UJOROMIYA 36 - IsiNdebele 2012 Translation

UJehoyakhimu utjhisa umsongo kaJoromiya

¹ Ngomnyaka wesine kaJehoyakhimu umsa kaJosiya ikosi yakwaJuda, kwafika nanti ilizwi kuJoromiya livela kuSomnini lathi:

² “Thatha umsongo utlole kiwo woke amezwi engiwakhulume kuwe mayelana no-Israyeli, uJuda kanye nazo zoke ezinye izizwe kusukela ngesikhathi engakhuluma ngaso kuwe nakusabusa uJosiya bekube namhlanje.

³ Mhlamunye ikumba yakwaJuda izakuyelela yoke ihlekelele enginqophe ukuyenza phezu kwayo ukuze omunye nomunye wabo atjhuguluke endlelenakhe yobukhohlakali bese ngicolela icala labo kanye nesono sabo.”

⁴ Yeke uJoromiya wabiza uBharurhu umsa kaNeriya. UJoromiya gade abizela uBharurhu woke amezwi uSomnini awakhulume kuye, yena-ke awatlole emsongweni njengombana abizelwa.

⁵ UJoromiya wayala uBharurhu wathi: “Ngiliyiwe, angikavunyelwa ukungena ngethempelini lakaSomnini.

⁶ Nje-ke, wena khamba uyokufundela abantu woke amezwi kaSomnini owatlole emsongweni njengombana bengikubizela wona. Afunde azwakale ngethempelini lakaSomnini ngelanga lokuzila ukudla; iye, ngitjho nebantwini boke bakwaJuda ababuya emizanenabo.

⁷ Mhlamunye bangendlala iinghonghoyilo zabo kuSomnini; iye, mhlamunye omunye nomunye wabo angatjhuguluka endlelenakhe yobukhohlakali ngombana itukuthelo nokusilingeka uSomnini akhuluma ngakho phezu kwabantwaba, kukhulukhulu.”

⁸ Ngambala uBharurhu umsa kaNeriya wenza koke uJoromiya umphorofidi amtjela bonyana akwenze: Wafunda ngethempelini amezwi kaSomnini emsongweni.

⁹ Ngenyanga yethoba yomnyaka wesihlanu wokubusa kwakaJehoyakhimu umsa kaJosiya ikosi yakwaJuda, kwamenyezelwa isikhathi sokuzila ukudla phambi kwakaSomnini kibo boke abantu eJerusalema, okutjho abahlali kanye nalabo ebebabuya emizaneni yakwaJuda.

¹⁰ UBharurhu wafundela abantu amezwi kaJoromiya emsongweni ngethempelini lakaSomnini. Wafunda lokho aselawini lakaGemariya umsa kaTjhafani usosiba. Ilawelo belisesirhodlweni esingaphezulu ebungenweni besango lethempeli lakaSomnini okuthiwa yiMutjha.

¹¹ Lokha uMikaya umsa kaGemariya omsa kaTjhafani nezwa woke amezwi kaSomnini afundwe emsongweni,

¹² wehlela esigodlweni lapha bekuhlezi khona zoke iinduna elawini lakasosiba wombuso. U-Elitjhama usosiba loyo, uDelaya umsa kaTjhemaya, u-Elinatani umsa ka-Akibori, uGemariya umsa kaTjhafani, uTsedekhiya umsa kaRhananiya kanye nazo zoke iinduna ezinye bezilapho.

¹³ Ngemva kobana uMikaya abatjele koke akuzwe lokha uBharurhu nafundela abantu emsongweni,

¹⁴ zoke iinduna zathumela uJehudi umsa kaNetaniya omsa kaTjhelemiya umsa kaKutjhi kobana athi kuBharurhu: “Letha umsongo ofundele abantu kiwo lowo bese nawe uyeza.” Yeke uBharurhu umsa kaNeriya wanqomba kibo aphethe umsongo.

¹⁵ Bathi kuye: “Hlala phasi, usifundele umsongo lowo.” Yeke uBharurhu wabafundela-ke.

¹⁶ Kwathi lokha nabezwa woke amezwi lawo baqalana ngokwesaba, bathi omunye komunye: “Nakanjani kumele sibikele ikosi ngawo woke amezwi la.”

¹⁷ Nje-ke babuza uBharurhu bathi: “Akhese usitjele, kuze njani bonyana utlole woke amezwi womlomakhe la?”

¹⁸ UBharurhu wathi: “Wangibizela woke amezwi la, mina-ke ngawatlola khonokho ngomsobo emsongweni.”

¹⁹ Yeke iinduna zathi kuBharurhu: “Wena noJoromiya khambani niyokubhaca. Ningatjeli muntu kobana nikuphi.”

²⁰ Ngemva kobana balonde umsongo ngelawini laka-Elitjhama usosiba, baya ekosini ngesirhodlweni sesigodlo, bayibikela koke.

²¹ Ikosi yathumela uJehudi kobana ayokuthatha umsongo, yeke uJehudi wawuthatha ngelawini laka-Elitjhama usosiba, weza nawo ekosini wafese wayifundela, zoke iinduna zesigodlo ziyiphahlile.

²² Begade kuyinyanga yethoba, ikosi ihlezi ngelawini lebusika, umlilo uvutha eziko phambi kwayo.

²³ Bekuthi njalo uJehudi angafunda amarhemo amathathu namkha amane womsongo, ikosi iwadabule ngomukhwa womtloli bese iwaphosele eziko, kufikela lapha kutjha khona woke umsongo emlilwenapho.

²⁴ Ikosi nazo zoke iinceku ezezwa koke lokhu azange bezikhombise ukwesaba kangangobana azange bezidabule ngitjho nezambatho zazo.

²⁵ Ngitjho nanyana u-Elinatani, uDelaya noGemariya bakhombela ikosi bonyana ingatjhisi umsongo lowo, azange beyibalalele.

²⁶ Yayala uJerarhimiyeli ikosana, uSeraya umsa ka-Azriyeli kanye noTjhelemiya umsa ka-Abidiyeli kobana bayokulanda uBharurhu umtloli kanye noJoromiya umphorofidi. Kodwana uSomnini begade abafihlile.

²⁷ Ngemva kobana ikosi itjhise umsongo omumethe amezwi uBharurhu ebegade awatlole ngokubizelwa nguJoromiya, ilizwi lakaSomnini lafika kuJoromiya lathi:

²⁸ “Thatha omunye umsongo godu utlole kiwo woke amezwi ebegade atlolwe kewokuthoma otjhiswe nguJehoyakhimu ikosi yakwaJuda.

²⁹ Mayelana noJehoyakhimu ikosi yakwaJuda yithi uSomnini uthi, ‘Wena utjhise umsongo loya ngokubuza bona kubayini uBharurhu atlole kobana ngambala ikosi yeBhabheli izakuza ibhubhise inarha le bese isuse abantu neenlwana kiyo.

³⁰ Ngalokho-ke nakhu okutjhiwo nguSomnini ngoJehoyakhimu ikosi yakwaJuda: Akazukuba namuntu ozakuhlala esihlalweni sobukhosi sakaDavida. Isidumbu sakhe sizakulahlwa, sitjhiswe lilanga emini, silale isithwathwa ebusuku.

³¹ Ngizamhlunguphaza yena nabantwabakhe kanye neenceku zakhe ngebanga lecala labo. Ngizakwehlisela phezu kwabo kanye nabo boke abahlali beJerusalema nabantu bakwaJuda yoke ihlekelele engayimemezela phezu kwabo ngombana azange balalele.’ ”

³² Yeke uJoromiya wathatha omunye umsongo wawunikela uBharurhu umtloli omsa kaNeriya. UJoromiya wabizela uBharurhu godu woke amezwi womsongo uJehoyakhimu ikosi yakwaJuda awutjhisa emlilweni. UBharurhu wawatlola njengombana anjalo. Kwaba namezwi amanengi afanako afakelelwako.