UJOROMIYA 46 - IsiNdebele 2012 Translation

Isiphorofido ngeGibhide

¹ Ilizwi lakaSomnini elafika kuJoromiya umphorofidi mayelana nezizwe.

² Mayelana neGibhide. Isiphorofidwesi sijamelene nebutho lakaFaro uNeko ikosi yeGibhide ebeliseKarikemitjhi ngemlanjeni iYufrathe. UNebukadiretsari ikosi yeBhabheli walihlula ngomnyaka wesine wokubusa kwakaJehoyakhimu umsa kaJosiya ikosi yakwaJuda.

³ “Hlelani amakhande neenhlangu zenu ukuze niphume ipi!

⁴ Bophelani iinjomani, nikhwele iinkarana zepi! Zihleleni nithwale iinkupuru! Lolani imikhontwenu nembathe izambatho zepi!

⁵ Ngibonani na? Bayesaba, bayahlehla, iingorho zabo zihlakaziwe. Nakukubaleka, bayabaleka abasaqali nemva, kunokwesaba mahlangothi woke.” Kutjho uSomnini.

⁶ Abanebelo abakghoni ukubaleka neengorho azikghoni ukuphunyurha. Ngetlhagwini emlanjeni iYufrathe, bayakhutjwa bebawe.

⁷ “Ngubani lo okhuphuka njengeNayili, iye, njengomlambokazi okhephuzela amanzawo na?

⁸ IGibhide ikhuphuka njengeNayili njengomlambokazi okhephuzela amanzawo. Ithi, ‘Ngiyakhuphuka, ngizakuzala iphasi, ngitjhabalalise amadorobho nabantu bakhona.’

⁹ Gijimani nina njomani! Futhekani bakhweli beenkarana! Rhwantani nani ngorho, nina maKutjhe namaPuthi aphethe amakhande nani maLudi acuphe imisebe.

¹⁰ Kodwana ilangelo lingelakaSomnini uMninimandlawoke ilanga lokuzibuyiselela, iye azibuyiselele phezu kwezitha zakhe. Isabula izakurhayila beyaneliswe, iye, beyikholwe ngeengazi ngombana kunomhlabelo kaSomnini uSomandla uMninimandlawoke enarheni yangetlhagwini ngemlanjeni iYufrathe.

¹¹ “Khuphukela eGiliyadi ufunyane intatha wena tlawu leGibhide. Kodwana wandisa isihlahla ngelize, angeze waphola.

¹² Izizwe zizakuzwa ngehlazo lakho; isililo sakho sizakuzala iphasi loke ngombana iingorho zizakutharejana, ziwe zombili njalo.”

¹³ Ilizwi uSomnini alikhuluma kuJoromiya umphorofidi mayelana nokwiza kwakaNebukadiretsari ikosi yeBhabheli nazokusahlela iGibhide:

¹⁴ “Bikani lokhu eGibhide nimemezele eMigidoli! Iye, kumemezeleni eMemfisi neTarhipanirhesi nithi, ‘Zihleleni nilunge ngombana isabula irhayila abanibhodileko.’

¹⁵ Zizakwehliselwani iintsitsirimba zakho na? Azikwazi ukujama ngombana uSomnini uzazisunduza.

¹⁶ Wawisa abanengi; omunye bewawela phezu komunye bebathi, ‘Sikima, sibuyele ebantwini bekhethu nenarheni yekhethu, sisuke esabuleni yonelunya.’

¹⁷ Bizani uFaro, ikosi yeGibhide ngokuthi, ‘Unetjhada kwaphela, udlulwe sikhathi esifaneleko.’ ”

¹⁸ USomnini oyiKosi, ibizo lakhe elinguMninimandlawoke uthi: “Ngifunga ngokuphila kwami: Kukhona ozako onjengeTabori hlangana neentaba nonjengeKarameli ngehla kwelwandle.

¹⁹ Zilungiselele ukuthunjwa, wena ndodakazi ehlala eGibhide ngombana iMemfisi lizakuba libhudu, libe lirubhi belitlhoge nomhlali.

²⁰ “IGibhide ilithole elihle khulu kodwana iimbawu zetlhagwini ziyeza, iye, ziyeza!

²¹ Namajoni aqatjhwako aphakathi kwayo afana namathole anonisiweko: Nawo afulathela abaleke ndawonye, angeze akghona ukujama ngombana ilanga lehlekelele liyeza phezu kwawo, iye, isikhathi sokobana ahlunguphazwe.

²² IGibhide itjhitjhiza njengenyoka ebalekako ngombana isitha sisondela ngamandla, siza kiyo ngamazembe, njengamadoda agawula imithi.

²³ Sizokugawula ihlathi lakhona, nanyana lingaminyana kangangani. Sinengi ukwedlula isikhonyani, asibaleki.” Kutjho uSomnini.

²⁴ “Itlawu leGibhide lizakuhlaziswa, linikelwe ezandleni zabantu bangetlhagwini.”

²⁵ USomnini uMninimandlawoke, uZimu wakwa-Israyeli uthi: “Qalani, sele ngizokuletha isibetho phezu kwaka-Amuni usingazimu wamaThebe, phezu kwakaFaro, phezu kweGibhide, abosingazimu bakhona namakhosi wakhona; iye, phezu kwakaFaro nakilabo abathembele kuye.

²⁶ Ngizobanikela ezandleni zabazumana nepilwabo nezandleni zakaNebukadiretsari ikosi yeBhabheli neenduna zakhe. Ngemva kwalapho, nokho iGibhide izakuba nabahlali njengaphambilini.” Kutjho uSomnini.

²⁷ “Ungesabi wena Jakopo ncekwami, ungethuki wena Israyeli. Qalani, sele ngizokusindisa ukude, iye, iinzukulwana zakho enarheni ezithunjwe kiyo. UJakopo uzakubuya abe nokuthula nokuphepha, akunamuntu ozamethusa.

²⁸ Ungesabi Jakopo ncekwami ngombana nginawe. Nanyana ngibhubhisa zoke izizwe engikuhlakazela kizo, wena angeze ngakubhubhisa. Nokho angeze ngahlala ngingakubethi, kodwana ngizakukhalima ngeswazi elincani.” Kutjho uSomnini.