UJOTJHUWA 10 - IsiNdebele 2012 Translation

Ipi eGibiyoni

¹ U-Adonitsedekhi ikosi yeJerusalema wezwa bona uJotjhuwa uthumbe i-Ayi bewayibhubhisa nya. Wezwa godu bonyana i-Ayi nekosi yakhona uyenze njengalokho akwenza ngeJerikho nekosi yakhona, nokobana abahlali beGibiyoni babe nokuthula naye begodu sele bangaphasi kwama-Israyeli.

² Yena nabantu bakhe bahlalela evalweni ngalokho ngombana iGibiyoni gade kulidorobho elikhulu, elalifana nelinye lamadorobho webukhosini. IGibiyoni beyidlula i-Ayi begodu namadoda wakhona aziingorho.

³ Yeke u-Adonitsedekhi ikosi yeJerusalema wathumela ilizwi kuHohami ikosi yeRhebroni, uPiramu ikosi yeJarimuthi, uJafiya ikosi yeLakitjhi nakuDebiri ikosi ye-Egiloni wathi:

⁴ “Khuphukani nizapha nizongisiza sisahlele iGibiyoni ngombana yenze ukuthula noJotjhuwa nama-Israyeli.”

⁵ Amakhosi amahlanu wama-Amori lawo, okuyikosi yeJerusalema, ikosi yeRhebroni, ikosi yeJarimuthi, ikosi yeLakitjhi nekosi ye-Egiloni, ahlanganisa woke amabuthwawo ndawonye, akhuphuka, avimbezela iGibiyoni bona alwe nayo.

⁶ Amadoda weGibiyoni athumela ilizwi kuJotjhuwa ekampeni eGiligali athi: “Ungaliseleli iinceku zakho, yewukhuphuke msinya uzosisindisa ngokusisiza ngombana woke amakhosi wama-Amori ahlala ngeentabeni abuthene kobana ajamelane nathi.”

⁷ UJotjhuwa wakhuphukela eGiligali akhamba nawo woke amadoda wepi neengorho zoke.

⁸ USomnini wathi kuJotjhuwa: “Ungabesabi ngombana sele ngibanikele esandleni sakho. Akunandoda nayinye phakathi kwabo ezakujama phambi kwakho.”

⁹ UJotjhuwa wasuka eGiligali, warhwanta ubusuku boke wavelela amakhosi lawo angakatjheji.

¹⁰ USomnini wenza amakhosi lawo nabantu bawo bona bahlangahlangane phambi kwama-Israyeli, abadulela eGibiyoni abagijimisa ngendlela eyehlelako yeBhethe-Rhoroni, abamadlha kufikela e-Azekha neMakheda.

¹¹ Nabalokhu babaleka phambi kwama-Israyeli, nabehlela emehlelweni weBethe-Rhoroni, uSomnini wawululela iingiditjha zesinanja phezu kwabo bekwaba se-Azekha, bafela khonapho. Abafa ngebanga leengiditjha zesinanja baba banengi ukudlula ababulawa ma-Israyeli ngesabula.

¹² UJotjhuwa wakhuluma noSomnini mhlana anikela ama-Amori kuma-Israyeli, wathi phambi kwawo: “Langa, jama tsi ngehla kweGibiyoni, nawe nyezi ngehla komrhoba we-Ayaloni.”

¹³ Ngambala ilanga lajama nenyezi yangakhambi, kufikela lapha isizwe sizibuyiselela khona ezitheni zaso. Lokhu kwatlolwa encwadini kaJatjhari. Ilanga lajama phakathi kwesibhakabhaka, azange lirhabe ukutjhinga isikhathi esingaba lilanga.

¹⁴ Azange kube nelanga elifana nalo ngaphambilini namkha ngemva kwalo, kobana uSomnini ulalele ilizwi lomuntu ngombana mhlokho walwela ama-Israyeli.

¹⁵ UJotjhuwa wabuyela ekampeni eGiligali nawo woke ama-Israyeli.

¹⁶ Amakhosi amahlanu lawo abaleka, azifihla ngerholweni leMakheda.

¹⁷ Bekubikwe kuJotjhuwa kwathiwa: “Amakhosi amahlanu afunyenwe azifihle ngerholweni leMakheda.”

¹⁸ UJotjhuwa wathi: “Sunduzelani ilitje elikhulu emlonyeni werholo, nibeke amadoda awagade,

¹⁹ kodwana ningahlali lapho nina ngokwenu. Gijimisani izitha zenu, nibe seenthendeni zazo, ningazivumeli zingene ngemadorobhenazo ngombana uSomnini uZimenu uzinikele esandleni senu.”

²⁰ Kwathi ngemva kobana uJotjhuwa nama-Israyeli bamadlhe khulu izithezo kufikela lapha ziphela khona nya, nalokha abasindileko sele bangene ngemadorobheni anemithangala,

²¹ boke abantu babuyela baphephile kuJotjhuwa ekampeni yeMakheda. Akunamuntu owavula umlomakhe ngama-Israyeli.

²² UJotjhuwa wathi: “Vulani umlomo werholo bese nilethe amakhosi amahlanu lawo kimapha.”

²³ Yeke benza njalo, bakhupha amakhosi amahlanu lawo ngerholweni bawaletha kuye. Gade kuyikosi yeJerusalema, ikosi yeRhebroni, ikosi yeJarimuthi, ikosi yeLakitjhi nekosi ye-Egiloni.

²⁴ Lokha nabaletha amakhosi lawo kuJotjhuwa, uJotjhuwa wabiza woke amadoda wakwa-Israyeli wathi eenduneni zamadoda wepi ebegade zikhambe nawo: “Tjhidelani, nibeke iinyawo zenu phezu kweentamo zamakhosi la.” Yeke zatjhidela, zabeka iinyawo zazo eentanyeni zawo.

²⁵ UJotjhuwa wathi kizo: “Ningesabi namkha niphelelwe mamandla. Qinani nibe nesibindi ngombana ngilokho uSomnini azakwenza kizo zoke izitha zenu enilwa nazo.”

²⁶ Ngemva kwalokho uJotjhuwa wawamadlha, wawabulala bewawahlomela enye nenye esigodweni sayo. Alembelela eengodwenapho bekwahlwa.

²⁷ Kodwana kwathi nakutjhinga ilanga, uJotjhuwa wayala bonyana aphanyulwe eengodweni, wawaphosela ngerholweni lapha begade azifihle khona. Kwabekwa amatje amakhulu emlonyeni werholwelo, asese lapho nanamhlanje.

²⁸ UJotjhuwa wathatha iMakheda mhlokho wayimadlha kanye nekosi yakhona ngesabula. Wabhubhisa nya koke okuphilako okungedorobhenapho. Azange atjhiye nakunye kuphunyurhile. Ikosi yeMakheda wayenza asenze ikosi yeJerikho.

Ukuthunjwa kwenarha yangesewula

²⁹ UJotjhuwa wasuka eMakheda nama-Israyeli woke wanqomba eLibhina bona alwe nayo.

³⁰ USomnini wanikela iLibhina nekosi yakhona esandleni sama-Israyeli. UJotjhuwa wayimadlha ngesabula nakho koke okuphilako okukiyo. Azange atjhiye nakunye kuphunyurhile. Ikosi yakhona wayenza asenze ikosi yeJerikho.

³¹ UJotjhuwa wasuka eLibhina nama-Israyeli woke wanqomba eLakitjhi. Wayivimbezela wayisahlela.

³² USomnini wanikela iLakitjhi esandleni sama-Israyeli. Ngelanga lesibili uJotjhuwa wayithumba, wayimadlha ngesabula nakho koke okuphilako okukiyo njengombana enza ngeLibhina.

³³ Kwathi lokha uHoramu ikosi yeGezeri nenyuka ukusiza iLakitjhi, uJotjhuwa wamumadlha kanye nabantu bakhe, wangatjhiya namunye wakhe ophunyurhako.

³⁴ UJotjhuwa wasuka eLakitjhi nama-Israyeli woke banqomba e-Egiloni. Bafese bayivimbezela bayisahlela,

³⁵ bayithumba khona mhlokho, bayigongoda ngesabula. UJotjhuwa wabhubhisa nya koke okuphilako okukiyo njengombana enza ngeLakitjhi.

³⁶ UJotjhuwa wasuka e-Egiloni akhamba nama-Israyeli woke, banqomba eRhebroni. Bafese bayisahlela,

³⁷ bayithumba, bayigongoda ngesabula. UJotjhuwa wabhubhisa ikosi nemizana yakhona yoke, nakho koke okuphilako okukiyo. Azange atjhiye nakunye kuphunyurhile; kwaba njengombana enza nge-Egiloni. Iye, wayibhubhisa nya nakho koke okuphilako okukiyo.

³⁸ UJotjhuwa nawo woke ama-Israyeli babuyela eDebhiri, nayo bayisahlela.

³⁹ Bayithumba nekosi yakhona kanye nemizana yakhona yoke. Bayigongoda ngesabula, babhubhisa nya koke okuphilako okukiyo. UJotjhuwa azange atjhiye nakunye kuphunyurhile. Lokho akwenza ngeRhebroni neLibhina namakhosi wakhona, wakwenza ngeDebhiri nekosi yakhona.

⁴⁰ Ngaleyondlela uJotjhuwa wathumba soke isifunda sesewula: iintaba, isewula yenarha, iTjhefela kanye namathomo wakhona. Wabhubhisa woke amakhosi wesifundeso. Azange atjhiye nakunye kuphunyurhile, iye, wabhubhisa nya koke okuphilako njengombana uSomnini uZimu wakwa-Israyeli ayalile.

⁴¹ UJotjhuwa wabamadlha boke ukusuka eKhadetjhi-Bharineya ukuya eGaza, nayo yoke inarha yeGotjheni ukuyokufika eGibiyoni.

⁴² Wathumba woke amakhosi lawo nenarhawo ngasikhathi sinye ngombana uSomnini uZimu waka-Israyeli walwela u-Israyeli.

⁴³ Yena nama-Israyeli woke babuyela ekampeni eGiligali.