UJOROMIYA 9 - IsiNdebele 2012 Translation

¹ Maye, thana ihlokwami beyisiyalu samanzi namehlwami amthombo weenyembezi! Bengizakulila ubusuku nemini ngenca yabantu bekhethu abarhayiliweko.

² USomnini uthi: “Thana benginendawo erhalawumbeni lapha iinkhambi ziphumulela khona ukuze ngitjhiye abantu bami, ngiye endaweni ekude nabo, ngombana boke baziinhlobongi, iye, ihlangano yabangakathembeki.

³ Balungisa amalimabo njengomsubela emsebeni. Baziinkutani enarheni, kodwana ingasi eqinisweni! Baragela phambili nokonakala; nakungimi yena abangazi.” Kutjho uSomnini.

⁴ “Yelelani abangani benu, ningathembi nanyana ngubani wabafowenu ngombana omunye nomunye wabafowenu umkhapheli nomunye nomunye umngani umhlebi.

⁵ Bayaphoqana begodu abakhulumi iqiniso; bajayeza amalimabo ukukhuluma amala. Badurhile,

⁶ abasabuyi. Kukugandelela phezu kokugandelela nekohliso phezu kwekohliso! Bala ukungamukela.” Kutjho uSomnini.

⁷ Ngalokho-ke nakhu okutjhiwo nguSomnini uMninimandlawoke: “Qala, sele ngizobancibilikisa bengibahlole. Yini okhunye engingakwenza ngabantu bami na?

⁸ Amalimabo amisubela ebhubhisako, akhuluma ikohliso. Ngomlomakhe, omunye nomunye wabo ukhuluma kuhle nomakhelwanakhe, kodwana ehliziywenakhe umbekela isifu.

⁹ Kumele ngingabahlunguphazi ngalokhu na? Ngingazibuyiseleli phezu kwesizwe esinjengalesi na?” Kutjho uSomnini.

¹⁰ Ngizakuthoma ingoma yokukhihla isililo ngililele imibundu; ngizile mayelana namadlelo werhalawumba ngombana sele alifusi. Akusenamuntu odlula lapho; ukulila kweenkomo akusezwakali, iinyoni ngitjho neenlwana sele kumukile.

¹¹ USomnini uthi: “IJerusalema ngizayenza isiqorho samatje, idzaba leempungutjha; ngenze amadorobho wakwaJuda abe libhudu, ukuze kungabi nomuntu ohlala kiwo.”

¹² Ngubani ohlakaniphe ngokwaneleko ukwazi lokhu na? USomnini ngokwakhe ukhulume nobani ukuze umuntu loyo akumemezele na? Kubayini inarha irhayilwe beyaba libhudu njengerhalawumba, kwangasaba nomuntu odlula kiyo?

¹³ USomnini uthi: “Kungombana balahle umthethwami engiwubeke phambi kwabo. Azange bangilalele namkha balandele umthethwami.

¹⁴ Esikhundleni salokho balandele ukukhunyalala kweenhliziyo zabo, balandela aboBhali njengombana bafundiswa boyise.”

¹⁵ Ngalokho-ke nakhu okutjhiwo nguSomnini uMninimandlawoke, uZimu wakwa-Israyeli uthi: “Qalani, sele ngizokwenza abantwaba bagome iinthelo ezimunyu, basele amanzi anobuthi.

¹⁶ Ngizabahlakaza hlangana nezizwe abangazaziko ngitjho naboyisemkhulu abangazange khebazibone. Ngizabagijimisa ngesabula kufikela lapha ngibarhayila khona.”

¹⁷ Nakhu okwatjhiwo nguSomnini uMninimandlawoke wathi: “Yelelani-ke! Bizani abafazi besililo ukuze beze, iye, nifune abanekghono lokulila beze.”

¹⁸ Nje-ke umphorofidi wathi: “Iye, abarhabe bathome basililele, amehlwethu abe atshege iinyembezi, kuwuluke amanzi eenkopheni zethu.

¹⁹ Mbala, sele kuzwakele isililo eZiyoni sithi, ‘Maye, sirhayilwe kangangani! Sihlaziswe khulu ngombana bekumele sisukele inarhethu imizethu yaba marubhi!’

²⁰ “Yeke nina bafazi, yenizwe ilizwi lakaSomnini, vulani iindlebe zenu nilalele ilizwi lomlomakhe. Fundisani amadodakazenu ukukhihla ingoma yesililo iye, ngitjho nabomakhelwana benu.

²¹ Mbala, ukufa kungene ngamafesiderethu, kwangena ngemibhotjhongwenethu kwabulala abantwana eendledlaneni namasokana ematatawini.”

²² USomnini uthi: “Wena Joromiya, yithi kibo, ‘Nakhu okutjhiwo nguSomnini: Iindumbu zabantu zizakurabhalala njengomsuqwa emasimini nanjengekoroyi esikiweko ngemva komvuni. Kodwana akakho ozayibuthelela.’ ”

Ukusoka akumsindisi umuntu

²³ Nakhu okutjhiwo nguSomnini: “Isihlakaniphi asingazikhakhazisi ngobuhlakani baso, namkha itsitsirimba iziphakamise ngeenqababa zayo nesikhumkani singazigqaji ngomnonwaso,

²⁴ kodwana ozigqajako akazigqaje ngokobana uyangilemuka begodu uyangazi bona nginguSomnini owenza ukwethembeka, ubulungiswa kanye nokulunga ephasini. Iye, ngikho lokho okungijabulisako.” Kutjho uSomnini.

²⁵ USomnini uthi: “Isikhathi siyeza lapha ngizakuhlunguphaza khona boke abasoke enyameni kwaphela,

²⁶ okutjho iGibhide, iJuda, i-Edomu, ama-Amoni, iMowabi nabo boke abahlala erhalawumbeni abagude iinhloko zabo eenhlafunyweni. Njengayo yoke ikumba ka-Israyeli, zoke izizwezi azikasokwa ehliziyweni.”