UJOROMIYA 47 - IsiNdebele 2012 Translation

Isiphorofido ngamaFilista

¹ Ilizwi lakaSomnini elafika kuJoromiya umphorofidi mayelana namaFilista ngaphambi kobana uFaro asahlele iGaza.

² Nakhu okutjhiwo nguSomnini: “Qalani, amanzi akhuphuka avela ngetlhagwini, azakuba ziinkhukhula eziphuphumako. Azakuphuphuma enarheni nakiyo yoke into ekiyo; iye, emizini nebahlalini bayo. Abantu bazakurhuwelela, boke abahlala enarheni barhahlawule

³ nabezwa ukuza kwesitha ngokugabadula kweenqatha zeenjomani, itjhada leenkarana zaso nokurhuba kwamavili wakhona. Aboyise abazukuqala emuva ebantwaneni babo ngombana izandla zabo azisenamandla,

⁴ ngebanga lokobana ilanga selifikile lokubhubhisa woke amaFilista; iye, ilanga lokuphelisa boke ababambisani ebebangasiza iTirosi neTsidoni.” Mbala, uSomnini sele azakubhubhisa amaFilista, okutjho imisalela yangeligwini lamaKafitori.

⁵ IGaza iguda ihloko izile ngombana i-Atjhikheloni iyabhujiswa. Nina misalela esemrhuleni, kuzabe kube nini nizirhaya na?

⁶ Maye wena sabula kaSomnini! Kuzakuthathwa isikhathi esingangani kobana uphumule na? Buyela ngesilandeni sakho, buya uzothe.

⁷ Kodwana isabula kaSomnini ingaphumula njani, nakube uyiyalile kobana isahlele i-Atjhikheloni neligu na? Iye, uyibekele zona.