UJOROMIYA 50 - IsiNdebele 2012 Translation

Isiphorofido ngeBhabheli

¹ Ilizwi uSomnini alikhuluma ngoJoromiya umphorofidi mayelana neBhabheli kanye nenarha yamaKasidi lithi:

² “Bikani benimemezele hlangana nezizwe, phakamisani iphawu bese niyalimemezela, ningagodli litho, kodwana khulumani, nithi, ‘IBhabheli lithunjiwe! UBhele uzokuhlaziswa, uMerodaki abe nokwesaba. Iinthombembunjwa zalo zizokwesaba.’

³ Lizakusahlelwa sisizwe sangetlhagwini senze isifunda salo sibe libhudu. Akunamuntu ozakuhlala kiso, abantu neenlwana zalo bazakuzulazula.”

⁴ USomnini uthi: “Emihleni leyo ngesikhatheso abantu bakwa-Israyeli; iye, bona nabakwaJuda bazakuza ndawonye. Bazakuza balila, bafune uSomnini uZimabo.

⁵ Bazakubuza indlela eya eZiyoni baphendukele nganeno bathi, ‘Yizani sizihlanganiseni noSomnini ngesivumelwano sanini nanini esingeze sakhohlweka.’

⁶ “Abantu bami babe zizimvu ezilahlekileko. Abelusi bazo bazidurhisile, bazibangela bona zehle zenyuke eentabeni. Zazulazula hlangana neentaba nemibundu, zakhohlwa indawazo yokuphumula.

⁷ Nanyana ngubani ozifunyanako uzidlela zona. Izitha zazo zathi, ‘Asinamlandu ngombana bonile kuSomnini olidlelo lamambala, iye, uSomnini olithemba laboyise.’

⁸ “Balekani niphume eBhabheli, phumani enarheni yamaKasidi, nibe njengeempongo ezirhola umhlambi

⁹ ngombana sele ngizokuvusa umfelandawonye wezizwe ezinamandla. Ngizaziletha zivela enarheni yangetlhagwini. Zizazihlela zijamelane nalo, zilithumbe kusukela ngetlhagwini. Imisubelazo injengeyengorho enekghono engabuyi imkhonoze.

¹⁰ Inarha yamaKasidi izakuba yipango, boke abayiphangako bazakusutha.” Kutjho uSomnini.

¹¹ Ngebanga lokobana nina maKasidi niyajekezela benithabile, nina baphangi belifa lami, nituna njengethole nalibhula ikoroyi, nilile njengeenjomani eziduna,

¹² unyoko uzakuhlaziswa khulu, owanibelethako uzakurhubutjhwa. Qalani, uzakuba ngomncani ezizweni, abe libhudu, igagadu nerhalawumba.

¹³ Ngebanga letukuthelo kaSomnini iBhabheli alizukuba nabahlali, lizakuba libhudu lakobhudu. Woke odlula kilo uzakumangala, abe akhuze ngebanga lazo zoke iingemegeme zalo.

¹⁴ Zihleleni nijamelane neBhabheli mahlangothi woke nina noke enicuphe umsebe. Lidumuzeni! Ningababaleli imisubela ngombana lonile kuSomnini.

¹⁵ Hlokomani kuzwakale ngehla kwalo ncazoke nithi: “Lizinikele, imibhotjhongwalo iwile, amabodalo agiriziwe.” Lokhu kukuzibuyiselela kwakaSomnini. Ngalokho zibuyiseleleni kilo, nenze kilo lokho elakwenza kabanye.

¹⁶ Susani otjalako eBhabheli kanye nophethe isegere ngesikhathi sokuvuna. Ngebanga lesabula yonelunya ngiloyo naloyo uzakuphendukela ebantwini bekhabo, omunye nomunye abalekele enarheni yekhabo.

¹⁷ U-Israyeli bekayimvu ebalekako egijinyiswe mabhubezi. Owathoma ukuyirhiribidela kwaba yikosi ye-Asiriya, wokugcina owaphohloza amathambayo nguNebukadiretsari ikosi yeBhabheli.

¹⁸ Ngalokho-ke nakhu okutjhiwo nguSomnini uMninimandlawoke, uZimu wakwa-Israyeli: “Ngizokuhlunguphaza ikosi yeBhabheli nenarhayo njengombana ngihlunguphaze ikosi ye-Asiriya.

¹⁹ Kodwana ngizokubuyisela u-Israyeli emadlelwenakhe; yeke uzakukarula eKarameli neBhatjhani, iphango lakhe lizakwaneliseka eentatjaneni zakwa-Efrayimu neGiliyadi.

²⁰ Emihleni leyo ngesikhatheso, kuzakwenziwa iphenyo ngomlandu ka-Israyeli, kodwana akuzukufunyanwa litho, lenziwe ngezono zakwaJuda, kodwana kungafunyanwa litho ngombana ngizabe ngicolele imisalela engayibabalelako.” Kutjho uSomnini.

²¹ “Nina zitha, sahlelani inarha yeMeratayimu nalabo abahlala ePekodi! Bagijimiseni ngesabula nangokurhayila kokupheleleko! Yenzani koke enginiyale ngakho.” Kutjho uSomnini.

²² Itjhada lepi sele lisenarheni, itjhada lokutjhabalaliswa okukhulu!

²³ Maye, yephuke beyafahlaka kangangani inondo edule iphasi loke! Maye, libe yiququ kangangani iBhabheli hlangana nezizwe!

²⁴ Ngakubekela isiqupho wena Bhabheli, wabanjwa ungakatjheji, wafunyanwa esiquphweni bewathunjwa ngombana utjhijile uSomnini.

²⁵ USomnini uvule ikumbakhe yeenkhali wakhupha iinkhali zobukhali bakhe ngombana uSomandla, uSomnini uMninimandlawoke, kunomsebenzi ekumele awenze enarheni yamaKasidi.

²⁶ Ngenani eBhabheli nina noke! Vulani iinlulu zalo! Buthelelani abantu balo njengamaqubi wamabele. Batjhabalaliseni nya ningalitjhiyeli namunye umsalela.

²⁷ Hlabani zoke iinkunzi zalo; zehliseleni ebuhlabelweni! Maye kiwo amaKasidi! Ilanga lawo lifikile, iye, isikhathi sokuhlunguphazwa kwawo.

²⁸ Lalelani! Ababaleke nabaphunyurhe enarheni yeBhabheli bayeza kobana bamemezele eZiyoni ukuzibuyiselela kwakaSomnini uZimethu, iye, ukuzibuyiselela kwakhe ngethempeli lakhe.

²⁹ “Bizelani abosomsebe eBhabheli, iye, boke abacupha umsebe! Livimbezeleni mahlangothi woke, akungabikho namunye ophunyurhako! Libuyiseleleni ngezenzo zalo, nenze kilo lokho elakwenza kabanye ngombana lazikhukhumezela uSomnini, oCwengileko ka-Israyeli.

³⁰ Ngalokho amasokanalo azakufela ematatawinalo, woke amajonalo azakuthuliswa mhlokho.” Kutjho uSomnini.

³¹ “Qala, ngijamelene nawe, wena ozikhukhumezako!” Kutjho uSomnini oyiKosi uMninimandlawoke. “Ngambala ilanga lakho lifikile, ilanga lokobana ngikuhlunguphaze.

³² Ozikhukhumezako uzakukhutjwa bekawe angabi nomuntu omvusako; ngizakuthungelela umlilo emizinakhe ozakuqothula koke okumzombileko.”

³³ Nakhu okutjhiwo nguSomnini uMninimandlawoke: “Abantu bakwa-Israyeli bagandelelwe nabantu bakwaJuda ngokunjalo. Boke abathumbi babo babakakarele, bayala ukubatjhaphulula.

³⁴ Kodwana umhlengabo unamandla, ibizo lakhe nguSomnini uMninimandlawoke. Uzakujamela indababo ngamandla ukuze alethe ukuphumula enarheni, kodwana kubahlali beBhabheli alethe umguruguru.

³⁵ “Isabula phezu kwamaKasidi!” Kutjho uSomnini. “Iye, phezu kwabahlali beBhabheli naphezu kweenkhulu zalo kanye nabahlakaniphileko balo!

³⁶ Isabula phezu kwabaphorofidi bamala ukuze babe ziindlhadlha. Isabula phezu kweengorho zalo ukuze zirhayilwe!

³⁷ Isabula phezu kweenjomani neenkarana zalo! Isabula phezu kwabo boke abantu abayicubevange abaphakathi kwalo ukuze babe njengabafazi. Isabula phezu kwamagugwalo ukuze aphangwe!

³⁸ Ibutho phezu kwamanzalo ukuze ome kere. Mbala, kuyindawo yeenthombembazwa; bazigqaja ngeenthombe ezisabekako.

³⁹ Nje-ke abothurhu berhalawumba bazakuhlala lapho kanye neempisi. Iinciliba nazo zizakuhlala lapho. IBhabheli angeze belisahlalwa godu babantu namkha lakhiwe iinzukulwana ngeenzukulwana.

⁴⁰ Njengombana iSodoma neGomora zaketulwa kanye nemizana yakhona, ngokunjalo akakho ozakuhlala eBhabhelapho, akunamuntu ozakhonza kilo.” Kutjho uSomnini.

⁴¹ “Qalani, kuza abantu bavela ngetlhagwini! Iye, kuqubuka isizwe esikhulu namakhosi amanengi emajukujukwini wephasi.

⁴² Bahlome ngemisebe nangemikhonto, banesihluku begodu abanasirhawu. Bazwakala inga lilwandle elibhodlako nabakhwele iinjomani zabo; beza njengamadoda ahlelekele ipi kobana bakusahlele, wena ndodakazi yeBhabheli.

⁴³ Lokha ikosi yeBhabheli nayizwa ngemibiko yabo, yangenwa mamanzi emadolweni, isizi liyibambile; iye, iinhlungu njengomfazi obelethako.

⁴⁴ Njengebhubezi livela ehlathini eliminyeneko elihlanu kweJordani liya edlelweni esebeni lomlanjana, qalani ngizakugijimisa iBhabheli endawenalo msinyana. Nanyana ngubani engimkhethako ngizambeka kilo. Ngubani onjengami? Ngubani ongangitjhijila na? Ngimuphi umelusi ongajama phambi kwami na?”

⁴⁵ Ngalokho, yizwani lokho uSomnini akuhlele phezu kweBhabheli, lokho akuhlose ngenarha yamaKasidi: “Kwamambala abesana abelusa imihlambi bazazithathela imihlambi leyo. Iye, uSomnini uzakubangela bonyana amadlelo atjhiywe.

⁴⁶ Ngetjhada lokuthunjwa kweBhabheli, inarha izakuthuthumela; isililo salo sizakuzwakala hlangana nezizwe.”