UJOTJHUWA 13 - IsiNdebele 2012 Translation

Iindawo ezingazange zihlulwe

¹ UJotjhuwa bekasele aluphele namalanga ayile. USomnini wathi kuye: “Sele uluphele begodu namalanga sele ayile, kanti kusese nenarha ekulu ekusafanele ithunjwe.

² Nasi inarha esaseleko: Zoke iimfunda zamaFilista nezamaGetjhuri

³ ukusuka emlanjaneni omkhawulo wangepumalanga yeGibhide ukuyokufika emkhawulweni we-Ekhironi ngetlhwagwini. (Iindawezo bezithathwa bona ngezamaKanana kodwana bezibuswa babusi abahlanu bamaFilista eemfundeni ezilandelako: iGaza, i-Atjhidodi, i-Atjhikeloni, iGathi, ne-Ekhironi. Ama-Awi nawo gade ahlala

⁴ ngesewula yenarha.) Yoke inarha yamaKanana, okutjho ukusuka e-Ara yamaTsidoni ukuya e-Afekhi ukufika emkhawulweni wama-Amori.

⁵ Godu nenarha yamaGibili neLibhanoni yoke ngepumalanga, ukusuka eBhali-Gadi ngenzasi kwentaba iRherimoni ukuya eLebo-Rhamathi.

⁶ Lokhu kutjho boke abahlali bangeentabeni ukusuka eLibhanoni ukuya eMisirefothi-Mayimu ngitjho woke amaTsidoni. Ngizabaqotjha mina ngokwami phambi kwama-Israyeli, wena yabela nje kwaphela ama-Israyeli inarha leyo ibe lilifa lawo njengombana ngakuyala.

⁷ Yeke hlukanisa inarha le kobana ibe lilifa leenkoro ezilithoba kanye nesiquntu sakwaManase.”

Ukwabiwa kwenarha engepumalanga yeJordani

⁸ UMosi inceku kaSomnini wabela isiquntu sekoro yakwaManase, ikoro yakwaRubeni neyakwaGadi isabelo sazo ngaphetjheya kweJordani ngepumalanga. Iinkorwezo zathatha ilifa lazwelo, kwaba njengombana zabelwa nguMosi.

^9-10 Imikhawulo yenarhazo beyisuka edorobheni i-Aroweri eliseligwini lomlanjana i-Arinoni ngekabeni yomrhoba wakhona ukuyokufika emkhawulweni wama-Amoni. Beyifaka phakathi inarha eyikangala ukusuka eMedeba ukuya eDibhoni kanye nawo woke amadorobho wakaSirhoni ikosi yama-Amori ogade abusa eRhetjhibhoni.

¹¹ Imikhawulo yenarhazo leyo godu beyinabela eGiliyadi, emkhawulweni wamaGetjhuri namaMakathi, kiyo yoke intaba iRherimoni neBhatjhani ukuya eSaleka,

¹² okutjho yoke imibuso ka-Ogi weBhatjhani obusa e-Atjhitarothi ne-Edreyi. (U-Ogi lo besele kunguye kwaphela oseleko hlangana nemisalela yamaRafa.) UMosi wahlula ama-Amori lawo bewawaqotjha,

¹³ kodwana ama-Israyeli azange aqotjhe amaGetjhuri namkha amaMakathi; yeke izizwezo zazihlalela hlangana nama-Israyeli bekube kunamhlanje.

¹⁴ Kwaba yikoro yamaLevi kwaphela uMosi angazange ayabele ilifa ngombana ilifa lawo bekuminikelo ekhethekileko kuSomnini uZimu wakwa-Israyeli njengombana atjho kuye.

Ilifa lakaRubeni

¹⁵ UMosi wanikela ikoro yakwaRubeni ilifa ukuya ngemindenayo.

¹⁶ Imikhawulwayo beyisuka edorobheni i-Aroweri eliseligwini lomlanjana i-Arinoni ngekabeni yomrhoba wakhona ukufaka phakathi yoke ikangala ukuyokufika eMedeba

¹⁷ neRhetjhibhoni kanye nemizanayo yoke esekangala. Imikhawulo yenarha leyo beyifaka phakathi iDibhoni, iBhamothi-Bhali, iBhethe-Bhali-Mewoni,

¹⁸ iJahatsi, iKhedemothi, iMefathi,

¹⁹ iKhiriyathayimu, iSibima, iTserethi-Hatjharhari entabeni ethulamele umrhoba,

²⁰ iBhethe-Pewori, amathomo wentaba iPisiga kanye neBhethe-Jetjhimoni.

²¹ Ngilawo-ke amadorobho wekangala okutjho yoke imibuso kaSirhoni ikosi yama-Amori owabusa eRhetjhibhoni. UMosi wabulala uSirhoni loyo kanye nabarholi beMidiyani, u-Evi, uRekhemu, uZuri, uRhuri noReba okumakhosana kaSirhoni agade ahlala enarhenapho.

²² Hlangana nabo boke ababulawa ma-Israyeli ngesabula kwakunoBhiliyamu umsa kaBhewori, umbhuli.

²³ Umlambo iJordani gade umkhawulo wamaRubeni. Amadorobho lawo nemizanawo gade kulilifa lamaRubeni ukuya ngemindenawo.

Ilifa lakaGadi

²⁴ UMosi godu wabela ikoro yakwaGadi ilifa ukuya ngokwemindenayo.

²⁵ Imikhawulo yenarhayo kwakuyiJazeri nawo woke amadorobho weGiliyadi nesiquntu senarha yakwa-Amoni ukuya e-Aroweri engepumalanga yeRabha.

²⁶ Imikhawulo leyo beyithoma eRhetjhibhoni ukuya eRamathi-Mitsiphe neBhethonimu nokusuka eMarhanayimu ukuya emkhawulweni weLo-Debhara.

²⁷ Godu beyifaka phakathi amanye amadorobho angemrhobeni weJordani, okutjho iBhethe-Haramu, iBhethe-Nimra, iSukothi neTsafoni. Lokhu kutjho ubunengi bombuso kaSirhoni ikosi yeRhetjhibhoni ngepumalanga yomlambo iJordani. IJordani leyo kwaba mkhawulo wakhona ukuyela ngesewula yelwandle leKinerethi.

²⁸ Amadorobho lawo nemizanawo gade kulilifa lamaGadi ukuya ngokwemindenawo.

Ilifa lesiquntu sekoro yakwaManase

²⁹ UMosi godu wabela isiquntu sekoro yakwaManase ilifa ngokwemindenaso.

³⁰ Imikhawulo yaso isuka eMarhanayimu ifake phakathi iBhatjhani yoke, okutjho woke umbuso ka-Ogi ikosi yakhona nemizi yoke yeRhavothi-Jayire eseBhatjhani, ebeyingaba madorobho amatjhumi asithandathu.

³¹ Imikhawulo leyo godu beyifaka phakathi isiquntu sakwaGiliyadi, i-Atjhitarothi ne-Edreyi, okumadorobho wobukhosi baka-Ogi eBhatjhani. Lezo bekuziindawo ezanikelwa isiquntu sekoro yakwaManase okuziinzukulwana zakaMakiri ngokwemindenazo.

³² Lelo-ke kwaba lilifa uMosi alaba lokha nagade angemrhobeni weJordani kwaMowabi malungana neJerikho.

³³ UMosi azange ayabele litho ikoro yamaLevi ngombana isabelo sayo nguSomnini uZimu njengombana kwatjhiwo njalo kiyo.