UJOROMIYA 44 - IsiNdebele 2012 Translation

Ihlekelele ngebanga lokulotjha abosingazimu

¹ Ilizweli lafika kuJoromiya mayelana nawo woke amaJuda ahlala eGibhide, okubahlali beMigidolo, beTarhipanirhesi, beMemfisi nebesifunda sePatrosi:

² “Nakhu okutjhiwo nguSomnini uMninimandlawoke, uZimu wakwa-Israyeli, ‘Nizibonele ngokwenu ihlekelele ekulu engiyehlisele phezu kweJerusalema nakiyo yoke imizi yakwaJuda. Qalani, namhlanje sele imarubhi begodu ayinabahlali

³ ngebanga lobukhohlakali ababenzileko. Bangithukuthelise ngokutjhisa itjhwalo nangokulotjha abosingazimu abangabaziko, iye, bona, nani naboyise.

⁴ Ngathumela kibo imini yoke iinceku zami abaphorofidi abathi, “Ngiyanibawa, ningenzi into enyenyisako nengiyizondako le!”

⁵ Kodwana azange balalele namkha bayelele. Azange baphenduke ebukhohlakalini babo nekutjhiseleni abosingazimu itjhwalo.

⁶ Ngalokho itukuthelwami yavutha phezu kwemizi yakwaJuda neendledlaneni zeJerusalema bekwaba marubhi nebhudu njengombana kunjalo namhlanjesi.’

⁷ “Nje-ke nakhu okutjhiwo nguSomnini uZimu uMninimandlawoke, uZimu wakwa-Israyeli, ‘Kubayini nizibangele ihlekelele engaka ngokususa amadoda nabafazi, abantwana namasana kwaJuda, nisale ningasenamisalela na?

⁸ Kubayini ningithukuthelise ngalokho okwenziwe zizandla zenu, nitjhisele abosingazimu itjhwalo enarheni yeGibhide, lapha nize kobana nikhonze khona na? Nizozitjhabalalisa beniziphendule into yokunikelelwa neyokurhubutjhwa hlangana nazo zoke izizwe ephasini.

⁹ Sele nikhohliwe ubukhohlakali obenziwa boyihlo namakhosi kanye neendlovukazi zakwaJuda nobukhohlakali obenziwa ngini nabafazi benu enarheni yakwaJuda neendledlaneni zeJerusalema na?

¹⁰ Bekube kunamhlanje, azange bazisole bebabe nevalo begodu azange balandele umthethwami kanye neemiso zami engazijamisa phambi kwenu naboyihlo.’

¹¹ “Ngalokho nakhu okutjhiwo nguSomnini uMninimandlawoke, uZimu wakwa-Israyeli, ‘Ngizimisele ukuletha ihlekelele phezu kwenu nokutjhabalalisa woke uJuda.

¹² Ngizakuthanyela imisalela yakwaJuda ezimisele ukuya eGibhide kobana iyokukhonza khona: Boke bazakubhubhela eGibhide, babulawe ngesabula babhujiswe ngendlala. Iye, ukusukela komncani bekube komdala, bazakufa ngesabula nangendlala. Bazakuba sithuko nesimanga, iye, into yokunikelelwa neyokurhubutjhwa.

¹³ Ngizakuhlunguphaza labo abahlala eGibhide ngesabula, ngendlala nangamatshwenyeko njengombana ngahlunguphaza iJerusalema.

¹⁴ Isiqhema semisalela yakwaJuda esiya eGibhide kobana siyokhonza khona asizukuphunyurha namkha sisinde bese sibuyela enarheni yakwaJuda. Sitjhisekela ukubuyela siyokuhlala khona, kodwana angeze sabuyela ngaphandle kwabaphunyurhi abalibinzana.’ ”

¹⁵ Nje-ke woke amadoda agade asazi bonyana abafazi bawo gade batjhisela abosingazimu itjhwalo kanye nabo boke abafazi ebebakhona, kulidwendwe elikhulu, iye, boke abantu abahlala eGibhide ePatrosi, bathi kuJoromiya:

¹⁶ “Asizukulalela umlayezo owukhulume kithi ngebizo lakaSomnini!

¹⁷ Ngambala sizokwenza koke lokho esithe sizokwenza: Sizokutjhisela indlovukazi yomkayi itjhwalo besiyinikele nomnikelo wokuselwako njengombana senza thina, abobaba, amakhosi wekhethu kanye neenduna zethu emizini yakwaJuda neendledlaneni zeJerusalema. Ngesikhatheso besinokugoma okunengi begodu besihlala kuhle, singazi ihlekelele.

¹⁸ Kodwana soloko salisa ukutjhisela indlovukazi yomkayi itjhwalo nokuyinikela iminikelo yokuselwako nje, siswele koke, siqedwa yisabula nendlala.”

¹⁹ Abafazi bangezelela ngokuthi: “Iye, besitjhisela indlovukazi yomkayi itjhwalo besiyinikele neminikelo yokuselwako begodu amadodethu bekazi bonyana thina besenza amakhekhe ngomfanekiswayo besiyinikele neminikelo yokuselwako.”

²⁰ Yeke uJoromiya wathi ebantwini boke, amadoda nabafazi ebegade bamphendula:

²¹ “USomnini azange akhumbule itjhwalo ebenilitjhisa emizini yakwaJuda neendledlaneni zeJerusalema nina naboyihlo, amakhosenu neenduna zenu kanye nabantu benarha na? Azange akufake ehliziyweni lokho na?

²² USomnini azange asakghona ukunibekezelela ngebanga lezenzo zenu zobukhohlakali nangebanga leenyenyiso enizenzileko. Nje-ke inarhenu yaba marubhi nebhudu nento yokunikelelwa, yangaba nabahlali njengombana injalo nanamhlanjesi.

²³ Ngebanga lokutjhisa kwenu itjhwalo nokona kwenu kuSomnini benangamlalela nangalandela umthethwakhe, iimiso neemfuneko zakhe, nehlelwe yihlekelele njengombana sele nibona nje.”

²⁴ Nje-ke uJoromiya watjela boke abantu, ngitjho nabafazi, bonyana balalele ilizwi lakaSomnini, iye, boke abantu bakwaJuda abaseGibhide, wathi:

²⁵ “Nakhu okutjhiwo nguSomnini uMninimandlawoke, uZimu wakwa-Israyeli, ‘Nina nabafazi benu nikhulume ngemilomenu benakuphetha ngezenzo zenu lokho enakuthembisa. Nathi ngambala nizakulandela iimfungo enizenzileko kobana nitjhisele indlovukazi yomkayi itjhwalo beniyinikele neminikelo yokuselwako. Khona-ke, thuwelelani nenze enakuthembisako, nigcine iimfungo zenwezo!’

²⁶ Ngalokho lalelani ilizwi lakaSomnini noke nina maJuda ahlala eGibhide. USomnini uthi, ‘Ngifunga ngebizo lami elikhulu, ngithi akunamuntu namunye kwaJuda ohlala eGibhide ozakubuye godu asebenzise ibizo lami namkha afunge ngalo athi: NgoSomnini uSomandla ngiqinisile!

²⁷ “ ‘Ngambala ngiyelele ngabo kobana behlelwe ngokumbi, ingasi okuhle. Woke umJuda oseGibhide uzakubhubha ngesabula nangendlala kufikela aphele nya.

²⁸ Lawo aphunyurha esabuleni bese abuyela enarheni yakwaJuda azakuba libinzana. Soke isiqhema semisalela yakwaJuda eze ukuzokuhlala eGibhide izakwazi bonyana ngelakabani ilizwi elijamileko, ngelabo namkha ngelami na.’

²⁹ “USomnini uthi, ‘Lokhu kuzakuba litshwayo kini kobana ngizanihlunguphazela endaweni le ukuze nazi bonyana amezwami wokunihlunguphaza ngambala azakwenzeka:

³⁰ Ngizokunikela uFaro uRhofira ikosi yeGibhide esandleni sezitha zakhe ezizumana nepilwakhe njengombana nganikela uTsedekhiya ikosi yakwaJuda kuNebukadiretsari ikosi yeBhabheli, okusisitha ebesizumana nepilwakhe.’ Utjho njalo uSomnini.”