UJOROMIYA 5 - IsiNdebele 2012 Translation

Akakho noyedwa oqotho

¹ “Yehlani nenyuke neendledlana zeJerusalema, niqale ngapha nangapha niyelele, nifunisise ematatawini wakhona, nibone bonyana ningafumana umuntu owenza okufaneleko, ophikelela ekwethembekeni, khona-ke ngizakucolela idorobheli.

² Nanyana abantwabo basithi, ‘Sifunga ngepilo kaSomnini’, basafunga ngekohliso.”

³ Somnini, wena uqala ukwethembeka! Wabamadlha, kodwana azange bezwe ubuhlungu, wabaqeda, kodwana bala ukusolwa. Benza ubuso babo baqina ukudlula ilitje, bala ukuphenduka.

⁴ Ngadlumbana ngathi, “Abantwaba ziinchaka, badlhayele ngombana abayazi indlela kaSomnini, iye, umthetho kaZimabo.

⁵ Yeke ngizakuya eenkhulwini, ngikhulumisane nazo, zona kufuze ziyazi indlela kaSomnini, iye, umthetho kaZimazo.” Kodwana nazo zoke njalo zephula ijogi, zidabula iimbopho.

⁶ Ngalokho ibhubezi elivela ngehlathini lizazibhozomela, ipisi yerhalawumbeni iziqede. Ingwe izazilalela eduze namadorobhazo, kobana idabule iinquqwana nanyana ngubani ophumako ngombana ukuhlubuka kwazo kukhulu nokuhlehla kwazo kwandile.

⁷ USomnini uthi: “Kubayini ngifanele ngikucolele, wena Juda? Abantwabakho bangilahlile, bafunga ngozinyana ongekho. Nasele ngibondlile, bahlobonga; bazidlhunya ngekumbeni yesitjhatjha.

⁸ Baziinjomani eziduna ezondlekileko nezindindako, enye nenye elilela umfazi wenye indoda.

⁹ Kumele ngingabahlunguphazi ngalokhu na? Kumele ngingazibuyiseleli esizweni esinjalo na?” Kubuza uSomnini.

¹⁰ “Khuphukelani embundwini, eendiribeni zakwaJuda bese niyarhayila; ningakhawuli ukubhubhisa. Phulani iingala zeendiribe ngombana abantwaba abasi ngebakaSomnini.

¹¹ Mbala, ikumba ka-Israyeli neyakaJuda, azange yethembeke nakanye kimi.” Kutjho uSomnini.

¹² Baphike uSomnini bathi: “Angekhe enze litho! Akunangozi ezasehlela, angeze sabona isabula namkha indlala.

¹³ Abaphorofidi bazakuba mumoya; ilizwi lakaZimu alikho kibo.” Yeke akuthi abakutjhoko kwenzeke phezu kwabo.

¹⁴ Ngalokho-ke nakhu okutjhiwo nguSomnini uZimu uMninimandlawoke: “Ngebanga lokobana abantu bakhulume amezwi la, qala, ngenza amezwami emlonyenakho abe mlilo, abantwaba babe ziinkuni baqothulwe mlilo lowo.”

¹⁵ USomnini uthi: “Wena kumba ka-Israyeli, qala, sele ngizokuletha isizwe esivela kude kobana sijamelane nawe; iye, isizwe sakade nesizakuhlala sikhona, okubabantu abanelimi eningalaziko nabanekulumo eningayizwisisiko.

¹⁶ Isilanda saso sifana nethuna elivulekileko, boke bamadoda aziingorho.

¹⁷ Bazakugoma isivuno kanye nokudla kwenu, batle amadodana namadodakazenu. Bazakurhiribidela izimvu, iimbuzi neenkomo zenu; bagomojele iindiribe kanye namakhiwanenu. Amadorobhenu anemithangala nenithembele kiwo, bazawalalisa phasi ngesabula.”

¹⁸ USomnini uthi: “Ngitjho nemalangeni la, angeze ngakhawula ukunibhubhisa.

¹⁹ Abantu nababuza bathi, ‘Kubayini uSomnini uZimethu enze koke lokhu kithi na?’, uzakuthi kibo, ‘Njengombana ningihlubukile nayokulotjha abosingazimu enarhenenu, ngaleyondlela nizakulotjha imiqhamuka enarheni ekungasi ngeyenu.’ ”

²⁰ Bikani lokhu ekumbeni kaJakopo nibuye nikuzwakalise kwaJuda:

²¹ Lalelani lokhu nina bantu abaziindlhadlha nabanganagqondo, abantu abanamehlo, kodwana bangaboni, abaneendlebe, kodwana bangezwa.

²² USomnini uthi: “Aningesabi na? Anithuthumeli phambi kwami, mina engibeke itjhwabatjhwaba yaba mkhawulo welwandle, isimiso sasafuthi nelingeze laseqa na? Amagagasi angakhephuzela kodwana angeze asitjhidisa, angabhodla kodwana angeze aseqa.

²³ Kodwana abantwaba baneenhliziyo eziqinileko nezihlubukako, baphambukile, banyelela.

²⁴ Eenhliziyweni zabo akukho ukuthi, ‘Asesabeni uSomnini uZimethu, onisa izulu ngesikhathi sakhona, iye, lesilimela nelesiruthwana; oqinisekisa ngeemveke ezibekiweko zesivuno.’

²⁵ Kodwana amacalenu akuphambukisile lokho nezono zenu ziniphundise ubuhle.

²⁶ Phakathi kwabantu bami kuneenkhohlakali: Zibadalele njengabantu abacuphe iinyoni, zibeka isifu, zibambe abantu.

²⁷ Njengesiqwebu esigcwele iinyoni, zinjalo neenkumba zazo zigcwele ipahla yekohliso. Ngebangelo ziphenduke iinkhulu neenjinga.

²⁸ Iye, zinonile, zinemikhaba, ziyaphumelela! Ngezenzo zazo ezimbi sezidlulelele! Azisakhuphi iingwebo: Indaba yeentandani nomlandu wabachakileko azisawuyeleli.”

²⁹ USomnini uthi: “Alo, kumele ngingabahlunguphazi ngalokhu na? Ngingazibuyiseleli phezu kwesizwe esinjengalesi na?

³⁰ Kunento erarako nethusako eyenzekako enarheni:

³¹ Abaphorofidi baphorofida ngehloso yamanga, abaphristi babusa ngegunya labo; nje-ke abantu bami bathanda khona lokho. Alo-ke, yini okhunye enizokwenza emva kwalokhu na?”