UJOROMIYA 38 - IsiNdebele 2012 Translation

UJoromiya uphoselwa ngaphakathi komphathamanzi

¹ UTjhefathiya umsa kaMatana, uGedaliya umsa kaPhatjhirhuri, uJehukali umsa kaTjhelemiya noPhatjhirhuri, uJukali umsa kaTjhelemiya noPhatjhirhuri umsa kaMalikiya bezwa lokha uJoromiya nagade atjela boke abantu asithi:

² “Nakhu okutjhiwo nguSomnini, ‘Ohlala ngedorobheneli uzakufa ngesabula, indlala namatshwenyeko kodwana ozinikela kumaKasidi uzakuphila. Uzazisindisa, aphile.’

³ Godu nakhu okutjhiwo nguSomnini, ‘Nakanjani idorobheli lizokunikelwa ebuthweni lekosi yeBhabheli, yona izalithumba.’ ”

⁴ Yeke iinduna zathi ekosini: “Umrhali lo kumele abulawe ngombana udondisa abantu abalwako abasele ngedorobheni kanye nabo boke abantu ngezinto azitjho kibezi. Ngambala umuntu lo akafuni ihlalohle yabantwaba, kodwana ufuna ihlekelele kwaphela.”

⁵ Ikosi uTsedekhiya yathi: “Usezandleni zenu, ikosi angeze yaphikisana nani.”

⁶ Yeke zathatha uJoromiya zamfaka ngaphakathi komphathamanzi kaMalikiya ikosana, obegade ungesirhodlweni sabalindi. Zehlisela uJoromiya ngeentambo ngemgodini lowo. Begade unganamanzi, kulidaka kwaphela. UJoromiya wamodza ngedakenapho.

⁷ Kodwana u-Ebede-Meleki umKutjhe obegade ayinduna esigodlweni, wezwa bonyana zifake uJoromiya ngemphathamanzini. Kwathi ikosi isahlezi esangweni ledorobho ekuthiwa yiBhenjamini,

⁸ u-Ebede-Meleki waphuma esigodlweni wathi ekosini:

⁹ “Kosi, mphathami, amadoda la enze ubukhohlakali ngakho koke akwenzileko kuJoromiya umphorofidi. Bamfake ngemgodini lapha azakubulawa khona yindlala ngombana akusenasikwa ngedorobheni.”

¹⁰ Yeke ikosi yayala u-Ebede-Meleki umKutjhe yathi: “Thatha amadoda amatjhumi amathathu niyokhupha uJoromiya umphorofidi ngemgodini ngaphambi kobana ahlongakale.”

¹¹ Yeke u-Ebede-Meleki wathatha amadoda lawo, waya nawo elawini elalingaphasi kwendlu yamagugu esigodlweni. Wathatha imitletle yamaratha evithikileko wayehlisela ngeentambo ngemgodini kuJoromiya.

¹² U-Ebede-Meleki umKutjhe wathi kuJoromiya: “Gondela imitletle yamaratha evithikileko ngaphasi kwamakhwaphakho ngaphezu kweentambo.” UJoromiya wenza njalo.

¹³ Bamdosa ngeentambo bamkhupha ngemgodini. UJoromiya wahlala ngesirhodlweni sabalindi.

UTsedekhiya ubuza uJoromiya godu

¹⁴ Ikosi uTsedekhiya yathumela bonyana kubizwe uJoromiya umphorofidi alethwe ebungenweni besithathu bethempeli lakaSomnini. Ikosi yathi kuJoromiya: “Ngizokubuza okuthileko, ungangifihleli litho.”

¹⁵ Kodwana uJoromiya wathi kuTsedekhiya: “Nakube ngikunikela ipendulo, uzongibulala; godu nakube ngiyakweluleka awuzukungilalela.”

¹⁶ Nje-ke ikosi uTsedekhiya yafunga ngemsitheleni kuJoromiya yathi: “NgoSomnini yena owasipha umphefumulo ngiqinisile, angeze ngakubulala begodu angeze ngakunikela kilabo abazumana nepilwakho.”

¹⁷ Yeke uJoromiya wathi kuTsedekhiya: “Nakhu okutjhiwo nguSomnini, uZimu uMninimandlawoke, uZimu wakwa-Israyeli, ‘Nakube uzinikela eenduneni zekosi yeBhabheli, ipilwakho izakubulungeka nedorobheli angeze latjhiswa ngomlilo; iye, wena nomndenakho nizakuphila.

¹⁸ Kodwana nakube awuzinikeli eenduneni zekosi yeBhabheli, idorobheli lizakunikelwa kumaKasidi; nje-ke azalitjhisa ngomlilo, nawe ngokwakho awuzukuphunyurha ezandleni zawo.’ ”

¹⁹ Ikosi uTsedekhiya yathi kuJoromiya: “Ngiyawesaba amaJuda ahlubukele kumaKasidi ngombana amaKasidi lawa angahle anginikele kiwo bese ayangihlukumeza.”

²⁰ UJoromiya wathi: “Angeze akunikela! Akhese ulalele ilizwi lakaSomnini, iye, lokho engikutjho kuwe ukuze kukukhambele kuhle nepilwakho ibulungeke.

²¹ Kodwana nakube uyala ukuzinikela, nakhu uSomnini akwembule kimi:

²² Qala, boke abafazi abasele ngesigodlweni sekosi yakwaJuda bakhutjhelwa eenduneni zekosi yeBhabheli. Iye, qala bathi, “ ‘Abakhozi bakho bakudurhisile bebakuhlula; kuthi lokha iinyawo zakho nazimodza ngedakeni, bakufulathele.’

²³ “Boke abafazi bakho nabantwabakho bazakukhutjhelwa kumaKasidi. Wena ngokwakho angeze wasinda ezandleni zawo kodwana uzakuthunjwa yikosi yeBhabheli. Idorobheli lizakutjhiswa ngomlilo.”

²⁴ Yeke uTsedekhiya wathi kuJoromiya: “Ungatjeli muntu ngendabethu le, nakungasinjalo uzakufa.

²⁵ Nange iinduna zingezwa bonyana bengikhuluma nawe bese ziza kuwe zithi, ‘Sitjela bonyana wena utheni ekosini nokobana yona itheni kuwe, ungasifihleli litho nakungasinjalo sizokubulala’,

²⁶ zitjele uthi, ‘Bengendlala iinghonghoyilo zami ekosini kobana ingangibuyiseli ngekumbeni kaJonathani bona ngiyokufela khona.’ ”

²⁷ Mbala zoke iinduna zaya kuJoromiya zafese zambuza, wazitjela koke akuyalwe yikosi. Yeke azange bezisatjho litho kuye ngombana akakho owezwa indaba.

²⁸ Yeke uJoromiya wahlala esigodlweni sabalindi bekwafika ilanga lokuthunjwa kweJerusalema. Bekasese lapho lokha iJerusalema nayithunjwako.