UJOROMIYA 41 - IsiNdebele 2012 Translation

¹ Ngenyanga yekhomba u-Itjhimayeli umsa kaNetaniya omsa ka-Elitjhama obegade angewebukhosini, akhuliselwe ngesigodlweni weza namadoda alitjhumi kuGedaliya umsa ka-Arhikhamu eMitsipha. Kwathi nabasagoma ndawonye lapho,

² u-Itjhimayeli umsa kaNetaniya namadoda alitjhumi ebegade akhamba naye basikima bamadlha phasi uGedaliya umsa ka-Arhikhamu omsa kaTjhafani ngesabula, bambulala loyo obegade abekwe yikosi yeBhabheli kobana abe mbusi phezu kwenarha.

³ U-Itjhimayeli godu wabulala woke amaJuda ebegade anoGedaliya eMitsipha kanye namajoni wamaKasidi agade alapho.

⁴ Elangeni elilandelako ngemva kokubulawa kwakaGedaliya, phambi kobana abantu bazi ngalokho,

⁵ kwafika amadoda amatjhumi abunane avela eTjhekemu, eTjhilo neSamariya alethe umnikelo weenthoro netjhwalo kobana azokunikela ethempelini lakaSomnini. Wona gade agude iindevu zawo, adabula izambatho zawo abe azisika.

⁶ U-Itjhimayeli umsa kaNetaniya waphuma eMitsipha kobana awahlangabeze. Bekakhamba akhihla isililo. Kwathi nahlangana nawo wathi: “Yenize kwaGedaliya umsa ka-Arhikhamu.”

⁷ Lokha amadoda lawo nasele angaphakathi kwedorobho, u-Itjhimayeli umsa kaNetaniya nesiqhema sakhe bawarhayila bebawaphosela ngaphakathi komphathamanzi.

⁸ Kodwana phakathi kwawo kwaba namadoda alitjhumi athi ku-Itjhimayeli: “Ungasibulali! Sinamagugu esiwafihle emmangweni, okutjho ikoroyi nebhali, amafutha we-oliva neliju.” Yeke wahlukana nawo, azange awabulale kanye nabafowabo.

⁹ Umphathamanzi aphosele ngakiwo iindumbu zamadoda awabuleleko bekungomkhulu ikosi u-Asa awenzako kobana avikele uJuda kuBhatjha ikosi yakwa-Israyeli. U-Itjhimayeli umsa kaNetaniya wawuzalisa ngababuleweko.

¹⁰ U-Itjhimayeli wathumba boke abaseleko ebegade baseMitsipha. Phakathi kwabo gade kunamakhosazana kanye nabo boke abanye ebegade basele lapho. Abantwabo ngilabo ebegade bangaphasi kwakaGedaliya umsa ka-Arhikhamu owabekwa nguNebuzaradani umphathi wobuzimba. U-Itjhimayeli umsa kaNetaniya wabathumba kobana aye nabo kuma-Amoni.

¹¹ Lokha uJorhanani umsa kaKhareyarhi nazo zoke iinduna zeenqhema zamajoni ebegade zinaye nabezwa ngabo boke ubulelesi obenziwe ngu-Itjhimayeli umsa kaNetaniya,

¹² bathatha woke amadoda bayokulwa no-Itjhimayeli umsa kaNetaniya. Bamfunyana eduze kwelitsha leGibeyoni.

¹³ Kwathi boke abantu ebebano-Itjhimayeli nababona uJorhanani umsa kaKhareyarhi kanye neenduna zeenqhema zamajoni ebegade zinaye, bajabula.

¹⁴ Boke abantu ebebathunjwe ngu-Itjhimayeli eMitsipha bajika ngelitshelo baya kuJorhanani umsa kaKhareyarhi.

¹⁵ Kodwana u-Itjhimayeli namadoda abunane baphunyurha ezandleni zakaJorhanani babalekela kuma-Amoni.

Ukubalekela eGibhide

¹⁶ Nje-ke uJorhanani umsa kaKhareyarhi nazo zoke iinduna zeenqhema zamajoni ebegade zikhamba naye bathatha boke abantu abasalako abathunjwa ngu-Itjhimayeli umsa kaNetaniya eMitsipha ngemva kobana abulale uGedaliya umsa ka-Arhikhamu. Labo bekumadoda, amajoni, abafazi nabantwana kanye nabaphakulwa ebekabathethe eGibeyoni.

¹⁷ Bakhamba njalo bayokujama eGeruthi-Kimuhamu eduze neBhethe-Lehema nabaya eGibhide

¹⁸ ukubalekela amaKasidi. Bebawesaba ngombana u-Itjhimayeli umsa kaNetaniya gade abulele uGedaliya umsa ka-Arhikhamu obegade abekwe yikosi yeBhabheli kobana abe mbusi phezu kwenarha.