UJOROMIYA 6 - IsiNdebele 2012 Translation

Ukugwetjwa kuyeza

¹ Nina bantu bakwaBhenjamini, balekani phakathi kweJerusalema! Vuthelani ipalapala eTekhowa! Yenzani itshwayo lentuthu liphakame ngehla kweBhethe-Hakeremu! Nasi ihlekelele iphayiza ivela ngetlhagwini, ngitjho nokurhayilwa okukhulu!

² Indodakazi yeZiyoni kimi beyifana namadlelo amahle.

³ Kodwana abelusi nemihlambabo bazakuza kiyo, bahlome amatendabo phezu kwayo mazombe; ngiloyo naloyo adlise isabelo sakhe kiyo.

⁴ Bathi: “Zilungiseleleni ukulwa neJerusalema! Phakamani, sisahleleni emini ekulu! Heyi! Imini ithoma ukujika nemithunzi yentambama iba mide.

⁵ Yeke phakamani, asisahleleni ebusuku, sirhayile imibhotjhongwayo!”

⁶ Mbala, nakhu okutjhiwo nguSomnini uMninimandlawoke: “Gawulani imithi, nakhe iinqabo eziqhube magegana nomthangala weJerusalema. Leli lidorobho eligcwele ngezinto zesibambiso, iye, koke kilo zizinto zokudlelezelwa.

⁷ Njengomthombo olonde amanzi amatjha ngokunjalo nalo lilonde ubukhohlakali balo. Inturhu nokuphangwa kuzwakele kilo, ukugula kanye namancebalo kuphambi kwami njalo.

⁸ Yelela wena Jerusalema, nakungasinjalo ngizakufulathela ngokukghabhudlheka, iye, nakungasinjalo ngizakwenza ube libhudu, indawo lapho kungahlalwa khona.”

⁹ Nakhu okutjhiwo nguSomnini uMninimandlawoke: “Njengombana kwenziwa esidiribeni abantu bazakuburuja amasalela wesivuno kwa-Israyeli iye, wena ovela ngetlhagwini, dlulisa isandla sakho njengomuntu obuthelela amadiribe.”

¹⁰ Ngingakhuluma nobani ngimyelelise ukuze ezwe na? Qalani, iindlebe zabo azikakotakotwa ngalokho abezwa. Qalani, ilizwi lakaSomnini bayaliphoqa, abathokozi ngalo.

¹¹ Kodwana ngigcwele ilaka lakaSomnini, yeke angikghoni ukulibamba. USomnini uthi: “Lithululele phezu kwabantwana endledlaneni naphezu kwesiqhema samasokana, umfazi nendoda bazakubambeka bobabili, ngitjho neqhegu kanye nabaluphele khulu.

¹² “Iinkumba zabo zizakunikelwa abanye, amasimu kanye nabafazi babo, ngombana ngizakulula isandla sami ngokujamelana nabahlali benarha.” Kutjho uSomnini.

¹³ “Mbala, kusukela kabancani ukuya kabakhulu babo, boke banehliziyo ede ngenzuzo; ukusukela ebaphorofidini ukuya ebaphristini, boke benza ikohliso.

¹⁴ Bahlenga inceba labantu bami ngokulithatha lula, bathi ‘Kunokuthula! Kunokuthula!’ khisibe akunakuthula do.

¹⁵ Bayaqobeka ngombana benza izinto ezinyenyisako! Nanyana kunjalo abananhloni nakanye, abakwazi ngitjho nokutjhalazela lokhu. Yeke, bazakuwa hlangana nabawileko, bazakuguqiswa lokha nangisebenza ngabo.” Kutjho uSomnini.

¹⁶ Nakhu okutjhiwo nguSomnini: “Ngathi, ‘Jamani epambanandlela niqale, buzani ngeendlela zekadeni ukufunyana bonyana ngiyiphi elungileko, nikhambe kiyo, nifumanele imiphefumulwenu ukuphumula.’ Kodwana abantwaba bathi, ‘Abe asizokhamba endleleni yakhona leyo.’

¹⁷ Ngibeke abalindi phezu kwabo ngathi, ‘Lalelani itjhada lepalapala!’ Kodwana bona bathi, ‘Abe asizokulalela.’

¹⁸ Ngalokho, lalelani-ke nina zizwe, yelelani nina mkhambathi ophakathi kwabo,

¹⁹ lalela wena narha. Qalani, sele ngizokuletha ihlekelele phezu kwabantwaba; izakuba ziinthelo zamaqhingabo ngombana azange balalele amezwami begodu balahle ifundiswami.

²⁰ Nginandaba bani netjhwalo leTjheba namkha umgaba onuka kamnandi ovela enarheni ekude na? Imihlabelwenu yokutjhiswa ayamukeleki neyetjhebiswano ayingijabulisi.”

²¹ Ngalokho nakhu okutjhiwo nguSomnini: “Qalani, sele ngizokubeka iinliyo phambi kwabantwaba, iye, phambi kwaboyise nabantwana ngokufanako, woke umphakathi uzakubhubha.”

²² Nakhu okutjhiwo nguSomnini: “Qalani, kuza abantu bavela ngenarheni yetlhagwini, iye, kuqubuka isizwe esikhulu emajukujukwini wephasi.

²³ Sihlome ngomsebe nangomkhonto, sinesihluku begodu asinasirhawu. Sizwakala inga lilwandle elibhodlako nasikhwele phezu kweenjomani zaso, siza njengamadoda ahlelekele ipi kobana sikusahlele, wena ndodakazi yeZiyoni.”

²⁴ Lokha nasizwa ngemibikwaso sangenwa mamanzi emadolweni. Isizi lisibambile, iye, iinhlungu njengomfazi obelethako

²⁵ besathi: “Ningaphumi niye emasimini namkha nikhambakhambe eendleleni ngombana isitha sihlome ngesabula, ukwesaba kusizombe mahlangothi woke.

²⁶ Wena Ziyoni, ndodakazi yabantu bami, vunula iinzilo uzibhudabhude emlotheni, uzile ngokurhahlawula okuhlaba ehliziyweni inga ngokomntwana ekukuphela kwakhe, ngombana msinyana sizokuthelekelwa mrhayili.”

²⁷ USomnini uthi: “Ngikubeke njengomhloli phakathi kwabantu bami, iye, njengomncibilikisi ukuze wazi bewuhlole iindlela zabo.

²⁸ Boke bamahlubuka akhunyaleleko, bakhamba bahleba. Baqine njengekoporo nesimbi, boke babanga umonakalo.

²⁹ Isibhebhedlhisi sibhebhedlhisa ngamandla, kodwana okuncibilikiswako mthofi kwaphela. Umncibilikisi uncibilikisela ilize ngombana abakhohlakeleko abahlungeki.”

³⁰ Babizwa bona bamanyela wesiliva, ngombana uSomnini ubalahlile.