UJOROMIYA 8 - IsiNdebele 2012 Translation

¹ “Ngesikhatheso, amathambo wamakhosi neenkhulu zakwaJuda, amathambo wabaphristi newabaphorofidi kanye namathambo wabantu beJerusalema azakususwa emazindlenawo.” Kutjho uSomnini.

² “Amathambo wabantwaba azakunekeka elangeni, enyezini neenkwekwezini zoke zomkayi ebebazithanda bebazilotjha, badlhemadlhema ngemva kwazo bebaphengula kizo, bazikhothamela. Angeze abuthwa namkha angcwatjwe, kodwana azakuba njengomsuqwa emasimini.

³ Kizo zoke iindawo lapha ngizabaqotjhela khona, boke abamisalela bazakwenyula ukufa kunokuphila, iye, labo abaseleko ekorweni ekhohlakeleko le. Abaphunyurhako besizwe esikhohlakelekwesi bazakwenyula ukufa kunokuphila.” Kutjho uSomnini uMninimandlawoke.

Isono nesibetho

⁴ “Wena Joromiya, yithi kibo uSomnini uthe: “Umuntu nawako azakhe avuke na? Umuntu naphambukako azakhe abuye na?

⁵ Alo, kubayini-ke abantwaba bahlala baqoqoma? IJerusalema iphila ngokuhlubuka. Banamathela ekohlisweni, abafuni ukubuya.

⁶ Ngilalelisise kuhle: Abakhulumi okulungileko. Akakho ophendukako ebukhohlakalini bakhe athi, ‘Yintobani engiyenzako le?’ Boke baphambuka masinyana njengenjomani igijimela epini.

⁷ Ngitjho nodoyi emkayini uyasazi isikhathi sakhe sokubuya, izuba nekonjani ziyazazi iinkhathi zazo zokugoduka. Kodwana abantu bami bona abazazi iimiso zakaSomnini.

⁸ Ningatjho njani nithi, ‘Sihlakaniphile begodu sinomthetho kaSomnini’ na? Ngambala, isiba labososiba litlole amanga!

⁹ Abahlakaniphileko bazokuhlaziswa, bazakukhena bebabambeke. Mbala, balahle ilizwi lakaSomnini! Alo, kuhlakanipha bani-ke abanakho?

¹⁰ Ngalokho abafazi babo ngizabapha amanye amadoda, amasimabo ngiwanikele abahluli. Mbala, kusukela kabancani ukuya kabakhulu, boke banehliziyo ede ngenzuzo; ukusukela ebaphorofidini ukuya ebaphristini, boke benza ikohliso.

¹¹ Bahlenga inceba lendodakazi yabantu bami kwanga alinabuhlungu. Bathi ‘Ukuthula! Ukuthula!’ khisibe akunakuthula do.

¹² Bayaqobeka ngombana benza izinto ezinyenyisako! Nanyana kunjalo abananhloni nakanye, abakwazi ngitjho nokutjhalazela lokhu. Yeke, bazakuwa hlangana nabawileko, bazakuguqiswa lokha nangisebenza ngabo.” Kutjho uSomnini.

¹³ USomnini uthi: “Lokha nangithi ngivuna kibo, kutlhogeka amadiribe esidiribeni namakhiwani emkhiwaneni, ngitjho namakarawo atjhwabile. Nje-ke ngizabanikelela ngabahluli babatshidlhe.

¹⁴ Bazakuthi, ‘Sihlaleleni lapha? Asibuthaneni ndawonye, sibalekeleni emadorobheni anemithangala siyokuhlala khona sithule! Kodwana ngithi uSomnini uZimethu sele asithulisile, uzasenza sisele amanzi anobuthi, ngombana sonile kuye.

¹⁵ Sirhuluphela ukuthula, kodwana akunalitho elihle. Siqalelela isikhathi sokuphiliswa, kodwana lisizi lodwa.’

¹⁶ Ukuthimula kweenjomani zesitha kwezwakala kusukela eDani etlhagwini. Ngokulila kweenjomani zaso eziduna, kwathuthumela yoke inarha. Size kobana sirhiribidele inarha nakho koke okukiyo, idorobho nabo boke abahlali balo.

¹⁷ Qalani, sele ngizokuthumela iinyoka phakathi kwenu, iye, iimbedla ezingenzelwa mlingo, nje-ke zizaniluma.” Kutjho uSomnini.

¹⁸ Ngaphandle kokuphiliswa, isizi liqubuka phakathi kwami, iye, ihliziywami iyagula ngaphakathi kwami.

¹⁹ Lalela isililo sabantu bekhethu, sizwakala enarheni ekude sithi: “USomnini gade angasi seZiyoni na? Kghani iKosi yalo ayisese ngaphakathi kwalo na?” USomnini uphendula uthi: “Kubayini bangithukuthelise ngeenthombe zabo, iye, ngabosingazimu abanganabubhadekelo na?”

²⁰ Bona bazakuthi: “Isivuno sidlulile, ihlobo liphelile kodwana thina asikasindi.”

²¹ Ngebanga lokudabuka kwabantu bekhethu, nami ngidabukile, ngizilile; ukukakamala kungibambile.

²² Akunantatha kwaGiliyadi na? Akunanyanga lapho na? Alo, kubayini kungabi nokwelapheka kwenceba labantu bekhethu na?