UJOTJHUWA 11 - IsiNdebele 2012 Translation

Ukuthunjwa kwenarha yangetlhagwini

¹ Kwathi bona uJabhini ikosi yeRhatsori ezwe ngeendabezi, wathumela igama kuJobabi ikosi yeMadoni, ekosini yeTjhimroni nekosini ye-Akitjhafi.

² Igamelo lafika nemakhosini ebegade angeentabeni zangetlhagwini, angemrhobeni weJordani ngesewula yelwandle iKinerethi, nangenarheni ethulamelwe ziintaba neligwini leDori ngetjingalanga.

³ Godu lafika kumaKanana ngepumalanga netjingalanga, ama-Amori, amaRhithi, amaPerizi namaJebusi ngeentabeni namaRhivi angaphasi kwakaRherimoni enarheni yeMitsipha.

⁴ Amakhosi lawo aphuma nawo woke amabuthwawo, kwaba liwoma, kwanga yitjhwabatjhwaba yelwandle. Godu bekuneenjomani neenkarana zepi ezinengi khulu.

⁵ Woke amakhosi lawo abuthana, ahloma amatendawo ndawonye emanzini weMeromi kobana alwe no-Israyeli.

⁶ USomnini wathi kuJotjhuwa: “Ungawesabi ngombana kusasa ngesikhathesi ngizowanikela woke esandleni sama-Israyeli afile. Wena uquntule imisipha yeenjomani zawo bese utjhise iinkarana zawo.”

⁷ Yeke uJotjhuwa nawo woke amadoda wepi bawavelela, bawathelekela emanzini weMeromi.

⁸ USomnini wanikela amakhosi lawo nabantu bawo esandleni sama-Israyeli, abamadlha, abagijimisa bekwaba seTsidoni eKulu neMisrefothi-Mayimu ukufikela ngemrhuleni weMitsiphe ngepumalanga. Ama-Israyeli abamadlha, angatjhiya namunye wabo owaphunyurhako.

⁹ UJotjhuwa wenza kibo njengombana uSomnini amyalile, waqunta imisipha yeenjomani zabo bewatjhisa neenkarana zabo zepi.

¹⁰ UJotjhuwa wabuyela emuva ngesikhatheso, wathumba iRhatsori ngombana phambilini gade iyihloko yayo yoke imibuso leyo, bewamadlha ikosi yakhona ngesabula.

¹¹ Yena nama-Israyeli bamadlha ngesabula koke okuphilako okukiyo. Babhubhisa koke nya kwangaba khona okusala kuphila. Godu batjhisa iRhatsori.

¹² Iye, uJotjhuwa bekenze njengombana uMosi inceku kaSomnini amyalile: Bekamadlhe ngesabula woke amakhosi lawo bewabhubhisa nabo boke abahlali bamadorobhawo.

¹³ Nokho ama-Israyeli azange atjhise nalinye lamadorobho ngaphandle kweRhatsori eyatjhiswa nguJotjhuwa. Amadorobho lawo nanje asajame embundwini.

¹⁴ Ama-Israyeli azithathela yoke ipango yamadorobho lawo kanye nefuyo; kwaba sisabelo sawo. Kodwana bekamadlhe boke abantu ngesabula kufikela lapha abaqeda khona nya; azange batjhiye namunye aphila.

¹⁵ Njengombana uSomnini ayala incekwakhe uMosi, uMosi wayala uJotjhuwa, uJotjhuwa waphetha njengokomyalo lowo, azange atjhiye litho lingakenziwa kikho koke uSomnini akuyala uMosi.

¹⁶ Ngaleyondlela uJotjhuwa wathatha yoke inarha, okutjho iintaba zakwaJuda, yoke inarha yangesewula neyeGotjheni, iTjhefela, umrhoba weJordani, iintaba zakwa-Israyeli neendawo ezithulamelwe ziintaba.

¹⁷ Imikhawulo le ithoma entabeni iRhalakha enabele ngeSeyiri ukuyokufika eBhali-Gadi ngemrhobeni weLibhanoni ngenzasi kwentaba iRherimoni. Wabamba woke amakhosi wakhona, wawamadlha, wawabulala.

¹⁸ Kwaba sikhathi eside uJotjhuwa asilwa nawo woke amakhosi lawo.

¹⁹ Azange kube nedorobho elaba nokuthula nama-Israyeli ngaphandle kwamaRhivi, okubahlali beGibiyoni. Ama-Israyeli athumba koke ngepi.

²⁰ Kwaba sisenzo sakaSomnini sokuqinisa iinhliziyo zamakhosi lawo kobana ajamelane nama-Israyeli epini ukuze amakhosi lawo abhujiswe nya, nokobana angafumani umusa kodwana apheliswe njengombana uSomnini ayala uMosi.

²¹ UJotjhuwa weza ngesikatheso, wathanyela ama-Anakhi eentabeni zakwa Juda nakizo zoke iintaba zakwa-Israyeli. Wawabhubhisa nya namadorobhawo iRhebroni, iDebhiri ne-Anaba.

²² Azange kusale namunye wama-Anakhi enarheni yama-Israyeli. Kwaba seGaza, eGathi ne-Atjhidodi kwaphela lapha kwaba khona abasindako.

²³ UJotjhuwa wathatha yoke inarha ukuya ngendlela uSomnini akhuluma ngakho kuMosi. UJotjhuwa wayinikela bona ibe lilifa lama-Israyeli ukuya ngokwesabelo seenkoro zawo. Ngesikhatheso inarha yaphumula izipi.