UJOROMIYA 37 - IsiNdebele 2012 Translation

Ipilo kaJoromiya isengozini

¹ UTsedekhiya umsa kaJosiya wabekwa nguNebukadiretsari ikosi yeBhabheli kobana abe yikosi kwaJuda. Wabusa esikhundleni sakaKoniya umsa kaJehoyakhimu.

² Yena neenceku zakhe kanye nabantu bendawo azange bayelele amezwi kaSomnini awakhulume ngoJoromiya umphorofidi.

³ Nanyana kunjalo ikosi uTsedekhiya yathumela uJehukali umsa kaTjhelemiya kuJoromiya umphorofidi, akhambisana nomphristi uZefaniya umsa kaMaseya kobana bethule naku umlayezo: “Ngiyakukhombela, akhe usithandazele kuSomnini uZimethu.”

⁴ UJoromiya gade atjhaphulukile bona akhambakhambe hlangana nabantu ngombana ubegade angakabi ukuvalelwa.

⁵ Ibutho lakaFaro beliphumile eGibhide, nje-ke kwathi lokha amaKasidi ebegade avimbezele iJerusalema ezwe umbiko ngalo, asuka eJerusalema.

⁶ Nje-ke ilizwi lakaSomnini lafika kuJoromiya umphorofidi lathi:

⁷ “Nakhu okutjhiwo nguSomnini, uZimu wakwa-Israyeli, ‘Tjelani ikosi yakwaJuda enithume bonyana nizokubuza kimi leyo nithi: Ibutho lakaFaro ebeliphume bona lizonisekela, lizokubuyela emuva enarhenalo eGibhide.

⁸ Yeke amaKasidi azokubuya asahlele idorobheli. Azolithumba bekalitjhise ngomlilo.’

⁹ “Nakhu okutjhiwo nguSomnini, ‘Ningazikhohlisi, nidlumbane bonyana ngambala amaKasidi azakukhamba. Awa, angeze akhamba!

¹⁰ Ngitjho nanyana ningalihlula loke ibutho lamaKasidi anisahleleko, kusale amadoda alimele khulu kwaphela, enye nenye izakusikima etendeni layo itjhise idorobheli.’ ”

¹¹ Ngemva kobana ibutho lamaKasidi liphumile eJerusalema ngebanga lebutho lakaFaro,

¹² uJoromiya wahlosa ukutsomuka hlangana nabantu eJerusalema kobana aye esifundeni sakwaBhenjamini.

¹³ Kodwana kwathi nafika esangweni iBhenjamini, umphathi wabalindi ebekuthiwa nguJiriya umsa kaTjhelemiya omsa kaRhananiya, wambamba wathi, “Uhlubukela kumaKasidi!”

¹⁴ UJoromiya wathi: “Mamala lokho! Angihlubukeli kumaKasidi.” Kodwana uJiriya azange amlalele. Wambamba wamletha eenduneni.

¹⁵ Zamthukuthelela uJoromiya, nje-ke zambetha zabe zamfaka ngekumbeni kaJonathani usosiba, ngelawini lapha abotjhwa khona. Bebenza ilawelo indawo yokuvalela.

¹⁶ UJoromiya ngambala wagcina angaphakathi komphathamanzi ofulelweko. Ngemva kwesikhathi eside angapho,

¹⁷ ikosi uTsedekhiya yathumela bonyana abizwe. Walethwa esigodlweni ngasese, yambuzisisa yathi: “Unelizwi elibuya kuSomnini na?” UJoromiya wathi: “Iye, uzokunikelwa esandleni sekosi yeBhabheli.”

¹⁸ Nje-ke uJoromiya wathi ekosini uTsedekhiya: “Ngikone ngani wena namkha iinduna zakho namkha abantwaba kobana ningabeze ningivalele na?

¹⁹ Baphi abaphorofidi benu abaniphorofida bonyana ikosi yeBhabheli angeze yanisahlela namkha isahlele inarha le, na?

²⁰ Nje-ke kosi, mphathami, ngiyakubawa akhese ulalele! Angendlale nasi isinghonghoyilo sami kuwe: Ungangibuyiseli ngekumbeni kaJonathani usosiba. Angifuni ukufela lapho.”

²¹ Ikosi uTsedekhiya yayala kobana uJoromiya afakwe ngesirhodlweni sabalindi bese unikelwa isikwa esindulungu esibuya endledlaneni yababhagi kube ngemihla kufikela lapha isikwa siphela khona ngedorobheni. Yeke uJoromiya wahlala ngesirhodlweni sabalindi.