UJOROMIYA 7 - IsiNdebele 2012 Translation

Ikolelo engasizi litho

¹ USomnini wakhuluma noJoromiya wamtjela bona

² ajame esangweni lethempeli lakaSomnini amemezele umlayezo lo lapho athi: “Yizwani ilizwi lakaSomnini noke nina bantu bakwaJuda abangena emasangweni la kobana nimlotjhe.

³ Nakhu okutjhiwo nguSomnini uMninimandlawoke, uZimu wakwa-Israyeli uthi, ‘Lokha nanilungisa iindlela nezenzo zenu, khona-ke ngizanenza nihlale enarheni le.’

⁴ Ningathembeli emazwini adurhisako athi: “Nanti-ke ithempeli lakaSomnini! Nanti-ke ithempeli lakaSomnini! Nanti-ke ithempeli lakaSomnini!

⁵ “Nakube ngambala nilungisa iindlela nezenzo zenu bese niphathana ngokulunga

⁶ okutjho ukungagandeleli isikhonzi, intandani nomhlolokazi, ukungaphalazi iingazi ezinganamlandu enarheni le begodu nokungadlhemadlhemi ngemva kwabosingazimu benizilimaze,

⁷ khona-ke ngizanivumela kobana nihlale enarheni le, iye inarha engayinikela aboyihlo isiphelani.

⁸ Kodwana qalani, nithembela emazwini adurhisako nangasizi litho.

⁹ “Nicabanga bona nizakweba benibulale, nihlobonge benifunge ngekohliso, nitjhisele uBhali itjhwalo benidlhemadlheme ngemva kwabosingazimu ebeningabazi erhalawumbeni

¹⁰ bese nizokujama phambi kwami ethempelini elibizwa ngami nithi, ‘Siphephile!’ khisibe niragela phambili ngokwenza iinyenyiswezi na?

¹¹ Ithempeli elibizwa ngameli, nicabanga bona sele lilirholo labadlelezeli na? Kodwana yazini bona ngihlala nginiqalile!” Kutjho uSomnini.

¹² “Ningaya khona nje endawenami ebegade iseTjhilo lapha nganzinzisa khona ibizo lami kokuthoma, niyokubona lokho engakwenza kiyo ngebanga lobukhohlakali babantu bami u-Israyeli.

¹³ “Nje-ke, isigwebo sakaSomnini sithi: Ngebanga lokobana nenze zoke izintwezi begodu ngakhuluma nani imini yoke, kodwana azange nilalele; nganibiza kodwana azange nisabele;

¹⁴ yeke engakwenza eTjhilo ngizakwenza phezu kwethempeli elibizwa ngami, iye, ithempeli enithembele kilo, naphezu kwenarha engayinikela nina naboyihlo.

¹⁵ Ngizaniqotjha ebukhoneni bami njengombana ngaqotjha boke abafowenu, iye, zoke iinzukulwana zakwa-Efrayimu.

¹⁶ “Ngalokho wena Joromiya, ungabathandazeli abantwaba, ungabalileli namkha ubakhulumele. Ungabancengeli kimi ngombana angeze bengilalele.

¹⁷ Kghani awukuboni abakwenza emadorobheni wakwaJuda neendledlaneni zeJerusalema na?

¹⁸ Abantwana batheza iinkuni, aboyise baphemba umlilo, abonina babhica ihlama kobana babhagele indlovukazi yomkayi amabhagwana wokulotjha. Baphahlela abosingazimu kobana bangivusele itukuthelo.

¹⁹ Bathukuthelisa mina na?” Kutjho uSomnini. “Abazilimazi ngokwabo ngokuzirhubutjha na?

²⁰ Ngalokho-ke nakhu okutjhiwo nguSomnini uSomandla, ‘Itukuthelwami nelaka lami lizokuthulukela phezu kwenarha le, phezu kwabantu neenlwana, phezu kwemithi yesivande naphezu kwesithelo semasimini. Izakuvutha ingacimi.’ ”

²¹ Godu nakhu okutjhiwo nguSomnini uMninimandlawoke onguZimu wakwa-Israyeli: “Ragelani phambili ningezelele imihlabelwenu yokutjhiswa neyetjhebiswano bese nitla inyama yakhona leyo!

²² Mbala, lokha nangikhuluma naboyihlo ngesikhathi ngibakhupha eGibhide, azange sengibanikele nje kwaphela imiyalo emalungana nemihlabelo yokutjhiswa neyetjhebiswano,

²³ kodwana ngabadosa ngendlebe ngomyalo lo ngathi, ‘Nanithobela ilizwi lami, khona-ke ngizakuba nguZimenu, nina nibe babantu bami. Khambani ngazo zoke iindlela enginiyala ngazo ukuze kunikhambele kuhle.’

²⁴ Kodwana aboyihlo azange balalele bebayelele, esikhundleni salokho balandela iindlela zokukhunyalala kweenhliziyokazi zabo ezimbi. Badedela emuva kunobana baye phambili.

²⁵ Kusukela ngesikhathi aboyihlo baphuma eGibhide bekube gadesi, abantwaba ngabathumela iinceku zami, abaphorofidi imihla ngemihla, imini yoke.

²⁶ Kodwana azange bangilalele namkha bayelele. Gade baneentanyana begodu bakhambelela ekwenzeni ubumbi kunaboyise.

²⁷ “Lokha nawubatjela koke lokhu, angeze bakulalela. Lokha nawubarhuwelelako, abazukuphendula.

²⁸ Ngalokho yithi kibo, ‘Lesi sisizwe esingazange sithobele uSomnini uZimaso namkha sizwe lokha nasikhalinywako. Iqiniso liphelile, litjhabalele emilonyenaso.’ ”

UZimu ugweba boke abantu bakhe

²⁹ Rhuna iinhluthu zakho, wena Jerusalema uzilahle, lila emizileni yemilandelande ngombana uSomnini ulahle bewatjhiya umphakathi owembethwe lilaka lakhe.

³⁰ USomnini uthi: “Abantu bakwaJuda benze ubumbi emehlwenami: Babeke iinyenyiso zabo ngethempelini elibizwa ngami, ngalokho balisilaphaza.

³¹ Bakhe indunduma yeTofethi emrhobeni weBheni-Hinomu kobana batjhise khona amadodana namadodakazabo njengomhlabelo, okuyinto engingazange ngiyale ngayo namkha ibe semkhumbulwenami.

³² Nje-ke, qalani, ayeza amalanga lapha abantu bangeze basayibiza khona ngeTofethi namkha umrhoba weBheni-Hinomu, kodwana bazakuthi mrhoba wokuHlatjwa ngombana bazakungcwaba abafileko eTofethi kufikela lapha kutlhogeka khona indawo.” Kutjho uSomnini.

³³ “Godu iindumbu zabantwaba zizakuba kukudla kweenyoni zomkayi neembandana zommango, kungabi nomuntu ozethusako.

³⁴ Ngizakuphelisa itjhada lokujabula nokuthaba, nephimbo lomlobokazi nomkhwenyana emadorobheni wakwaJuda neendledlaneni zeJerusalema ngombana inarha izabe inganamuntu.”