UJOROMIYA 52 - IsiNdebele 2012 Translation

Ukuwa kweJerusalema

¹ UTsedekhiya gade aneminyaka ematjhumi amabili nanye lokha nakathoma ukubusa. Wabusa eJerusalema iminyaka elitjhumi nanye. Ibizo lakanina bekunguRhamuthali indodakazi kaJoromiya weLibhina.

² Wenza ubumbi phambi kwakaSomnini njengoJehoyakhimu.

³ Kwaba ngenca yokusilingeka kwakaSomnini uZimu bona koke lokhu kwenzeke eJerusalema nakwaJuda. Ekugcineni wabathanyela phambi kwakhe. UTsedekhiya wayihlubuka ikosi yeBhabheli.

⁴ Nje-ke ngomnyaka wethoba wokubusa kwakaTsedekhiya, inyanga yetjhumi nayinamalanga alitjhumi, uNebukadiretsari ikosi yeBhabheli nebutho lakhe loke warhwanta, wavimbezela iJerusalema bewakha iinqabo mazombe nalo.

⁵ Idorobheli lavinjezelwa bekwaba mnyaka wetjhumi nanye wokubusa kwekosi uTsedekhiya.

⁶ Indlala beyirhagele khulu ngedorobheni kangangobana abantu bendawo gade bangasenalitho elidliwako. Kwathi ngelanga lethoba lenyanga yesine

⁷ amaKasidi aphundlukela ngedorobheni ngomthangala. Woke amajoni abaleka ebusuku afahla ngesango elihlangana nemithangala emibili eya esivandeni sekosi. Nanyana amaKasidi gade azombeleze idorobho loke, amajoni kanye nekosi abaleka ngendlela yangemrhobeni weJordani.

⁸ Kodwana ibutho lamaKasidi layilala nje ikosi uTsedekhiya belayifunyana emrhobeni weJordani emrhuleni weJerikho. Woke amajonayo asuswa kiyo aphadlhalajwa.

⁹ Yona yathunjwa yasiwa ekosini yeBhabheli eRibhila enarheni yeRhamathi, lapha isigwebo sayo sakhutjhwa khona.

¹⁰ Lapho eRibhila ikosi yeBhabheli yabulala amadodana kaTsedekhiya phambi kwakhe, godu yabulala nazo zoke iinduna zakwaJuda.

¹¹ Yagobhodlha amehlo kaTsedekhiya, yambopha ngamakhamandela wekoporo, yakhamba naye eBhabheli lapha yafese yamfaka khona ngesikhungweni bekwaba mhlana ahlongakalako.

¹² Ngomnyaka wetjhumi nethoba wokubusa kwakaNebukadiretsari ikosi yeBhabheli, lokha inyanga yesihlanu inamalanga alitjhumi, uNebuzaradani umphathi wobuzimba oyinduna yekosi yeBhabheli, weza eJerusalema,

¹³ wafese wathungelela ithempeli lakaSomnini, isigodlo nezindlu zoke zeJerusalema ngomlilo. Waqothula nezakhiwo zoke eziqakathekileko.

¹⁴ Loke ibutho lamaKasidi elalingaphasi komphathi wobuzimba lephula umthangala ozombeleze iJerusalema.

¹⁵ Abanye babantu abadududu nalabo abazinikela ekosini yeBhabheli, iinhlabani zamadoda egade zisasele ngedorobheni kanye nabososino, badingiswa nguNebuzaradani umphathi wobuzimba.

¹⁶ Watjhiya abanye balabo abadududu benarha bona babe balimi nabatjheji besidiribe.

¹⁷ AmaKasidi ephula iinsika zekoporo, iinjamiso zezitja zokuhlambela kanye nebhada ekulu yekoporo okwakugade kusethempelini lakaSomnini, athwala ikoporwelo alisa eBhabheli.

¹⁸ Athwala ngitjho neembiza, iintjhefula, iinquntapete, izitja zokunyenyeza, izitjana nakho koke kwekoporo okusetjenziselwa ukulotjha ngethempelini.

¹⁹ Umphathi wobuzimba wathatha zoke iinsetjenziswa zegolidembala nezesilivambala, okusankapho, izitja zokutjhisela itjhwalo nezokunyenyeza, iimbiza, ilithi leembani, izitjana kanye neemvubelo.

²⁰ Ikoporo yeensika ezimbili, yebhada ekulu neyeenkunzi ezilitjhumi nambili ebezingaphasi kwebhada leyo, kanye nekoporo yeenjamiso zezitja zokuhlambela uSolomoni azenzela ithempeli lakaSomnini, beyingaphezu kwesilinganiso.

²¹ Enye nenye isika begade pheze imamitha abunane nesiquntu ukuphakama namamitha pheze abe mahlanu nesiquntu ubundulungu. Beyimrhohlo, inomphetho ongaba mimino emine ububanzi.

²² Phezu kwayo kunepundu yekoporo elimitha nesiquntu ukuphakama, ikghatjiswe yoke mazombe ngemiluko nangamarharinada wekoporo. Isika yesibili beyifana neyokuthoma.

²³ Amarharinada ebekabonakala ngemahlangothini wepundu bekamatjhumi alithoba nathandathu. Nasele awoke amarharinada nalawo asemlukweni, gade alikhulu.

²⁴ Umphathi wobuzimba wathumba uSeraya umphristi omkhulu, uZefaniya ongaphasi kwakhe ngesikhundla kanye nabalindi besango abathathu njengeembotjhwa.

²⁵ EJerusalema wathatha isikhulu sesigodlo nabeluleki abalikhomba bekosi ebegade basese ngedorobhenapho, umabhalana womphathibutho ogade abizela abantu bendawo epini kanye namatjhumi asithandathu wabantu bendawo nabo ebegade basese ngedorobheni.

²⁶ UNebuzaradani umphathi wobuzimba wabathatha boke abantwaba wabaletha ekosini yeBhabheli eRibhila.

²⁷ Ikosi yeBhabheli yabamadlha beyababulalela khona eRibhila, enarheni yeRhamathi. Nje-ke uJuda wathunjelwa kude nendawo yekhabo.

²⁸ Lesi sibalo sabantu uNebukadiretsari abasa ekuthunjweni: ngomnyaka wekhomba kwaba maJuda aziinkulungwana ezintathu namatjhumi amabili nantathu,

²⁹ emnyakeni wetjhumi nobunane kaNebukadiretsari, kwaba babantu beJerusalema abamakhulu abunane namatjhumi amathathu nambili;

³⁰ emnyakenakhe wamatjhumi amabili nantathu, amaJuda amakhulu alikhomba namatjhumi amane nahlanu athathwa nguNebuzaradani umphathi wobuzimba wawasa ekuthunjweni. Kwaba babantu abaziinkulungwana ezine namatjhumi asithandathu sele baboke.

UJehoyakini uyatjhatjhululwa

³¹ Mhla amalanga amatjhumi amabili nahlanu enyangeni yetjhumi nambili womnyaka wamatjhumi amathathu nekhomba wokudingiswa kwakaJehoyakini ikosi yakwaJuda, u-Evili-Merodaki nathoma ukubusa eBhabheli, watjhaphulula uJehoyakini ngesikhungweni.

³² Wakhuluma kuhle naye bewamnikela nesikhundla esihloniphekileko esingaphezu kwaleso samakhosi amanye ebegade anaye eBhabheli.

³³ Yeke uJehoyakini akhange asembatha izambatho zangesikhungweni. Soke isikhathi sokuphila kwakhe wagoma njalo etafuleni lekosi yeBhabheli.

³⁴ Imihla ngemihla ikosi yapha uJehoyakini isibonelelo qobe asaphila, iye, bekwaba kumhla ahlongakalako.