UJOROMIYA 51 - IsiNdebele 2012 Translation

¹ Nakhu okutjhiwo nguSomnini: “Qalani, ngizakuvusa ummoya womtjhabalalisi ujamelane neBhabheli nabantu beLebu-Khamayi.

² Ngizokuthumela abeli eBhabheli kobana bele bebabhubhise inarha yakhona; bazalithelekela ncazoke ngelanga lehlekelele.

³ Umdumuzi ngomsebe angatjhaphululi umsebakhe namkha ahlubule isambatho sakhe sepi. Ningababaleli amasokanalo, bhubhisani loke ibutho lalo.

⁴ Abahlatjwe ngesabula bazakuwa enarheni yamaKasidi nabalinyaziweko eendledlaneni zeBhabheli.

⁵ Mbala, u-Israyeli noJuda abanabuhlolokazi, abakasuswa kuZimabo, iye, kuSomnini uMninimandlawoke, nanyana inarhabo yembethwe mlandu phambi koCwengileko ka-Israyeli.

⁶ “Balekani niphume eBhabheli! Omunye nomunye asindise ipilwakhe. Ningabhujiswa ngebanga lezono zalo. Sele kusikhathi sokuzibuyiselela kwakaSomnini; uzalikhokhela lokho okulifaneleko.

⁷ IBhabheli beliyikapho yegolide esandleni sakaSomnini, ladakisa loke iphasi. Izizwe zasela iwayinalo, nje-ke, ziyadlharuma.

⁸ IBhabheli lizakuwa msinyana belephuke. Lilileleni, lifunyaneleni intatha yobuhlungu balo, mhlamunye lingaphola.”

⁹ Abakhozi balo bathi: “Besizalelapha iBhabheli, kodwana angeze lelapheka. Asilisukeleni! Omunye nomunye wethu aziyele enarhenakhe ngombana isigwebo salo sifikelela emkayini, siphakeme njengamafu.”

¹⁰ Abathunjwa bathi: “USomnini uvuselele ubuntu bethu! Yeke nambani siyokubika eZiyoni izenzo zakaSomnini uZimethu.”

¹¹ Lolani imisubela, nigcwalise iinlanda ngayo. USomnini uvuse ummoya wamakhosi wamaMede ngombana ihloswakhe kubhubhisa iBhabheli. USomnini uzozibuyiselela, iye, abuyiselele ithempeli lakhe.

¹² Phakamisani iphawu emithangaleni yeBhabheli! Qinisani abalindi, bekani ababekilihlo, nizilungiselele ukunanabela! Mbala, uSomnini uhlosile bewafeza lokho akukhulume mayelana nabahlali beBhabheli.

¹³ Wena ohlala hlanu komlambo omkhulu nonamagugu amanengi, isiphetho sakho sifikile, isikhathi sokobana ujutjwe.

¹⁴ USomnini uMninimandlawoke uzifungile: “Ngambala ngikuzalisa ngamadoda kube inga lijuma leentethe; azakuhlaba umkhosi wokuhlula ngawe Bhabheli.”

¹⁵ Nguye owenze iphasi ngamandlakhe, wasekela ilizwe ngokuhlakanipha kwakhe, wendlala amazulu ngelwazi lakhe.

¹⁶ Lokha nazwakalisa ilizwi lakhe, kuhlokoma amanzi emazulwini; wenza amafu amhlophe aphume epelazwe. Uthumela imibani ekhambisana nezulu, aphephethise ummoya eenlulwini zakhe.

¹⁷ Woke umuntu usidlhayela begodu akanalwazi; woke umncibilikisi uhlaziswa bosingazimu bakhe. Iinthombembunjwa zakhe zimamala, azinamphefumulo ngaphakathi kwazo.

¹⁸ Zililize lakolize, ziziinkohliso; isikhathi sokugwetjwa kwazo nasifikako, zizakubhubha.

¹⁹ Kodwana osisabelo sakaJakopo akasinjalo, ngombana ungumbumbi wakho koke, ngitjho no-Israyeli, oyikoro engeyakhe. Ibizo lakhe nguSomnini uMninimandlawoke.

²⁰ “Wena Joromiya uyipinga yami, isikhali sami sepi, ngawe ngiphohloza izizwe, ngawe ngibhubhisa imibuso,

²¹ ngawe ngiphohloza injomani nomkhwelayo, ngawe ngiphohloza ikarana yepi nomtjhayelayo,

²² ngawe ngiphohloza indoda nomfazi, ngawe ngiphohloza omdala nomutjha, ngawe ngiphohloza isokana nomntazana,

²³ ngawe ngiphohloza umelusi nomhlambi, ngawe ngiphohloza umlimi nekomo, ngawe ngiphohloza ababusi neenkhulu.

²⁴ “Ngizakubuyiselela iBhabheli nabo boke abahlali benarha yamaKasidi ngebanga lakho koke okumbi abakwenze phambi kwenu eZiyoni.” Kutjho uSomnini.

²⁵ “Qala, ngijamelene nawe, wena ntaba yomrhayili, wena orhayila iphasi loke.” Kutjho uSomnini. “Ngizakwelula isandla sami ngijamelane nawe, ngikuphosele phasi ekuzikeni, ngikwenze ube yintaba etjhisiweko.

²⁶ Akunalitje elizakuthathwa kuwe ukwenza ijika, namkha elinye ilitje kobana kwenziwe isisekelo, ngombana uzakuhlala umarubhi wamlibe.” Kutjho uSomnini.

²⁷ “Phakamisani iphawu enarheni! Vuthelani ipalapala hlangana nezizwe! Cwengisani izizwe kobana ziye epini zilwe neBhabheli. Buthelani ndawonye imibuso le, ijamelane nalo: i-Ararathi, iMini ne-Atjhikenazi. Bekani umlawuli wepi ajamelane nalo, nithumele iinjomani ezembatha inarha yoke njengewoma leentethe.

²⁸ Cwengisani izizwe kobana zilwe nalo: amakhosi wamaMede, ababusi neenkhulu zawo kanye nazo zoke iinarha ezibuswa makhosi lawo.

²⁹ Nje-ke inarha izakuthuthumela beyikoropane ngombana ihloso kaSomnini ngeBhabheli isajamile, ukwenza isifunda seBhabheli sibe libhudu ukuze kungabikho ohlala khona.

³⁰ Iingorho zeBhabheli zilisile ukulwa; zihlezi ngeemphephelweni. Amandlazo aphelile, sese zifana nabafazi. Imizi yeBhabheli ithungelelwe ngomlilo, iinqabo zamasangwayo zephuliwe.

³¹ Isigijimi sigijima sihlangabeze esinye nesithunywa sihlangabeze isithunywa ukubikela ikosi yeBhabheli bonyana idorobho layo lithunjwe mahlangothi woke.

³² Amazibuko avinjezelwe, umgaba emlanjeni uthungelwe ngomlilo, amajoni anevalo.”

³³ Mbala, nakhu okutjhiwo nguSomnini uMninimandlawoke, uZimu wakwa-Israyeli: “Indodakazi yeBhabheli ifana neselelo lokha nasigangadelweko, isikhathi sokuvuna sizakufika msinyana.”

³⁴ “UNebukadiretsari ikosi yeBhabheli ungirhiribidele wangiminyelela ngoma kere, wangifuthela phasi njengomjeka onganalitho. Ungiginye njengenyoka, wazalisa isisu sakhe ngomhlosi wami, wagcina ngokungikhafula.

³⁵ Inturhu nokulinyazwa okwenziwe kimi akube phezu kweBhabheli.” Kutjho iZiyoni. “Iingazi zami zibe phezu kwabahlali benarha yamaKasidi.” Kutjho iJerusalema.

³⁶ Ngalokho nakhu okutjhiwo nguSomnini: “Qalani, ngizokujamela indabakho, ngikubuyiselele wena Jerusalema. Ngizakomisa ilwandle leBhabheli ngitjhise nomthombalo.

³⁷ IBhabheli lizakuba siqorho samatje, idzaba leempungutjha, ibhudu nento yokurarekelwa, indawo engahlalwa mumuntu.

³⁸ Kwanje abantu balo basabhodla ndawonye njengamabhubezi, iye, barora njengamabhubezana.

³⁹ Kodwana kuzakuthi lokha nabasagugekileko ngibalungiselele umnyanya, ngibadakise ukuze bahlekele phezulu bese balalela safuthi bangasavuka godu.” Kutjho uSomnini.

⁴⁰ “Ngizabehlisela ebuhlabelweni njengezimvu, iye, njengamaqama neempongo.

⁴¹ “Maye, iTjhetjhaki lithunjiwe! Idorobho elikhethekileko ephasini loke, libanjiwe! Maye, iBhabheli selibe sinyenyiso hlangana nezizwe!

⁴² Ilwandle likhuphukele ngehla kweBhabheli, ukubhodla kwamadlambalo kuligubuzesile.

⁴³ Imizanalo ilibhudu, iye, iyindawo yesomiso nerhalawumba, yindawo engahlalwa mumuntu nalapha kungadluli khona umuntu.

⁴⁴ Ngizakuhlunguphaza uBhele eBhabheli, ngimkhafulise akuginyileko. Izizwe angeze zisawulukela kuye. “Umthangala weBhabheli uwe bhusu!

⁴⁵ Nje-ke, phumani kilo bantu bami! Omunye nomunye asindise ipilwakhe etukuthelweni evuthako kaSomnini.

⁴⁶ Nakungasinjalo nizakunyefa ummongo benesabe amahlebezi azwakala enarheni; iye, ihlebezana yomnyaka nomnyaka ngenturhu enarheni kanye nangombusi ovukela umbusi.

⁴⁷ “Ngambala isikhathi siyeza lapha ngizokuhlunguphaza khona iinthombe zeBhabheli. Yoke inarhalo izakuhlaziswa nabahlatjwe ngesabula balo bazakurabhalala ngaphakathi kwalo.

⁴⁸ Yeke izulu nephasi nakho koke okukikho kuzakuhlokoma ngeBhabheli. Ngambala abarhayili balithelekela bavela ngetlhagwini.” Kutjho uSomnini.

⁴⁹ “IBhabheli nalo kufanele liwe ngebanga labakwa-Israyeli ababuleweko, njengombana ababuleweko bephasi loke bawe ngebanga leBhabheli.

⁵⁰ Nina abaphunyurhe esabuleni, khambani, ningajami! Khumbulani uSomnini nisenarheni ekude neJerusalema libe semkhumbulwenenu.

⁵¹ Nina nithi, ‘Sihlazisiwe, sizizwile iinhlamba nehlazo lembese ubuso bethu lokha abaqhamuki nabangena ngeendaweni ezicwengileko zethempeli lakaSomnini.’

⁵² Yeke, qalani isikhathi siyeza lapha ngizakuhlunguphaza khona iinthombe zalo begodu kiyo yoke inarhalo abahlatjwe ngesabula bazakububula.” Kutjho uSomnini.

⁵³ “Ngitjho nanyana iBhabheli lifika emkayini liqinise isiphephelo salo esiphakemeko, abarhayili abavela kimi bazakungena kilo.” Kutjho uSomnini.

⁵⁴ “Itjhada lesililo livela ngeBhabheli, iye, itjhada lokubhujiswa okukhulu enarheni yamaKasidi.”

⁵⁵ USomnini uzokurhayila iBhabheli, athulise itjhada lalo elikhulu. Amavili weenkarana zepi zezitha arhaza njengamanzi amanengi; kuzwakala ukuhlokoma kwamezwazo.

⁵⁶ Umrhayili uthelekela iBhabheli, iye umrhayili ujamelana nalo. Iingorho zalo ziyathunjwa, imisebe yazo iyaphohlozwa ngombana uSomnini unguZimu wokubuyiselela; mbala, nakukubuyiselela, uyabuyiselela.

⁵⁷ “Ngizakudakisa iinkhulu nabahlakaniphileko balo ababusi, iinduna kanye neengorho zalo ngokunjalo, bazakulalela safuthi bangasavuki.” Kutjho uSomnini oyiKosi, ibizo lakhe elinguMninimandlawoke.

⁵⁸ Nakhu okutjhiwo nguSomnini uMninimandlawoke: “Umthangala obanzi weBhabheli uzakufadalaliswa, amasangwalo aphakemeko athungelelwe ngomlilo. Iye, abantu basebenzela ilize nezizwe iimvuthiso zomlilo, lokho kwaba mtjhikatjhika wazo.”

⁵⁹ USeraya umsa kaNeriya omsa kaMarhaseya waya eBhabheli noTsedekhiya ikosi yakwaJuda ngomnyaka wesine wokubusa kwakhe. Gade amphathi weendlela zekosi lokha nayiya eBhabheli. Nje-ke umphorofidi uJoromiya wamnikela umyalo.

⁶⁰ UJoromiya gade atlole emsongweni owodwa ngayo yoke ihlekelele ebeyizakwehlela iBhabheli, iye, woke amezwi lawo ebekatlolwe ngaphambilini ngeBhabheli.

⁶¹ Wathi kuSeraya: “Lokha nawungena eBhabheli, liqalisise bese ufundela phezulu woke amezwi la.

⁶² Ngemva kwalapho uthi, ‘Somnini, wena ngokwakho ukhulume ngokujamelana nendawo le kobana uzayibhubhisa ukuze kungabi namuntu ngitjho nefuyo ezakuhlala kiyo, ibe marubhi wamlibe.’

⁶³ Nawuqeda ukufunda umsongo lo, ubophelele ilitje kiwo bese uwuphosela ngeYufrathe.

⁶⁴ Yeke uzakuthi, ‘Ngokunjalo iBhabheli lizakutjhingela lingasavumbuka ngebanga lehlekelele engizalehlisela phezu kwalo.’ ” Amezwi athi “lokho kwaba mtjhikatjhika wazo” bekumamezwi wokugcina kaJoromiya.