UJOROMIYA 43 - IsiNdebele 2012 Translation

UJoromiya uyelelisa abantu godu

¹ Kwathi bona uJoromiya aqede ukutjela abantu woke amezwi kaSomnini uZimabo, okutjho koke uSomnini uZimabo agade amthume kobana abatjele khona,

² u-Azariya umsa kaHotjhaya noJorhanani umsa kaKhareyarhi nawo woke amadoda aziindeleli bathi kuJoromiya: “Unamala! USomnini uZimethu azange akuthume kobana uzokuthi, ‘Ningayi eGibhide kobana niyokukhonza khona.’

³ Kodwana uBharurhu umsa kaNeriya nguye okutjitjizela kobana ujamelane nathi ukuze usinikele kumaKasidi kobana asibulale namkha asise ekuthunjweni eBhabheli.”

⁴ Yeke uJorhanani umsa kaKhareyarhi nazo zoke iinduna zeenqhema zamajoni kanye nabantu boke azange balalele ilizwi lakaSomnini lokobana bahlale enarheni yakwaJuda.

⁵ Esikhundleni salokho, uJorhanani umsa kaKhareyarhi nazo zoke iinduna zeenqhema zamajoni bathatha yoke imisalela yakwaJuda ebegade ibuyile kizo zoke izizwe ebeyihlakazelwe kizo ekukhonzeni enarheni yakwaJuda;

⁶ godu bathatha woke amadoda, abafazi nabantwana, amakhosazana, ngitjho noJoromiya umphorofidi noBharurhu umsa kaNeriya, iye, boke abantu uNebuzaradani umphathi wobuzimba abatjhiya noGedaliya umsa ka-Arhikhamu omsa kaTjhafani.

⁷ Baya eGibhide ngombana azange balalele uSomnini! Nje-ke bafika eTarhipanirhesi.

⁸ ETarhipanirhesapho ilizwi lakaSomnini lafika kuJoromiya lathi:

⁹ “Thatha amatje amakhulu uwakhelele ngedaka emqaqadweni osebungenweni bemakhiwo yombuso le eTarhipanirhesi, amaJuda akuqalile

¹⁰ bese uthi kiwo, ‘Nakhu okutjhiwo nguSomnini uMninimandlawoke, uZimu wakwa-Israyeli: Qalani, sele ngizokuthumela bengibuyise incekwami uNebukadiretsari ikosi yeBhabheli, ngijamise isihlalo sakhe sobukhosi phezu kwamatje umphorofidami awakhelele lapha la, ngemva kobana endlale umada wakhe wobukhosi phezu kwawo.

¹¹ “ ‘Uzakuza, amadlhe inarha yeGibhide: Bokufa, baye ekufeni, bokuthunjwa, basiwe ekuthunjweni nebesabula, baye esabuleni.

¹² Uzakuthungela ngomlilo amathempeli wabosingazimu beGibhide, atjhise amathempelabo abe athumbe nabosingazimu bakhona. Njengomelusi aqopha ingubakhe, ngokunjalo uzakuqopha iGibhide, asuke lapho aphephile.

¹³ Ngethempelini lakazinyana welanga enarheni yeGibhide uzakuphadlha amatje wesikhumbuzo, atjhise namathempeli wabosingazimu beGibhide.’ ”