UJOTJHUWA 15 - IsiNdebele 2012 Translation

Ilifa lakaJuda

¹ Ifumbe yesabelo sekoro yakwaJuda ukuya ngokwemindenayo yafikelela ngesewula yomkhawulo wakwa-Edomu ukuyela erhalawumbeni leTsini ekugcineni kwamaphethelo wenarha ngesewula.

² Umkhawulwayo wangesewula wawuthoma ekugcineni kwelwandle leTswayi ukusuka eligwini eliqalene nesewula,

³ urhubalale njalo uye ngesewula yomkghotha we-Akhirabhimu udlulele eTsini bese ukhuphukela ngesewula yeKhadetjhi-Bharineya, udlule eRhetsironi ukhuphukele e-Adari bese ujikela eKharakha,

⁴ udlulele e-Atsimoni urhubalale ngomlanjana weGibhide bese ugcine elwandle. Lowo-ke mkhawulo wangesewula.

⁵ Umkhawulo wangepumalanga lilwandle leTswayi ukuya ekugcineni kweJordani. Umkhawulo ongetlhagwini uthoma eligwini lelwandle, lapha iJordani igcina khona,

⁶ ukhuphukele eBhethe-Rhogila, udlulele ngetlhagwini yeBhethe-Araba bese ukhuphukele elitjeni lakaBhohani. (UBhohani lo bekusizukulwana sakaRubeni.)

⁷ Umkhawulo lowo wenyukela eDebhiri udabule emrhobeni we-Akori unqombe ngetjingalanga nca ngeGiligali emalungana nomkghotha we-Adumimi ongehlangothini langesewula yomlanjana. Ukusuka lapho udlulele emanzini womthombo iTjhemetjhi bese uyokutjhayisa emthonjeni iRogeli.

⁸ Ukusuka lapho wenyuke ngomrhoba weBheni-Hinomu ugege nehlangothi langesewula yentaba yamaJebusi (okutjho iJerusalema), uye esiqongolweni sentaba elinganisene nomrhoba weHinomu ngetjingalanga okumaphethelo womrhoba weRafa,

⁹ bese ujike ukusuka esiqongolweni sentaba leyo uye emthonjeni weNefitowarhi, ukusuka lapho unqombe emizaneni engentabeni i-Efroni, ujikele nca ngemzini weBhala (okutjho iKhiriyathi-Jeyarimu).

¹⁰ Ukusuka lapho ujikela ngetjingalanga uye entabeni iSeyiri, unqombe ngehlangothini elingetlhagwini yentaba iJeyarimu (okutjho iKesaloni) bese wehlele eBhethe-Tjhemetjhi, udabule eTimna.

¹¹ Ukusuka lapho umkhawulo udlula ehlangothini elingetlhagwini yentaba i-Ekhironi, ujikele nca ngeTjhikeroni udlulele entabeni iBhala bese utjhinga nca ngeJabiniyeli ubhoduluke uzokuphelela ekupheleleni kwelwandle.

¹² Umkhawulo wangetjingalanga kwakulilwandle elikhulu kanye neligu lalo. Leyo-ke mikhawulo ebegade izombeleze abantu bakwaJuda ukuya ngokwemindenabo.

¹³ Ukuya ngokomyalo kaSomnini kuJotjhuwa, uKalebi umsa kaJefune wanikelwa isabelo hlangana nabantu bakwaJuda. Isabelweso bekuyiKhiriyathi-Ariba, okutjho iRhebroni (u-Ariba gade kunguyise ka-Anakhi).

¹⁴ UKalebi waqotjha lapho amadodana amathathu ka-Anakhi okunguTjhetjhayi, u-Arhimani noTalimayi.

¹⁵ Wasuka lapho wenyuka wayokusahlela abahlali beDebhiri. Ekuthomeni iDebhiri bekuthiwa yiKhiriyathi-Seferi.

¹⁶ UKalebi wathi: “Nanyana ngubani omadlha iKhiriyathi-Seferi, ayithumbe, ngizamnikela u-Akisa indodakazami abe mkakhe.”

¹⁷ U-Otiniyeli umsa kaKhenazi, ongumfowabo omncani kaKalebi, wayithumba. UKalebi wamnikela indodakazakhe u-Akisa bona abe mkakhe.

¹⁸ Ekufikeni kwaka-Akisa ku-Otiniyeli gade amyenge bonyana akhombele uyise isimu. Kodwana kuthe nabafika kuyise, u-Akisa asehla kudumbanakhe, uKalebi wathi kuye: “Ufuna ngikwenzeleni?”

¹⁹ Yena waphendula wathi: “Ngibawa isipho. Ubaba ungibeke ngesewula yenarha eyomileko, yeke akangiphe indawo enamanzi.” Nje-ke uKalebi wamnikela indawo enamanzi emibundwini nangemirhobeni.

²⁰ Nanti ilifa lekoro yabantu bakwaJuda ukuya ngokwemindenayo:

²¹ Amadorobho wabantu bakwaJuda ngemaphethelweni wangesewula ukuyela emkhawulweni waka-Edomu bekuyiKhabitsiyeli, i-Ederi, iJaguri,

²² iKhina, iDimona, i-Adadi,

²³ iKhedetjhi, iRhatsori, iJitinani,

²⁴ iZifi, iThelemu, iBheyalothi,

²⁵ iRhatsori-Rhadata, iKheriyothi-Rhetsironi (godu okuthiwa yiRhatsori),

²⁶ i-Amamu, iTjhema, iMolada,

²⁷ iRhatsari-Gada, iRhetjhimoni, iBhethe-Pelethi,

²⁸ iRhatsari-Tjhuwali, iBheritjheba, iBhiziyothiya,

²⁹ iBhala, i-Iyimu, i-Etsemu,

³⁰ i-Elitoladi, iKesili, iRhorima,

³¹ iTsikhilagi, iMadimana, iSansana,

³² iLebawothi, iTjhilirhimu, i-Ayini neRimoni. Sele awoke kwaba madorobho amatjhumi amabili nethoba nemizanawo.

³³ Eendaweni ezithulamelwe ziintaba bekuyi-Etjhitawoli, iTsora, i-Atjhina,

³⁴ iZanowarhi, i-Eni-Ganimu, iTapuwarhi, i-Enamu,

³⁵ iJarimuthi, i-Adulamu, iSoko, i-Azekha,

³⁶ iTjhayarayimu, i-Aditayimu, iGedera neGederotayimu. Kwaba madorobho alitjhumi nane nemizanawo.

³⁷ Hlanu kwamadorobho lawo bekunalawa: iTsenani, iRhadatjha, iMigidali-Gadi,

³⁸ iDilani, iMitsiphe, iJokitiyeli,

³⁹ iLakitjhi, iBhotsikhathi, i-Egiloni,

⁴⁰ iKaboni, iLarhimasi, iKitilitjhi,

⁴¹ iGederothi, iBhethe-Dagoni, iNama neMakheda. Kwaba madorobho alitjhumi nathandathu nemizanawo.

⁴² Amanye godu bekuyiLibhina, i-Eteri, i-Atjhani,

⁴³ iJifitarhi, i-Atjhina, iNetsibi,

⁴⁴ iKheyila, i-Akziba neMaretjha. Kwaba madorobho alithoba nemizanawo.

⁴⁵ Godu i-Ekhironi nemizayo kanye nemizanayo;

⁴⁶ ukusuka e-Ekhironi ukuya elwandle, woke amadorobho ebegade amagegana ne-Atjhidodi nemizanawo.

⁴⁷ Godu ukusuka e-Atjhidodi nemizayo kanye nemizanayo neGaza nemizayo kanye nemizanayo ukuya emlanjaneni weGibhide nelwandle eliKhulu kanye neligu lalo.

⁴⁸ Ngenarheni yangeentabeni, kwaba yiTjhamiri, iJatiri, iSoko,

⁴⁹ iDana, iKhiriyathi-Sana (okutjho iDebhiri),

⁵⁰ i-Anabi, i-Etjhitemo, i-Animu,

⁵¹ iGotjheni, iRholoni neGilo. Kwaba madorobho alitjhumi nanye nemizanawo.

⁵² Amanye godu bekuyi-Arabu, iRuma, i-Etjhani,

⁵³ iJanimu, iBhethe-Tapuwarhi, i-Afekha,

⁵⁴ iRhumeta, iKhiriyathi-Ariba (okutjho iRhebroni) neTsiwori. Kwaba madorobho alithoba nemizanawo.

⁵⁵ Godu kwaba yi-Mawoni, iKarameli, iZifi, iJutha,

⁵⁶ iJizriyela, iJokideyamu, iZanowarhi,

⁵⁷ iKhayini, iGibeya neTimina. Kwaba madorobho alitjhumi nemizanawo.

⁵⁸ Godu iRhalirhuli, iBhethe-Tsuri, iGedori,

⁵⁹ iMarathi, iBhethe-Anothi ne-Elitekhoni. Kwaba madorobho asithandathu nemizanawo.

⁶⁰ Godu iKhiriyathi-Bhali (okutjho iKhiriyathi-Jeyarimu) neRaba. Kwaba madorobho amabili nemizanawo.

⁶¹ Erhalawumbeni kwaba yiBhethe-Araba, iMidini, iSekaka,

⁶² iNibitjhani, i-Iri-Hamelarhi ne-Eni-Gedi. Kwaba madorobho asithandathu nemizanawo.

⁶³ Kodwana abantu bakwaJuda azange baphumelele ukuqotjha amaJebusi, okubahlali beJerusalema; yeke amaJebusi ahlala nabantu bakwaJudabo eJerusalema bekube kunamhlanje.