UJOTJHUWA 1 - IsiNdebele 2012 Translation

USomnini uyala uJotjhuwa

¹ Ngemva kokuhlongakala kwakaMosi inceku kaSomnini, uSomnini wathi kuJotjhuwa umsa kaNuni omsizi kaMosi:

² “UMosi incekwami uhlongakele. Yeke zilungiselele ukuyama iJordani le, wena nabo boke abantwaba, niye enarheni engiyipha ama-Israyeli.

³ Yoke indawo lapha kugadanga khona iinyawo zenu ngininikele yona njengombana ngathembisa uMosi.

⁴ Ukusuka erhalawumbeneli ukuya eLibhanoni begodu nokusuka emlanjeni omkhulu iYufrathe ukuyokufika elwandle elikhulu ngetjingalanga, okutjho yoke inarha yamaRhithi, kuzakuba yinarhenu.

⁵ Imihla yoke yokuphila kwakho akunamuntu ozakujama phambi kwakho. Ngizakuba nawe njengombana nganginoMosi. Angeze ngakulahla namkha ngikutjhiye.

⁶ Qina ube nesibindi ngombana nguwe ozokwenza bonyana abantwaba bazuze inarha engayifungela kiboyisemkhulu bona ngizabanikela yona.

⁷ Kwaphela nje wena, qina amandla ube nesibindi khulu, uyelele ukwenza ukuya ngawo woke umthetho incekwami uMosi eyakuyala ngawo. Ungaphambukeli ngesigomeni namkha ngesinceleni ukuze ube nepumelelo koke lapha ukhamba khona.

⁸ Incwadi yomthetho le ingasuki emlonyenakho, kodwana zindla ububule ngayo ubusuku nemini ukuze uyelele ukwenza ukuya ngakho koke okutlolwe kiyo. Ngalokho uzakwenza iindlela zakho zibe mhlophe bese uba nepumelelo.

⁹ Angithi ngikuyalile: Qina-ke ube nesibindi. Ungabi nevalo namkha uphele amandla ngombana uSomnini uZimakho unawe koke lapha ukhamba khona.”

¹⁰ Yeke uJotjhuwa wayala iinduna zabantu bona

¹¹ zikhambe ziye ebantwini ngekampeni zifese zithi: “Lungisani imiphako ngombana emalangeni amathathu nizokuyama iJordani niyokuthumba inarha uSomnini uZimenu aninikele yona bona ibe lilifa lenu.”

¹² UJotjhuwa wathi kebakwaRubeni, bakwaGathi nesiquntwini sekoro yakwaManase:

¹³ “Khumbulani igama inceku kaSomnini uMosi eyaniyala ngalo nayithi, ‘USomnini uZimenu unibonelele ngendawo yokuphumula lokha nakanipha inarha le.’

¹⁴ Abafazi nababuthakathaka benu bazakusala kanye neenkomo zenu enarheni uMosi aninikele yona nganeno kweJordani. Kodwana zoke iingorho phakathi kwenu zizakuyama zihlomile ngaphambi kwabafowenu kobana zibasize,

¹⁵ kufikela lapha uSomnini anikela khona abafowenu ukuphumula njengani lokha nabo nabathumba inarha abayinikelwe nguSomnini uZimenu. Nje-ke ngemva kwalokho ningabuyela enarheni elilifa lenu, nihlale kiyo, okutjho inarha uMosi inceku kaSomnini aninikele yona ngepumalanga yeJordani.”

¹⁶ Baphendula uJotjhuwa bathi: “Koke osiyala ngakho sizakwenza nalapha usithuma khona sizakuya.

¹⁷ Njengombana salalela uMosi kikho koke, nawe sizakulalela. Inga uSomnini uZimakho angaba nawe njengombana gade anoMosi!

¹⁸ Nanyana ngubani ojamelana nemiyalwakho ngokungalaleli amezwakho kinamkha yini omyala ngayo, akabulawe. Wena qina ube nesibindi.”