhawulo wangepumalanga. Leyo-ke bekumikhawulo mazombe yelifa lekoro yakwaBhenjamini ukuya ngokwemindenayo.

²¹ Amadorobho wekoro yakwaBhenjamini ukuya ngokwemindenayo gade kuyiJerikho, iBhethe-Rhogila, i-Emekhi-Ketsitsi,

²² iBhethe-Araba, iTsemarayimu, iBhethe-Eli,

²³ i-Avimu, iPara, i-Ofira,

²⁴ iKefara-Hamoni, i-Ofini neGeba. Kwaba madorobho alitjhumi nambili nemizanawo.

²⁵ Amanye bekuyiGibiyoni, iRama, iBherothi,

²⁶ iMitsiphe, iKefira, iMotsa,

²⁷ iRekhemu, iJiripiyeli, iTarala,

²⁸ iTsela, i-Elefi, iJebusi (okutjho iJerusalema), iGibeya neKhiriyathi-Jeyarimu. Kwaba madorobho alitjhumi nane nemizanawo. Lelo-ke bekulilifa lekoro yakwaBhenjamini ukuya ngokwemindenayo.