UJOROMIYA 48 - IsiNdebele 2012 Translation

Isiphorofido ngeMowabi

¹ Mayelana neMowabi. Nakhu okutjhiwo nguSomnini uMninimandlawoke, uZimu wakwa-Israyeli: “Maye kiyo iNebo ngombana iyabhuruzwa. IKhiriyatayimu ihlaziswa beyithunjwe; iye, isiphephelo sihlaziswa besitjhabalaliswe.

² UMowabi angeze asabukwa godu: ERhetjhibhoni izitha zihlele ihlekelele ngaye, zathi, ‘Yizani simpheliseni angasaba sisizwe.’ Nawe Madimeni uzakuqedwa nya, isabula isemva kwakho!

³ Lalela umkhosi ovela eRhoronayimu uthi, ‘Ukonakala nokubhubhisa kukhulu!

⁴ IMowabi iyachithwa!’ Abalile bafune isizo ukuyela ngeTsowari.

⁵ Mbala, emkhuphukeni weLurhithi benyuka barhahlawula kabuhlungu; iye, nendleleni eya eRhoronayimu kuzwakala isizi lesililo sokurhayilwa.

⁶ Yenibaleke! Balekani nizisindise, yibani njengodumbana wommango erhalawumbeni.

⁷ Nina maMowabi, njengombana nethembela ezenzweni nemnothwenenu, nani nizokuthunjwa noKemotjhi uzakuya ekuthunjweni, nabaphristi kanye neenduna zakhe.”

⁸ Umrhayili uza komunye nomunye umuzi akukho namunye ozakusinda. Umrhoba uzakonakaliswa nommango upheliswe ngombana uSomnini ukhulumile.

⁹ UMowabi akabaleke ngombana uba lirubhi, imizakhe iyatjhiywa, ingabi nomhlali,

¹⁰ ngombana kuthiwe: “Akanikelelwe odonda ukwenza umsebenzi kaSomnini! Akanikelelwe nogodla isabulakhe ekuthululeni iingazi!”

¹¹ “UMowabi bekaseze azigedlile kusukela ebutjheni bakhe; iye, azange akhe aye ekuthunjweni. Wathula njengewayini elizike ehlameni, lingakatsengelwa komunye umjeka. Nje-ke lisanandipha njengokuba nephunga lalo lisesenjalo.

¹² Kodwana isikhathi siyeza lapha ngizakuthumela khona abavubeli. Bazathulula imijeka bebayiphahlaze.” Kutjho uSomnini.

¹³ Nje-ke uMowabi uzakuba neenhloni ngeKemotjhi, njengombana ikumba ka-Israyeli yayineenhloni lokha nayethembela eBhethe-Eli.

¹⁴ “Ungatjho njani uthi, ‘Thina siziingorho, simadoda anesibindi epini’ na?

¹⁵ Umrhayili weMowabi nemizayo ukhuphukile, amasokana wakhona akhethekileko azakubulawa nakehla kobana ahlangabezane nomrhayili.” Kutjho uSomnini oyiKosi, ibizo lakhe elinguMninimandlawoke.

¹⁶ “Ukuwa kwakaMowabi sele kufikile, ihlekelelakhe imsinyana.

¹⁷ Zwelanani naye noke enimbhodileko, iye, nina noke eninesikhozi naye, nithi, ‘Maye, yephukile intonga enamandla! Maye, yephukile intonga ehle!’

¹⁸ Yehla ephazimulwenakho bese uhlala equlwanini egazukileko, wena tlawu leDibhoni elisesihlalweni sobukhosi ngombana umrhayili weMowabi ukhuphukile kobana ajamelane nawe, wonakalise amadorobhenu anemithangala.

¹⁹ Jamani eqadi kwendlela nibukele, nina enihlala e-Aroweri. Buzani indoda ebalekako kanye nomfazi ophunyurhako, babuzeni nithi, ‘Kwenzekeni na?’

²⁰ IMowabi ihlazisiwe ngombana itjhabalaliswe. Rhahlawulani nirhuwelele! Memezelani emlanjaneni i-Arinoni kobana iMowabi ibhujisiwe.

²¹ Isigwebo sehlele emrhuleni, eRholoni, eJatsi neMefathi,

²² eDibhoni, eNebo neBhethe-Dibilatayimu,

²³ eKhiriyatayimu, eBhethe-Gamulu neBhethe-Mewoni,

²⁴ eKheriyothi neBotsira nakiyo yoke imizi yakwaMowabi eseduze nekude.

²⁵ Iphondo leMowabi liquntiwe, umkhonwayo wephuliwe.” Kutjho uSomnini.

²⁶ “Idakise ngombana idelele uSomnini. IMowabi ayigonyuluke ngamahlanzayo, nayo ayibe sisiga sokuhlekwa.

²⁷ U-Israyeli azange abe sisiga sokuhlekwa kuwe na? Ingabe wabanjwa hlangana namasela kobana ungabeze uthintithe ihloko njalo lokha nawukhuluma ngaye na?

²⁸ Tjhiyani imizi niyokuhlala emadwaleni nina bahlali beMowabi. Yibani njengezuba elakha indlwanalo emlonyeni weliwa.”

²⁹ Sizwile ngokuzikhukhumeza kwakaMowabi: Ukuzazi kwakhe kukhulu. Iye, sizwile ngokuzikhakhazisa, ukuzikhukhumeza nokudelela kwakhe, ngitjho nokuziphakamisa kwehliziywakhe.

³⁰ USomnini wathi: “Mina ngiyakwazi ukuzitjhaya kwakhe; ikulumakhe yokuzigqaja imamala nezenzo zakhe zimumoya.” Kutjho uSomnini.

³¹ “Ngalokho ngiyamlilela uMowabi, iye, ngililela boke bakwaMowabi, ngirhahlawulela abantu beKhiri-Rharesethi.

³² Ngikulilela ukudlula isililo ngeJazeri, wena sidiribe seSibhima. Imilibe yakho inabela ngaphetjheya kwelwandle, ifika ngitjho emanzini weJazeri. Kodwana umrhayili uthelekele phezu kweenthelo zehlobo neendiribe zakho.

³³ Itokozo nethabo kususiwe esivandeni seenthelo, iye, enarheni yakwaMowabi. Ngivimbe ukugeleza kwewayini ebutlhodlhelweni, akasekho owatlhodlha ngetjhada lethabo, iye, akasahlokomi ngetokozo.

³⁴ Umkhosi weRhetjhibhoni uzwakele e-Elale, ngitjho ukuya eJahatsi. Bazwakalisa ilizwi labo ukusuka eTsowari ukuya eRhoronayimu ne-Egilathi-Tjhelitjhiya ngombana ngitjho namanzi weNimrimi atjhile.

³⁵ KwaMowabi ngizakuphelisa labo abenza imihlabelo eendundumeni, abatjhisela abosingazimu babo itjhwalo.” Kutjho uSomnini.

³⁶ “Ihliziywami ililela uMowabi njengamanghwani, iye, ililela abantu beKhiri-Rharesethi njengamanghwani. Inzuzo abayizuzileko inyelele.

³⁷ Mbala, yoke ihloko igudiwe neendevu zirhuniwe, izandla zoke zirhayiwe nemadinini kunesizilo.

³⁸ Emaphahleni woke wakwaMowabi nematatawini sililo sodwa ngombana ngephule iMowabi njengomjeka ongafunwa mumuntu.” Kutjho uSomnini.

³⁹ “Maye, uMowabi uqobekile! Abantu bayarhahlawula! Maye uMowabi ufulathela ngeenhloni! Iye, sese ayinto yokuhlekwa neyesabekako kibo boke abamzombileko.”

⁴⁰ Mbala, nakhu okutjhiwo nguSomnini: “Qalani, isitha sizakutheleka njengedlanga eliphapha lizulazule ngehla kweMowabi.

⁴¹ Imizi izakuthunjwa neemphephelo zithathwe. Mhlokho iinhliziyo zamabutho wakwaMowabi zizakuba njengeyomfazi obelethako.

⁴² UMowabi uzakupheliswa angasaba sisizwe ngombana udelele uSomnini.

⁴³ Ukwesabeka, umgodi nesifu kunilindele nina bahlali beMowabi.” Kutjho uSomnini.

⁴⁴ “Nanyana ngubani obalekela ukwesaba uzakuwela ngemgodini, nanyana ngubani ophuma ngemgodinapho, uzakubanjwa sisifu ngombana ngizakwehlisela phezu kweMowabi umnyaka wokuhlunguphazwa kwayo.” Kutjho uSomnini.

⁴⁵ “Emthunzini ngaphandle kweRhetjhibhoni, ababaleki bajamile, baqobekile ngombana kuqubuke umlilo eRhetjhibhoni, iye, amalangabi edorobheni lakaSirhoni aqothula ihlafunyo kaMowabi kanye nekhakhayi labanetjhada lokuzitjhaya.

⁴⁶ “Maye kuwe wena Mowabi! Abantu beKemotjhi baphelile ngombana amadodanakho asiwe ekuthunjweni namadodakazakho ekudingisweni.

⁴⁷ “Kodwana emalangeni ezako ngizokutjhugulula ubujamo bakwaMowabi.” Kutjho uSomnini. Isigwebo sakwaMowabi siphelela lapha.